Кӧч тӧлысь – Выль во кодь. Выльмӧ вӧр-ва, олӧм, велӧдчӧм, удж. И ми тшӧтш бӧрӧ ог кольччӧй: ыджыд вынӧн да эскӧмӧн босьтчам збыльмӧдны ассьыным проектъяс. Неважӧн педагогика наукаса кандидат Зоя Васильевна Остаповакӧд сёрнитiм школаӧдз велӧдӧмын национальнӧй мытшӧдъяс венан лаборатория йылысь. Сійӧс комын во сайын вӧлі котыртӧма велӧдысьяслысь тӧдӧмлун кыпӧдан институтын. Медводз лыддьӧй сёрнинымӧс «Коми му» газетысь, а сэсся видзӧдӧй видеосӧ ставнас куар-код серти.
–Зоя Васильевна, кыдзи артмис лабораторияыс?
–Ме кӧсъя висьтавны, мый лабораторияным артмис водзджык на, позьӧ шуны, 40 во сайын нин. Кор ме локтi Комиӧ уджавны, то меным индiсны татшӧм нырвизь: туявны сиктса детсадъясын уджсӧ, нуӧдны сэні зільысьяслы курсъяс да семинаръяс. И сэки нин ме водзӧ вӧлі сувтӧдӧма мог дасьтыны ставсӧ коми национальнӧй детсадъяслы вылӧ. И, дерт жӧ, сэки ми кутiм вӧчны уна сикас удж, дасьтім медводдза коми программа. Коми небӧг лэдзанінын петiс «Ичӧт челядьлы лыддьӧм вылӧ книга», а дас вит во мысти сы подулын чужис «Вильышпоз» хрестоматия. И век вӧлi окота, медым миян лоис торъя уджаланiн. Тайӧ кӧсйӧмным збыльмис и дас во мысти.
Лабораториясӧ восьтiм 2-ӧд номера педколледжын, зэв ыджыд аттьӧ таысь велӧдчаніннас веськӧдлысь Евгений Васильевич Исаковлы, кодi эскис миянӧ да гӧгӧрвоис тайӧ уджыслысь коланлунсӧ. Зілим сэні квайтӧн: Ольга Ивановна Рочева, Татьяна Анатольевна Москвина, Людмила Анатольевна Ракитина, Раиса Сергеевна Малыгина, Светлана Вадимовна Головина да ме. Уджас зэв азыма босьтчим.
–Шӧр могыс кутшӧм вӧлi?
–Миянлы быть колiс видлавны детсадъясын мытшӧдъяссӧ, вӧчны ставсӧ, медым коми челядь вӧлiны шудаӧсь. А кор найӧ шудаӧсь? Кор сьылӧны, ворсӧны, петкӧдлӧны мойдъяс… Воспитательяс сэки вӧдитчисны роч кывъя методикаӧн, дзолюкъяскӧд сёрнитісны рочӧн, и сиктса детсадйын кыліс кыдъя коми-роч сёрни. А миян могыс вӧлi диалектъяс видзӧмӧн челядьӧс ичӧтсяньыс тӧдмӧдны литература коми кывйӧн.
Сійӧ кадас унаӧн вӧлі эновтчӧны став комисьыс, чужан кывсьыс, а ми асланым уджӧн петкӧдлiм ас кывлысь коланлунсӧ. Кадыс збыльысь вӧлi сьӧкыд, но ми ыджыд кӧсйӧмӧн босьтчим тайӧ уджас, мед коми кывсӧ пыдди пуктiсны. Таын зэв ёна отсаліс миянлы «Коми войтыр» ӧтмунӧм.
–Со мый миянлы гижӧ том мам: «Бур, кор школа-садйын сёрнитӧны комиӧн. Менам верӧсӧй да сылӧн ай-мамыс рочӧсь, быдтам нылукӧс. Кор заводитiс сёрнитны, ми сыкӧд дженьыд коми кывъяс велӧдiм: ва, му… Ворсігмоз эськӧ и велӧдім, но эз велав. А кыдзи ме ӧні сизим арӧса кагакӧд верма велӧдны коми кывсӧ Сыктывкарын? Окотитӧмӧй эм, но велӧдан сямӧй абу. И татшӧм серпасыс, видзӧдлыны кӧ, уна семьяын. И оз позь мамъясӧс мыждыны, мый найӧ оз вермыны асьныс челядьнысӧ велӧдны чужан кывъяс, кор ставныс гӧгӧр рочасьӧны». Мый та вылӧ шуанныд?
