Тавося август тӧлысьын петіс “Этнокультурное образование и воспитание детей в Ижемском районе” методическӧй вӧзйӧм чукӧр. А дасьтіс-лэдзис тайӧ сборниксӧ “Коми йӧзӧдчан керка”.
Изьва районса велӧдан юкӧнӧн веськӧдлысь Анжелика Волковалысь юалі, мися, кыдзи нӧ воис тіянлы татшӧм мӧвпыс – дасьтыны этнокультура нырвизьын методическӧй сборник? Вӧлӧмкӧ, тайӧ мӧвпсӧ уна во нин кӧсйӧмаӧсь пӧртны олӧмӧ. Медводз усьӧма шуд лэдзны небӧгӧн челядьлы концференция вылысь краеведение серти зэв-зэв аслыспӧлӧс, тӧдчана да интереснӧй уджъяс. Та бӧрын нин Анжелика Васильевна заводитӧма корсьны да чукӧртны районса став велӧдысьлысь (абу сӧмын коми кыв велӧдысьяслысь) этнокультура компонента методическӧй вӧзйӧмъяссӧ. А кольӧм во Изьваын мунӧм этнокультура компонента мастер-классъяс петкӧдлан республикаса фестиваль бӧрын и шуӧмаӧсь лэдзны тайӧ чукӧрсӧ. Сьӧмӧн тшӧтш отсалӧма республикаса национальнӧй политика министерство.
И со тайӧ небӧгыс петіс! Татчӧ лои пыртӧма Изьва районса кагульничаяслысь да велӧдысьяслысь этнокультурнӧя велӧдӧмын занятие-урок нуӧдан методическӧй вӧзйӧмъяс.
Небӧг артмис кык юкӧнысь: школаӧдзса да школаын урок нуӧданногъяс. Занятие-урокъяслӧн конспектъяс, сценарийяс, туялӧмъяс да ворсӧмъяс отсаласны велӧдысьяслы да кагульничаяслы пестыны посниуловлӧн сьӧлӧмъясын коми кыв дорӧ муслун, ышӧдасны челядьӧс видзны-сӧвмӧдны мам кыв, тӧдмасьны чужан мулӧн историяӧн да коми войтырлӧн традицияясӧн.
Чайтам, тайӧ небӧгын ӧтувтӧм уджъясыс лоӧны коланаӧн педагогъяслы быдмысь войтыркӧд быдлунъя уджын. А тшӧтш и кутам лача, мый и мукӧд районса велӧдысь-кагульничаяс тшӧтш кутчысясны татшӧм ыджыд уджас. А ми, коми газет-журналын зільысьяс, окотапырысь бара на босьтчам вӧчны-дасьтыны татшӧм чукӧрсӧ. Нӧшта казьтыштам, мый “Этнокультурное образование и воспитание детей в Ижемском районе” методическӧй вӧзйӧм чукӧр позьӧ ньӧбны юркарса “Ордым” лавкаысь (Сыктывкар, К.Маркс нима улича, 229-ӧд керка).
Галина МАКАРОВА.