Локтан воын Коми Республикаса агропромышленнӧй техникум помалысьясысь 26-ӧн босьтасны ветеринарлысь диплом. На пӧвстысь кызвыныс лӧсьӧдчӧны уджавны специальносьт сертиныс ас регионын сиктса овмӧдчӧминъясын.
Кыдз тыдовтчис техникумас налӧн производственнӧй практика кузя быдвося конференция дырйи, том ветеринаръяслы бӧрйӧм уджныс воӧ сьӧлӧм выланыс, и специальносьт сертиныс босьтӧм тӧдӧмлун-сямыс налӧн бур.
Студентъяс окотапырысь висьтасисны видз-му предприятие-овмӧсъясын тавося асланыс практика йылысь, торйӧн кӧ, мый ас кежаныс нин вермисны вӧчны, а сідзжӧ мый выльсӧ да бур-сӧ тӧдмалісны асланыс удж кузя.
Регионса видз-му овмӧс министерствоысь, ветеринария управлениеысь да лабораторияысь, республикаса агропромышленнӧй предприятие-организацияясысь веськӧдлысьяс да специалистъяс, на лыдын минсельхозса министрӧс вежысь Андрей Белов, висьталісны аскиа ветеринаръяслы налӧн уджын ӧнія кадся вежсьӧмъяс да выльпыртӧмъяс йылысь, тӧдмӧдісны, государствосянь кутшӧм отсӧг шуӧма вичмӧдны видз-му овмӧсын уджӧ босьтчысьяслы.
Техникумса директор Светлана Савинова аттьӧаліс велӧдчан заведениеыслысь уджъёртъяссӧ, на лыдын «Межадорское», «Южное» да «Пригородный» ООО-яс, Ветеринария управление, «Ижемский оленевод и КО» Колхоз СПК, Киров обласьтысь агропромышленнӧй предприятиеяс.
Найӧ уна во нин отсасьӧны агропромышленнӧй техникумлы дасьтыны видз-му овмӧсын колана специалистъясӧс, на лыдын, дерт жӧ, ветеринаръясӧс.
Тайӧ специальносьт сертиыс Сыктывкарса агротехникумын талун велӧдчӧны 112 ныв-зон.
Колӧ пасйыны, мый быд во абитуриентъяс пӧвстысь торйӧн нин унаӧн бӧрйӧны буретш ветеринария.
А сэсся техникум помалӧм бӧрын шӧркодя 30 прӧчентыс водзӧ велӧдчӧны специальносьт сертиныс Кировса, Санкт-Петербургса да мукӧд гырысь карса вузъясын. <>
Елена ОСИПОВА. Снимокъясыс ӧтуввезйысь.