Кулӧмдін сиктын кыпӧдӧны куим судтаа выль поликлиника. Эжва йылын медицина юкӧнын тайӧ медся ыджыд проект. Регионса экономика сӧвмӧдан, промышленносьт да транспорт министерствоысь специалистъяс неважӧн ветлісны видзӧдлыны, кыдзи збыльмӧдсьӧ уджтасыс, да кывкӧрталісны, мый та боксянь некутшӧм мытшӧд-падмӧг абу, став уджыс вӧчсьӧ урчитӧм кадӧ.
Казьтыштам, Кулӧмдінын выль поликлиникасӧ шуӧма стрӧитны Россияса президент Владимир Путинлӧн индӧд серти вынсьӧдӧм «Продолжительная и активная жизнь» нацпроект весьтӧ. Комиын медучреждениеяс кыпӧдӧмкӧд йитӧдын став уджсӧ кутӧ син улас республикаӧн веськӧд-лысь Ростислав Гольдштейн.
Кыдз тыдовтчис Кулӧмдінӧ экономика сӧвмӧдан министерствоысь специалистъяслӧн волігӧн, поликлиникалы кирпичысь выль стрӧйбасӧ кыпӧдӧмаӧсь нин да босьтчӧмаӧсь мӧд судтаас ӧшиньяссӧ стеклӧавны, вевт вылас зэр-слӧтысь видзчысян содтӧд эжӧд вольсавны, электрокабельяс нюжӧдны да вентиляция оборудование лӧсьӧдны.
Став уджсӧ помавны урчитӧма тавося декабрӧдз.
Тайӧ поликлиникаыс лоас Эжва йывса сикт-грезд-посёлокын олысьяслы збыльысь зэв ыджыд козинӧн. Луннас сэтчӧ врачьяс дорӧ вермас шыӧдчывны куимсё гӧгӧр морт, а педиатръяслӧн лоас позянлун примитны ветымынысь унджык зон- посниӧс.
Выль бурдӧдчанінас лоӧ восьтӧма югӧра диагностика, рентген, маммография да эндоскопия вӧчан отделениеяс, ӧнія кадся флюорографа да компьютера томографа кабинетъяс, хирургия, а сідзжӧ челядьлы бурдӧдчан да диагностика вӧчан жыръяс.
Тӧдчана, мый выль поликлиникаас лоас позянлун ӧтилаын сетны Кулӧмдін районын став олысьыслы колана медицина отсӧг да, дерт жӧ, налы тӧдчымӧн кокниджык лоӧ шыӧдчыны сійӧ либӧ мӧд врач-специалист дорӧ.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.