«Россия — созвучие культур» квайтӧд этнокультурнӧй фестиваль муніс Ленинград обласьтса Всеволжск карын. Сэтчӧ воліс Россияса Рытыв-Войвыв регионъясысь 29 делегация, на лыдын и национальносьтъяслӧн да ёртасян керкаясын зільысьяс, ставыс сюрс сайӧ морт.
Фестивальсӧ сиисны дзоньвидзаа оласноглы, кодӧс таво нимӧдӧны Ленинград обласьтын, а сідзжӧ спортлы да ремеслӧяслы.
Праздниксӧ восьтіс обласьтса губернатор Александр Дрозденко. Сійӧ чолӧмаліс чукӧртчысьясӧс да пасйис, мый фестивальыс ясыда петкӧдлӧ, кутшӧм ыджыд да вына странаын ми олам.
Сылысь кывъяссӧ ошкисны и гӧсьтъяс, кодъясӧс шемӧсмӧдӧма праздник вылас петкӧдлӧм уна сикас национальносьтъяслӧн культураыс, творчествоа котыръ-яслӧн енбиыс да аслыспӧлӧслуныс, ыджыдысь-ыджыд гажыс-лӧн кыпыд ладыс.
Комисянь делегацияын фестиваль вылас вӧліны Россияса Рытыв-Войвыв кытшын республикалӧн представительлысь удж вӧчысь Валерий Козлов, национальнӧй политикаса министр Галина Габушева, Санкт-Петербургын комияслӧн «Неватас» землячествоӧн веськӧдлысь Александр Терюков, Ленинград обласьтын коми землячествоысь нырщик Валентина Зезегова, «Дзоридз» ансамбль, «АртКолорит» творчество керкаӧн веськӧдлысь Алексей Полубояров, Санкт-Петербургса да Ленинград обласьтса коми землячествоясын водзмӧстчысьяс.
Фестиваль дырйиыс нуӧдісны быдсикас мастер-класс, спорт ворсӧм, йӧзкостса йӧктӧм да гажӧдчӧм. Зэв ыджыд эрд вылын паськӧдчисны национальнӧй подворьеяс да зарни киподтуя мастеръяс.
Коми Республикалӧн традицияясӧн да культураӧн позис тӧдмасьны Национальнӧй коми подворьеын, кӧні вӧлі зэв паськыда петкӧдлӧма вужвойтырлысь кипом удж, а сідзжӧ Ленинград обласьтса коми землячествоын водзмӧстчысьяслысь вӧчӧмторъяс. Тані жӧ нуӧдісны мастер-классъяс, кӧні петкӧдлісны, кыдзи вӧчавны акань, серпасасьны ситеч вылын.
Фестивальса сцена вывсянь асланыс дзоньвидза оласногӧн тӧдмӧдісны Россияса регионъясысь да Ленинград обласьтысь гӧсьтъяс. Коми петкӧдліс сьылан-йӧктан номер да такӧд тшӧтш ыджыд экран вылын этностиль нога видеоролик, кӧні медводз юргис Коми му йылысь важся предание, а сы бӧрын петкӧдчис талунъя республика.
Сюрс сайӧ морт фестиваль дырйиыс тӧдмасисны вӧралысь Йиркап да сылӧн вӧвлытӧм тэрыб лызь йылысь легендаӧн, а сідзжӧ гӧсьтъяслы казьтыштісны Комиысь лызьӧн нималана котралысьясӧс – Олимпиадаса чемпионъяс Василий Рочевӧс, Николай Бажуковӧс да Раиса Сметанинаӧс.
Фестивальыс помасис гала-концертӧн, кӧні кыпыда сьыл=с «Дзоридз» ансамбль. И та дырйи экран вылын петкӧдлісны Коми Республикалы сиӧм мича серпасъяс.
Фестивальса жюри зэв бура донъяліс Коми делегациялысь уджсӧ да национальнӧй под- ворьеяслӧн конкурсын вичмӧдіс коймӧд места.
* * *
«Россия – созвучие культур» этнокультурнӧй фестивальсӧ Ленинград обласьтса правительство быд во нуӧдӧ аслас регионса кутшӧмкӧ карын. 2020 воын татшӧм гажыс мунас Тихвинын.
Снимокыс РФ-са Рытыв-Войвыв кытшын Коми Республикалӧн представительствоысь пресс-службалӧн.