Коми Республика Россияын медводдза регионъяс лыдын босьтчис вӧдитчыны сикт-карса чужӧмбансӧ югыд биӧн-рӧмӧн мичмӧдӧм могысь ӧнія кадся технологияясӧн. Россияса минпромторглӧн водзмӧстчӧмӧн найӧс дасьтӧмаӧсь миян странаын такӧд йитӧдын нималана специалистъяс.
Тайӧ выль проектсӧ шуӧма збыльмӧдны йӧзлысь олӧмсӧ бурмӧдӧм могысь.
Югыд биӧн-рӧмӧн лоӧ мичмӧдӧма-югзьӧдӧма уличаяс, изэрдъяс, уна йӧзаинъяс. Сыктывкарын та боксянь мыйсюрӧ вӧчӧма нин. Миян войвыв республикаын, кӧні оз тырмы лунъюгыдыс, да тайӧ мӧрччӧ йӧз дзоньвидзалунӧ, торйӧн нин колана да тӧдчана татшӧм проектыс.
—Эксперимент ради шуим босьтчыны тайӧ уджас миян войвыв республикаса этнофольклор вылӧ подуласьӧмӧн, — висьталіс такӧд йитӧдын регионса юралысь Ростислав Гольдштейн. — Мый таысь артмас, аддзанныд декабрь 27 лунӧ нин Степан изэрдын «Легенды Севера» этношоу дырйи. Волӧй гаж вылас став семьянад!
Содтӧд пасъям, Сыктывкарын олысьяслы да налӧн гӧсьтъяслы «Легенды Севера» этношоунас позяс нимкодясьны выльвося каникул чӧж.
<> Гижӧдсӧ дасьтіс Александра АРТЕЕВА.