Францияысь нималана лингвист Ив Авриль вуджӧдӧма Каллистрат Жаковлысь «Биармия» поэмасӧ француз кывйӧ. Ассьыс уджсӧ лингвист сиӧма Эльян Авриль гӧтырыслы да Удора районса Слӧбӧда школаӧн веськӧдлысь Анна Кряжевскаялы.
Важся йитӧд
–Ме зэв ёна шензи, кор аддзи, мый гӧтырыс кындзи тшӧтш и меным сиӧма тайӧ уджсӧ. Ме эг заслужит татшӧм ыджыд чесьтсӧ, – сёрниӧ воим да, висьталіс Анна Александровна.
Колӧ пасйыны, Анна Александровна збыльвылӧ отсалӧма Ив Аврильлы вуджӧдчигас, вочавидзӧма кутшӧмсюрӧ юалӧмъяс вылӧ, мый абу вӧлӧма гӧгӧрвоана лингвистлы. А сы пыр жӧ Ив Авриль кутӧма йитӧд туялысьяс Павел Лимеровкӧд да Владимир Абашевкӧд (небӧг дасьтігӧн налӧн уджъясӧн вӧдитчӧма), а сідзжӧ серпасасьысь Павел Микушевкӧд, буретш сылӧн репродукцияыс и мичмӧдӧ небӧг кышӧдсӧ.
Поэма вылас Ив Авриль уджалӧма воысь дырджык.
–Кор да кыдзи тӧдмасинныд Ив Аврилькӧд?
–Зэв нин важӧн. 1988 воын Слӧбӧдаса школаын ми восьтiм Жанна д,Арк нима клуб. Колӧ вӧлі корсьны героиня йылысь гижӧдъяс. Кытысь? И ме гижи письмӧ Францияӧ, кыдз шуласны, «на деревню дедушке». Стӧчджыка кӧ, Руанӧ, кӧні эм Жанна д,Арклӧн музей. Вочавидзис Режин Перну, ученӧй, кодi корсис тайӧ героиня йывсьыс гижӧдъяссӧ. Сiйӧ ыстіс миянлы Жанна д,Арк йылысь уна книга.
Вӧлі тайӧ кольӧм нэмӧ, буретш 90-ӧд сьӧкыд воясӧ. А Режин Перну ыстіс миян челядьлы зэв ыджыд шоколад плитка: 30 кымын сантиметр кузьтанас да пасьтанас. Ёна и дивуйтчим! А радлуныс да шензьӧмыс вӧлі челядьлӧн! Сэки ӧд кодсюрӧ весиг кампетсӧ эз аддзывны! Шоколад плиткасӧ сэсся юклiм став челядьыслы, – казьтылӧ Анна Александровна.
–Буретш Режин Перну менӧ тӧдмӧдiс Ив Аврилькӧд, кодi сiдзжӧ уджалiс Орлеан карын Жанна д,Арк шӧринын, – водзӧ висьталӧ велӧдысь. –Миян челядь сэки ёна письмӧасисны Францияысь томуловкӧд. Ив Аврилькӧд да «Йӧлӧга» журналкӧд ми нуӧдім Жанна д,Арк йылысь кывбур гижӧм кузя республикаса конкурс. Кывбуръяссӧ сідзжӧ вӧлі вуджӧдӧма француз кывйӧ.
А 1997 воын меным мойвиис ветлыны Россияын француз кыв велӧдысьяскӧд Францияӧ семинар вылӧ. Велӧдчим Бурж карын. Ив Авриль Эльян гӧтырыскӧд волісны ме дорӧ. Тӧдмасим, пукалiм кафеын. И, тыдалӧ, буретш сэки Ив Аврильлӧн чужис мӧвп босьтчыны туявны коми кыв. Ив Авриль лэдзис нин коми кыв велӧдӧм кузя учебник. Вуджӧдiс француз кывйӧ Иван Куратовлысь, а сідзжӧ и мукӧд коми поэтлысь кывбуръяс. Найӧ эмӧсь Сыктывкарын Национальнӧй библиотекаын.
Уджтӧгыс оз вермы
Анна Александровна зэв вежавидзысь, пӧсь сьӧлӧма ань да пыдди пуктана морт. Та йылысь быдӧн висьталас. Овлӧ, велӧдысьяс нуӧдлӧны и аслыспӧлӧс анкетаяс. Ӧтчыд Анна Александровна юалӧма, кутшӧм сӧвет пӧ эськӧ меным сетінныд. Кевмӧмаӧсь уна буртор. А ӧти гижӧма, эн пӧ сэтшӧма миян вӧсна майшасьӧй-вийсьӧй.
Чужӧма-быдмӧма Анна Александровна Сыктывдін районса Ыбын. Пединститут помалӧм бӧрын ыстӧмаӧсь велӧдны француз кыв Койгорт районса Ужгаӧ. Но сылы окота вӧлӧм уджавны аслас районын да шыӧдчӧма министерствоӧ. Регыд и сюрӧма местаыс – Часын. Но Анна Александровна сэтчӧ абу веськалӧма. Зіль ань гожӧмнас уджалӧма школаса лагерын, ныв-зонкӧд турун пуктӧма, да урчитӧм кадас абу вермӧма воӧдчыны. Век жӧ Ужгаӧ абу кольччӧма, мунӧма Кӧрткерӧс районса Одыбӧ. Сэні во вит велӧдӧм бӧрын веськӧдчӧма Удораса Слӧбӧдаӧ да сэтчӧ сэсся и вужъясьӧма. Челядьӧс француз кывйӧ велӧдӧмысь ӧтдор комын квайт во директоралӧ. 2002 восянь Слӧбӧдаса школаын француз кыв урок нуӧдӧ Анна Александровналӧн велӧдчысьыс Светлана Остапова.
Сідзжӧ школаын велӧдчысьяскӧд Анна Александровна нуӧдӧ туясян удж, ветлӧ походӧ, велӧдӧ томуловӧс ворсны шахматӧн. Енбиа велӧдысьлысь ним-овсӧ пасйӧма Коми Республикаса челядьлы туризм кузя зарни небӧгӧ.
Котыртӧма Анна Александровна и спорт клуб, история музей. Ныв-зон сылӧн веськӧдлӧм улын пырӧдчӧны «Отечество» ставроссияса туясян конкурсӧ.
Уна вося бур уджысь Анна Александровнаӧс пасйӧмаӧсь республикаса да Россияса почёт грамотаясӧн, эм «Отличник народного просвещения Российской Федерации» морӧсвывса пас. Ыджыд удж вӧчӧма районын депутаталігас. Да и ӧнӧдз сійӧ сьӧлӧмнас висьӧ Удораын олысьяс вӧсна, водзмӧстчӧ «Коми войтыр» ӧтмунӧмын.
Таво йӧзӧдӧма Комиын герой во да, Анна Александровнаӧс удорасаяс шуӧмаӧсь геройӧн жӧ.
<> Екатерина МАКАРОВА. Снимокъясыс Слӧбӧдаса школаысь.