Став сьӧлӧмсянь чолӧмала тіянӧс 2026 воӧн да Рӧштвоӧн!
Во сигӧртігӧн ми кӧсъям вӧчны аслыным кутшӧмкӧ кывкӧртӧд: кыдзи коли воыс, мый бурыс да кутшӧм мытшӧд-падмӧг вӧлі тайӧ кадколастас. И мед эськӧ быдӧн важ восӧ колльӧдігӧн дум вылас сӧмын бурсӧ да шудасӧ тӧд вылас уськӧдас, а Выль воыс мед кык да куим пӧв содтас!
Коми йӧзӧдчан керкаын восӧ сигӧртігӧн тшӧтш окота сӧмын бурсӧ казьтыштны. Ен сыкӧд, витнан петасным миян мичаӧсь абу сӧмын чужӧмбаннас, но и пытшкӧснас, сӧстӧм мича коми кывъя гижӧдъяснас.
Миян пӧвстысь дзик быдӧн пуктӧ уна кад, вын-эбӧс, сюсьлун-мывкыдлун, медым коми газет-журналъяс вӧліны медбурӧсь. Быд главнӧй редактор став лист боксӧ сьӧлӧм пырыс нуӧдӧ, быд серпас-гижӧд понда майшасьӧ. И оз весьшӧрӧ!
«Коми му» газетлы локтан воӧ 108 во тырас. Республикаын медся важ петас! А «Войвыв кодзув» журналлы 2026 воыс ыджыд тшупӧда – тырас 100 во! Нэмӧвӧйся журнал! Том йӧзлы «Йӧлӧга», коді таво бара на лои челядьлы СМИ пӧвстын «Волшебное слово» ставроссияса конкурсын вермысьӧн, локтан воӧ пасъяс петӧмсяньыс 35 во! А кымын аддзысьлӧм посниуловкӧд нуӧдіс таво «Би кинь»” журнал! Локтан воӧ сійӧ тшӧтш нимлунасьӧ – 40 вося тшупӧда пас тырӧ. Во чӧж шмонитіс тіянкӧд «Чушканзі» журнал, мед кӧть и 2026-ӧдас сійӧ абу юбиляр, но пасъяс медводдзаысь петӧмсяньыс 69 во! Гӧгӧрвоанныд, кутшӧм ыджыд арлыдаӧсь, мывкыдӧсь да тӧлкаӧсь миян петасъясным?! Коми Республикалӧн гӧрдитчантор!
Ми петам, ми водзмӧстчам, ми эмӧсь, и мед ёна дыр на буретш тадзи лоӧ!
Сиа тіянлы крепыд дзоньвидзалун, семьяын тыр-бур олӧм да радлун, ставнымлы юр весьтаным сӧстӧм енэж, кузь нэм да бур шуд!
Судзӧдӧй да лыддьӧй коми газет-журнал!
Выль 2026 воӧн!
Став бурсӧ сиӧмӧн, Коми йӧзӧдчан керкаӧн веськӧдлысь Галина МАКАРОВА.