Регионса юралысь Сергей Гапликов нуӧдіс Коми Республикаса правительстволӧн президиумкӧд сӧвещание, кӧні сёрниыс вӧлі выль велӧдчан во кежлӧ школаяслӧн, детсадъяслӧн да содтӧд тӧдӧмлун босьтан учреждениеяслӧн дасьлун йылысь. Доклад вӧчис республикаса образование, наука да том йӧзлӧн политика кузя министр Наталья Якимова.
Министрлӧн висьталӧм серти, регионса став детсадйыс, школаыс, содтӧд да профессиональнӧй образование сетан учреждениеыс выль велӧдчан во кежлӧ дасьӧсь.
Комиссияяс видзӧдлӧмаӧсь, донъялӧмаӧсь да ошкӧмаӧсь 783 велӧдчанін.
Таво Комиын тӧдӧмлун сетан организацияяслы вичмӧдӧмаӧсь 735 миллион шайт (кольӧм воын серти 250 миллионӧн унджык). Сы лыдын 84 миллионыс воӧма федеральнӧй бюджетысь, 329,2 миллионыс – республикаса да 321,6 миллион шайтыс – меставывса сьӧм кудъясысь.
Велӧдчан во кежлӧ дасьтысигӧн торйӧн стрӧга донъялӧмаӧсь, кыдзи дорйыны челядьӧс да том йӧзӧс пӧжарысь, вуджан висьӧмъясысь да террористъясысь. Сідзжӧ видзӧдӧмаӧсь, медым тырмымӧн вӧлі велӧдысьыс, колана эмбурыс, мед бура вӧлі пелькӧдӧма велӧдчанінсӧ да сы гӧгӧрсӧ.
Республикаса юралысь Сергей Гапликовлӧн индӧд серти велӧдан министерство зільӧ вочасӧн бырӧдны челядьӧс кык сменаӧн велӧдӧм да ясли-садйӧ дзолюкъяслысь ӧчеред.
Таво школаясын содас 550 велӧдчан места. Кулӧмдінын восьтӧма 250 морт вылӧ выль велӧдчан корпус. Сентябрь 2 лунӧ 200 ныв-зон локтасны велӧдчыны енбиа челядьлы республикаса лицейӧ.
Капитальнӧя дзоньталӧм бӧрын юркарын восьтасны 4-ӧд номера школа. Сыктывкарын жӧ таво помын 40-ӧд номера специальнӧй (коррекционнӧй) школаын содтӧд лӧсьӧдасны 50 велӧдчан места.
–Сентябрь 1 лунӧ ясли-садъясӧ сідзжӧ содтӧд босьтасны 90 дзолюкӧс, – висьталіс Наталья Якимова. – Медсясӧ тайӧ артмис стрӧйбаяссӧ выльмӧдӧм-паськӧдӧмӧн. Во помас кӧсъям восьтыны Кӧрткерӧс районса Ыджыдвидз сиктын ветымын кагуклы детсад. Сы мында жӧ дзолюк мӧдасны ветлыны юркарса Тентюков улич вылын ясли-садйӧ. И сідз шусяна частнӧй детсадъясын лӧсьӧдӧма содтӧд 156 места.
Таысь кындзи «Образование» национальнӧй проект серти сиктса школаясын дзоньталӧма куим спортзал да вӧчӧма та мында жӧ спортплощадка.
Юралысь тшӧктіс министерствоӧн веськӧдлысьяслы торйӧн кутны син уланыс, мед челядьӧс школаӧ лючки новлӧдлісны автобусӧн.