Газет редакцияӧ неважӧн шыӧдчис Сыктывкарын олысь ань да элясис, улич вылысь пӧ бӧръя кадӧ то сэн, то тан пыр тшӧкыдджыка аддзыла эновтӧм кань.
«Сэтшӧм найӧ жальӧсь. Нявзысьяс олӧны ас кежсьыныс, сёйӧны мый веськалас-сюрыштас, висьӧны, рӧдмӧны. Висьталӧй, кытчӧ шыӧдчыны эновтӧм кысӧ кузяыс?» – юасьӧ сійӧ.
Кодкӧ вӧтлӧ, кодкӧ ас кежсьыс кольӧ
Эжваысь «Добрые сердца» приютса (ӧтуввезйын https:ӦӦvk.comӦdobro_sykt11 группа) волонтёр Мария Сидоренко юксис миянкӧд опытнас да гӧрӧдсӧ разьӧм кузя видзӧдласнас.
–Эновтӧм каньяссӧ ми куталам. Кодъясӧскӧ ас дорын видзыштам, сэсся иналам бур йӧзлы, а дзик вӧй-дикӧйяссӧ кодзам-стерилизуйтам да нуам бӧр, кытысь босьтлім, – висьталӧ Мария. – Неважӧн на Сыктывдінса Выльгортын автобус сувтланінысь аддзим квайт кысук! Вӧлӧмкӧ, кӧзяеваыс вуджӧмаӧсь овны мӧдлаӧ, а пемӧсъяссӧ сьӧрсьыс абу нуӧмаӧсь. Вочасӧн найӧ рӧдмӧмаӧсь. Ми куталім найӧс, вайӧдім пӧрадокӧ. Каньпияныслы выль кӧзяева сюрины, а верстьӧ вӧй пемӧсъяссӧ кодзим да лэдзим уна судтаа ӧти керка пӧдвал дорын. Бур сьӧлӧма йӧз вердышталӧны найӧс.
Дерт, тадзи вӧчӧны оз быд пӧрйӧ, но век жӧ ковмывлӧ, приютыс ӧд абу помтӧм-дортӧм. Вомъёртным шуӧ, «Добрые сердца» пӧ котыртлывлӧ акцияяс, кӧні висьтавлӧны йӧзыслы асланыс удж да быдтасъяс йывсьыс, тшӧтш и гуманитарнӧй да сьӧма отсӧг чукӧртӧны. Вузавлӧны тшӧтш волонтёръяслысь кипом уджъяс, сьӧм весьтас сэсся бергӧдӧны приютлы колана тӧжд-нок.
–Эновтӧм каньыс содӧ некымын помка вӧсна: кодкӧ вӧтлӧ кысӧсӧ дӧзмӧдчӧмсьыс, а кодкӧ и ас кежсьыс шӧйтны лэдзӧ, – висьталӧ Мария. – Миян серти, тайӧс вӧчнысӧ оз позь: каньыс вермас тырсявны да вайсьыны, и пияныс сэсся некодлы нин оз ковны.
Уска-бӧжалы отсӧг
«Кошки за окошком» пемӧс доръян шӧринӧн веськӧдлысь Ирина Буримская тшӧтш висьталіс газетлы асланыс удж йылысь.
–Ми сідзжӧ вӧчам ставсӧ, медым вошӧм да эновтӧм нявзысьясыс аддзисны аслыныс горт. Миян став пемӧсыс олӧны приютын. Талун кежлӧ 111 бӧж. Тшӧкыда котыртлам библиотекаясын аддзысьлӧмъяс, чукӧртам отсӧгсьӧм. Шуам, медся матысса татшӧм рытпукыс лоӧ октябрь 25 лунӧ юркарса шӧр библиотекаын. Но медся уна йӧзыс волӧ Сыктывкарса концертасян залын «Мунам гортӧ!» фестивальяс вылӧ. Бӧръяыс вӧлі октябрь 12 лунӧ, сэсся лоӧ декабрь 14 лунӧ. Нимкодь, мый йӧзыс окотапырысь волывлӧны татшӧм чукӧртчылӧмъяс вылас да аддзӧны позянлун отсавны кысӧяслы. Шуам, октябрь 12 лунӧ фестиваль дырйи воліс 500-ысь унджык морт, аслыныс выль кӧзяеваӧс да горт аддзис 10 нявӧ.
