«ЛУКОЙЛ-Коми» ООО-ын уджалысьяс окотапырысь волісны Усинск районса Закарвань грездлӧн да Щельябӧж сиктлӧн юбилейяслы сиӧм гаж-аддзысьлӧмъяс вылӧ. Кольӧм субӧтаӧ Закарваньын олысьяс пасйисны асланыс грездлы 130, а щельябӧжсаяс – чужан сиктныслы 160 во тырӧм.
Мусир перъян компанияысь гӧсьтъяс, кодъяскӧд вӧлі тшӧтш муниципалитетса администра- цияӧн веськӧдлысь Николай Такаев, первой кыпыда чолӧмалісны Закарваньын олысьясӧс.
Накӧд аддзысьлігӧн «ЛУКОЙЛ» ООО-са генеральнӧй ди-ректорӧс йӧзкӧд йитӧд кутӧм кузя вежысь Евгения Лясковская пасйис, мый Усинск районса тайӧ важся грездыслӧн сӧвмӧмыс топыда йитчӧма сэні олысьяскӧд.
–Ті пыдди пуктанныд да вылӧ донъяланныд пӧль-пӧчныдлысь нэмӧвӧйся бур оласногсӧ, зілянныд водзӧ озырмӧдны асланыд грездлысь историясӧ. И талун татчӧс войтыр, кыдзи и водзті олысьясыс, сӧвмӧдӧны кӧр видзӧм, пыдди пуктӧны войвывсалысь важся традицияяссӧ да культурасӧ.
Уна во нин «ЛУКОЙЛ-Коми» отсалӧ котыртны-нуӧдны кӧр видзысьяслысь «Зарни сюр» гаж, коді нималӧ нин кыдзи районлӧн визит карточка. Во сайын «ЛУКОЙЛ» компаниялӧн социальнӧй да культурнӧй проектъяслӧн быдвося конкурслӧн грантӧн пасйисны Георгий Победоносецлӧн нимӧн вежӧдӧм храмын иконостас лӧсьӧдӧм могысь татчӧс войтырлысь водзмӧстчӧмсӧ.
Щельябӧжлӧн тшупӧда пас кежлӧ сиктын кыпалӧны социальнӧй тӧдчанлуна выль стрӧйбаяс. Коми Республикаса правительствокӧд ёртасьӧм йылысь сёрнитчӧм серти «ЛУКОЙЛ» компаниялӧн сьӧма отсӧг весьтӧ тані лэптӧны детсад да бурдӧдчан амбулатория, кӧні матысса кадӧ нин медицина услугаясӧн кутасны могмӧдны оз сӧмын Щельябӧжын, но и матысса грездъясын – Закарваньын, Прасканын, Кушшорын олысьясӧс. Тані жӧ стрӧитӧны медработникъяслы кык патераа благоустроитӧм керка.
–Эска, компаниялӧн тӧдчана отсӧгӧн и водзӧ кутас сӧвмыны-бурмыны муниципалитетса сикт-грездъясын да посёлокъясын олӧмыс, – пасйис Евгения Лясковская.
Юбилейяскӧд йитӧдын сиктса культура керкаяслы редприятиесянь козьналісны мультимедийнӧй оборудование да мукӧд колана аппаратура ньӧбӧм вылӧ сертификатъяс.
Снимокыс «ЛУКОЙЛ-Коми» ООО-са пресс-службалӧн.