Кӧрткерӧс районысь вит сюрс гӧгӧр морт мунлӧма Айму вӧсна Ыджыд тышлӧн фронтъяс вылӧ. Джынйыс бӧр гортас абу бергӧдчӧма. Районын ӧні сӧмын ӧти фронтӧвик ловъя — Михаил Микушев. Вомынысь война вылӧ мунӧма 320 морт. Сё нелямын нёльыс усьӧма вӧрӧгкӧд тышын. Налысь нимъяссӧ пасйӧма сикт шӧрын сулалысь обелиск вылын. Выльмӧдӧм бӧрын сійӧс восьтісны кольӧм субӧтаӧ, август 24 лунӧ, сиктыслы 345 во пасйигӧн.
—Миянлы колӧ видзны усьӧмаяс йылысь паметьсӧ, медым и том войтыр тӧдісны, мый вӧсна тышкасисны да пӧгибнитісны налӧн пӧльяс, — висьталіс обелисксӧ восьтігӧн «Единая Россия» партиялӧн Коми регионса исполкомӧн веськӧдлысь Леонид Носов.
Сійӧ аттьӧаліс сиктса йӧзӧс, кодъяс пуктісны обелиск выль-мӧдӧмӧ ассьыныс пай.
Сэсся здук кежлӧ ланьтлӧмӧн вомынсаяс казьтыштісны усьӧм салдатъясӧс, пуктісны памятник дорас дзоридзьяс.
Обелисксӧ выльмӧдӧм могысь вомынсаяс дасьтӧмаӧсь «Памяти павших будем достойны» уджтас да пырӧдчӧмаӧсь «Единая Россия» ютыр-лӧн йӧзкотырлы тӧдчана проектъяслӧн став Россияса конкурсӧ.
Вомынын партиялӧн дас вит морта котырӧн юрнуӧдӧ Мария Попова.
Кор пӧ тӧдмалім конкурс йывсьыс — пыр и ыззим, висьталӧ сійӧ. Миян сиктын пӧ Великӧй Отечественнӧй война вылын усьӧмаяслы обелискыс важмӧма нин вӧлі. И мӧвпыштім пӧ, мый вермам выльмӧдны сійӧс.
—Партиечьяскӧд чукӧртчылім 2018 вося декабрь 28 лунӧ, сёрнитім ас костын, донъялім выннымӧс да шуим дасьтыны уджтассӧ, — водзӧ висьталіс Мария Александровна. — Республика пасьталаысь вӧлі вӧзйӧмаӧсь 51 проект. А вермысьяснас лоим ми, вомынсаяс.
Дерт, вермӧмаӧсь тшӧтш и сы вӧсна, мый проектсӧ колана ног дасьтӧмаӧсь-гижӧмаӧсь, и асьныс ыджыд удж кӧсйысьӧмаӧсь вӧчны: разь-ны важмӧм обелисксӧ, выльыслы подув лӧсьӧдны, плиткаяс вольсавны, лабичьяс сувтӧдны да мавтны найӧс, пелькӧдны обелиск гӧгӧрсӧ.
Сиктса администрация отсалӧма лыа да каржа вайны, плиткасӧ (куимсё кызь нёльӧс) да бордюр изсӧ (ӧкмысдасӧс) вӧчӧма асшӧр уджалысь Алексей Сергеевич Игушев.
Конкурсын вермӧмысь «Единая Россия» вичмӧдӧма 160 сюрс шайт, и асьныс сиктса на чукӧртӧмаӧсь сьӧмсӧ — 92 сюрс шайт.
—Дыр мӧвпалім, кутшӧм лоас памятникыс. Паметьыд ӧд юрын да небӧгын олӧ, со и думыштім усьӧмаяслысь ним-овсӧ восьса книгалӧн лист бокъясӧ пасъявны, — висьталіс Мария Попова. — Май помын медводдзаысь субӧтник вылӧ петалім, унаӧн сэки волісны.
Та бӧрын вомынсаяс некымынысь на субӧтникасьӧмаӧсь, медым сиктлӧн лун кежлӧ удитӧдчыны обелиск-сӧ вӧчны.
Ӧні Вомынын олӧ тылын куим уджалысь, войнадырся челядьыс — 22 морт.
Дерт, и Победа лунтӧ быд во кыпыда пасйӧны. Таво сиктсӧ помсянь помӧдз кы-тшовтӧмаӧсь, быд вочаасьысь война йылысь кывбур лыддьӧма либӧ сьыланкыв сьылӧма. И автопробег на нуӧдӧмаӧсь.
—Сизим машина вӧлі, кык флаг, — висьталіс Анатолий Пантелеймонович Исаков. — Пробегыс заводитчис сиктса администрация дорын, ветлім катыд помӧдз, кывтыдӧдз, сэсся шойна вылӧ локтім. Сэні сулалӧ памятник, кытчӧ пасъялӧма гортас ловйӧн воӧм фронтӧвикъяслысь ним-овсӧ, кодъяс кувсьылісны ас сиктын нин да кодъясӧс ас шойна вылын и дзебӧма. Тайӧ пас дорас пуктім паметьлысь гирлянда, а сэсся локтім сиктӧ митинг вылӧ.
Снимокъясыс
«Единая Россия» ютырлӧн
Коми регионса юкӧнысь.