Ирина ёртъясыскӧд отсалӧмаӧсь бурдӧдны да инавны бур киӧ уна уска-бӧжаӧс. Сідз, казьтыштіс Петровичкӧд (тадзи приютсаяс нимтӧмаӧсь каньсӧ) неважӧнся лоӧмтор. Пемӧссӧ аддзӧмаӧсь Гӧрд Затонса вӧрдіысь да вайӧмаӧсь приютӧ. Уска-бӧжалӧн кокыс вӧлӧма вируля доя. Волонтёръяс шыӧдчӧмаӧсь отсӧгла соцсетьын, а чукӧртӧм сьӧм вылӧ бурдӧдӧмаӧсь каньсӧ ветклиникаын. Ӧні Петрович мича да статя, и сылы октябрь 12 лунся фестиваль дырйи сюрӧмаӧсь кӧзяева.
Мый талун колӧ «Кошки за окошком» приютын олысьяслы, позьӧ тӧдмавны ӧтуввезйын https:ӦӦvk.comӦwall-44524251_140378 лист бокын. Торйӧн кӧ, век колӧны улис сёян, дезинфицируйтанторъяс, лӧп-ёг чукӧртан топыд 120 литра пакетъяс да сідз водзӧ. Приютлы пӧсылкасӧ позьӧ тшӧтш вайны «Биос» ветклиникаӧ (Гаражнӧй уличаса 27-ӧд номера керка) да Эжваын Н.М.Дьяконов нима музейӧ (Маяковский уличаса 3-ӧд номера керка).
Мыйла эновтӧны?
Миян лыддьысьысьӧн казьтыштӧм гӧрӧд кузяыс видзӧдласӧн корим тшӧтш юксьыны Коми агропромышленнӧй техникумса педагог, учреждение бердын ветклиникаӧн веськӧдлысь Галина Киселеваӧс.
–Мыйла йӧзыс эновтӧны пемӧсъяссӧ? Чорыд сьӧлӧм да веськодьлун-кывкуттӧм вӧснаыс, – шуӧ Галина Владимировна. – Кор челядь босьтӧны ывлавылысь сюрӧм каньпи, чайтӧны: а мый пӧ и сьӧкыдыс, кисьтан сылы йӧв – и ставыс. Но каньыд – абу чача. А кор верстьӧ морт лӧсьӧдӧ пемӧс, сылы быть колӧ тӧдны-гӧгӧрвоны, мый быдтассӧ оз сӧмын лелькуйтны-меліавны-дӧзьӧритны ковмы, но и унакодь сьӧм видзны. Пистиавны да кодзны-стерилизуйтны, нӧшта на и сылы колана эмбур да сёян ньӧбавны.
Аньлӧн кывъяс серти, каньпияныс кӧ оз кутны ковны, кысукӧс быть колӧ стерилизуйтны. Дерт, кодсюрӧ талы паныдӧсь, но ветклиникаӧн веськӧдлысь шуӧ, операциясьыс пӧ нинӧм лёкыс абу. Сӧмын ковмас каньсӧ мыйкӧдыра дӧзьӧритыштны.
–Ставӧн тӧдам: кодзтӧм-стерилизуйттӧм пемӧсъясыд пасъясьӧны, пышъялӧны гортсьыс, вермасны висьмыны, машина улӧ веськавны, либӧ мукӧд ускӧттьӧ на суас, – висьталӧ Галина Владимировна. – Жаль, но эмӧсь и шогмытӧм кӧзяева, кодъяслы кокньыдджык вӧтлыны нявзысьсӧ сы вӧсна тӧждысьӧм дорысь. Тайӧ нин торъя сёрни. Миян учреждениеным тшӧтш пуктӧ пай гӧрӧдсӧ разьӧмӧ: куим во сайын президентсянь грант весьтӧ дон босьттӧг кодзим-стерилизуйтім 514 пемӧс. Такӧд тшӧтш котыртлім да нуӧдім пемӧсъяс вӧсна тӧждлы сиӧм лекцияяс, экскурсияяс.
Бӧркыв пыдди чуксала пон-кань видзысьясӧс кывкутӧмӧн дӧзьӧритны ассьыныс нёль кока быдтасъяссӧ. А кутшӧмкӧ помка вӧсна кӧ пемӧсыдкӧд кӧсъянныд янсӧдчыны, корсьӧй сылы выль кӧзяеваӧс либӧ сетӧй приютӧ.
Елена Музыкант.
<> Комиӧдіс Елена Плетцер. Снимокъясыс ӧтуввезйысь.