Дзик на неважӧн Улан-Удэын кывкӧрталісны «Чужан кыв да литература медбур велӧдысь» ставроссияса конкурс. Бурятияса юркарын чукӧртчыліс Россияса 87 регионысь сёысь унджык велӧдысь да воспитатель. Коми Республикасянь сэні петкӧдчис да лоис коймӧдӧн Выльгортса 8-ӧд номера детсадйысь кагульнича Анастасия Панычева. Аслас удж да вермӧмъяс йывсьыс ань висьталіс миян газетлы.
Педагог стажыс Анастасия Владимировналӧн дас нёль во, дас кыксӧ зільӧ юрсиктса детсадйын. Конкурс кежлӧ сійӧ дасьтӧма коми кывйӧ зонпосниӧс ворсӧмӧн велӧдан методика подулын торъя уджтас-программа.
—Ордйысигкежлӧ дасьтыси дыр да пыдісянь. Таын ёна отсасисны уджъёртъясӧй. Ыджыд аттьӧ висьтала детсадйӧн веськӧдлысь Валентина Васильевна Пономарёвалы, старшӧй педагогъяс Татьяна Михайловна Цепуновалы, Анна Владимировна Свешниковалы, Наталья Сергеевна Шарыгиналы вӧччан паськӧмӧн да мукӧд коланаторйӧн могмӧдӧмысь. Аттьӧала тшӧтш районса велӧдан управлениеын зільысьяс Лариса Геннадьевна Кулышеваӧс да Валентина Николаевна Чугаеваӧс, — висьталӧ Анастасия Панычева.
Куим лунӧн конкурсӧ пырӧдчысьяслы колӧма унаторйын петкӧдлыны сям-кужанлунсӧ. Нуӧдӧмаӧсь зонпоснилы занятиеяс, мастер-классъяс, бать-мамкӧд сёрнитӧмаӧсь, аддзысьлӧмаӧсь и Россия Федерацияын просвещениеса министрӧс вежысь Ольга Колударовакӧд.
Анастасиялӧн вӧлӧма мог нуӧдны бурят челядьлы коми кывйӧн тӧдмӧдан занятие. И тайӧ сылӧн бура артмӧма — Улан-Удэса зонпосни окотапырысь велӧдчӧмаӧсь тӧдтӧм кывйӧ.
—Ме зіли ышӧдны быд кагаӧс, медым ставныслы вӧлі интереснӧ, — юксьӧ Анастасия Владимировна. — Занятиесӧ сии семьялы, и сы серти челядьӧс тӧдмӧді да велӧді шуавны матысса рӧдвужӧс коми ногӧн: бать, ыджыд бать, мам, ыджыд мам, пи, ныв, котыр… Ныв-зонлӧн ӧдйӧ и артмис шуавнысӧ.
Педагоглӧн висьталӧм серти, конкурсӧ пырӧдчысьяс абу ордйысьӧмаӧсь ӧта-мӧдныскӧд, а отсасьӧмаӧсь ёрта-ёртыслы, ышӧдӧмаӧсь да нимкодясьӧмаӧсь вермӧмъясӧн.
Ставнысӧ найӧс йитӧма чужан кыв да ас культура дорӧ пӧсь муслун. Торйӧн кӧ, Анастасиялы коми кыв радейтӧмыс вуджӧма мамсяньыс, а сідзжӧ и пӧчсяньыс, коді мичаа сыӧн сёрнитӧма. Колӧ пасйыны, Анастасия — сылӧн дас коймӧд внучка.
—Ме чужи да быдми Луздор районса Абъячойын. Ичӧтдырсянь кӧсйи уджавны челядькӧд, весиг лоны врач-педиатрӧн. Но олӧмыс вайӧдіс менӧ Сыктывкарса 2-ӧд номера педколледжӧ, быттьӧ пӧчсянь кывлӧм сьылан-мойдкывъясыс чуйдісны-нуӧдісны сэтчӧ. А сэсся веськалі Выльгортса 8-ӧд номера «Рябинушка» детсадйӧ, кӧні ӧні зіля, — висьталіс ас йывсьыс вомъёртным.
Чужан кывйӧ зонпосниӧс Анастасия велӧдӧ ворсӧдӧмӧн да быдсикас пособиеӧн вӧдитчӧмӧн. Челядь окотапырысь лыддьӧны кывпесанъяс, кывбуръяс, вӧчӧны чуньяслы гимнастика. Таысь кындзи педагог пыртӧ уджас интернет-технологияяс да интерактив ворсӧмъяс.
—Константин Паустовский шулӧма: «Истинная любовь к своей стране немыслима без любви к своему языку». И быдмысь войтырӧс чужан кывъяс колӧ велӧдны буретш ичӧтдырсяньыс. Ӧнія кадӧ йӧзыс ёнджыкасӧ тӧждысьӧны эмлун-сьӧм вӧсна, а меным окота велӧдны мукӧдсӧ пыдди пуктыны да донъявны сійӧс, мый он вермы ньӧбны: дзоньвидзалун, семья, Чужан му, мам кыв, ас вӧр-ва, культура! — тӧдчӧдӧ Анастасия.
Педагог водзмӧстчӧ уна сикас творчествоа котырын: пуктӧ пай челядьӧс коми кывйӧ велӧдан «Пӧль-пӧч кыв — менам кыв» да республикаса ресурс шӧринса мукӧд проект збыльмӧдӧмӧ, Выльгортса посниуловӧс этнокультураӧ велӧдӧмӧ да с.в. Татшӧм ногӧн 8-ӧд номера детсадйыс петіс вермысьӧн «Инновационная деятельность дошкольных образовательных организаций по внедрению модели языкового погружения в изучении коми языка» конкурсын, лои школаӧдзса организацияяс пӧвстын вужвойтыр культура традицияяс видзан гранта конкурсын лауреатӧн.
Анастасия Панычева юксьӧ аслас опыт-сямӧн район да республика тшупӧдын. Петкӧдчылӧма «Ӧта-мӧдкӧд! Друг с другом!» регионкостса да «Ов да выв, коми кыв! Ов да выв, Коми Республика!» уджтасъясын.
Миян гӧстяным — куим челядя шуда мам. Водзмӧстчӧ спортын. Ордйысьӧ детсадса «Позитив» волейболӧн ворсан командаын, сдайталӧ ГТО норматив (эм эзысь пас). Тӧвнас котралӧ лызьӧн, ислалӧ конькиӧн, петкӧдчӧ «Россияса лыжня» акцияын. А нӧшта детсадса «Пелысь тусьяс» группаын велӧдӧ зонпосниӧс мичаа сьывны.
Елена Вишнякова, Сыктывдін р.
<> Комиӧдіс Елена Плетцер. Снимокъясыс Анастасия Панычевалӧн гортса архивысь.