–Збыль, кыв велӧдӧмыд – абу кокни удж. Коми кывйыс вужъясьӧ сӧмын сэк, кор сыӧн сёрнитӧны. И зэв сьӧкыд овлӧ, босьтан кӧ ас вылад мог велӧдны кагуктӧ комиӧн, кор верӧсыд роч, и семьяад быть лоӧ сёрнитны рочӧн. Но эм татшӧм технология: «Один родитель – один язык». Сідзкӧ, коми мамлы кага чужӧмсяньыс пыр колӧ сёрнитны сыкӧд комиӧн (мам кыв), а роч верӧслы – рочӧн (бать кыв). Медым ичӧт мортлы окота лоис сёрнитны кык кывйӧн, сы гӧгӧр мед вӧліны комиӧн варовитысь сы арлыда жӧ челядь. И та понда бур эськӧ вӧлi, медым Сыктывкарын лоис ворсанін, кытчӧ позьӧ волыны быд кадӧ да сёрнитны сӧмын комиӧн.
А тайӧ мамыслы вӧзъя медводз велӧдны нылыскӧд неыджыд кывбуръяс, тӧдмасьны лыдпасъясӧн – медводз дасӧдз мед кужис висьтавны, а сэсся и водзӧ, ӧта-мӧдкӧд чолӧмасьны, аттьӧавны, уна мойд лыддьыны (нылыслы гӧгӧрвотӧм на кывъяссӧ вуджӧдӧмӧн). Эм методика, сӧмын оз ков дышӧдчыны. Быд кыв велӧдiгӧн тэ кӧ кызь час чӧж он казьтыв выль кывъяссӧ, ковмас ставсӧ выльысь велӧдны.
–Ангелина Смирнова юасьӧ: «Ыджыд аттьӧ Зоя Васильевналы сылӧн уджысь, а торйӧн нин аттьӧала «Вильышпоз» небӧгысь. Дзолядырйи сійӧ менам медрадейтана небӧг вӧлi, a ӧнi нин менам челядьлӧн. Кодi тiянӧс вайӧдiс-туйдiс тайӧ уджас?».
–Чайта, ачыс Енмыс туйдiс менӧ тайӧ уджас. Меным, дерт, мойвиис, мый ме гӧгӧр вӧлiны зэв бур велӧдысьяс, творческӧй йӧз. Медводдза велӧдысьӧй – Коми АССР-са заслуженнӧй учитель Раиса Павловна Шелепанова. Сэсся Россияса народнӧй учитель Ангелина Михайловна Захаренко, Шойнаты школаса директор. Сергей Лукич Куликов – зэв прамӧй да вежавидзысь морт, кывбуръяс да сьыланкывъяс гижліс, коми кыв велӧдысь Татьяна Ивановна Королёва.
Ӧтчыд Сергей Лукич гортӧ звӧнитiс да шуис, районсянь пӧ тшӧктӧны мӧдӧдны Горький карса пединститутысь «Школаӧдзса педагогика да психология» факультетӧ велӧдчысьӧс, мед пӧ эськӧ Зояныд сэтчӧ мунас. Но ме таӧдз некор эг мӧвпыштлы, мый лоа дошкольнӧй юкӧнын уджалысьӧн, мый нӧ сэнi посни челядьыскӧд позьӧ вӧчны! Кӧсйи серьёзнӧй профессия босьтны. Но – вӧлі кывзысьысь мортӧн. Ӧнi серам, а сэки меным ставыс вӧлі гӧгӧрвотӧм…
–Зоя Васильевна, медводдза ыджыд уджтасъяс йывсьыд окота тӧдмавны.
–Кор сӧмын на восьтiм лабораториясӧ, зэв бур мӧвп миянлы воис: ӧтлаӧдны уджнымӧс «Коми гор» телерадиокомпаниякӧд. Медводз лӧсьӧдiм «Дзолюк» радиопередача, сценарийяс дасьтыліс Ольга Ивановна Рочева, редакторӧн вӧлi Наталья Дмитриевна Макарова. И тайӧ кык аньыс вӧчисны зэв уна, медым быд сикт-грездын юргис коми кыв. Бӧрынджык сценарийяссӧ босьтчис гижны Вера Александровна Муравьёва, а редакторнас лоис Галина Вениаминовна Ведерникова. Нӧшта миян артмис «Кекӧнач» телепередача, сійӧ ӧнӧдз на эм, но петӧ «Юрган» телеканалын нин да шусьӧ «Чолӧм, дзолюк!». Тӧлысьнас кыкысь петан передачаса режиссёрыс Марина Юрьевна Кузьчуткомова.
–Неважӧн тӧдмалi, мый буретш Коми Республика вӧзйис пыртны чужан кыв велӧдысьяслӧн Россияса конкурсӧ тшӧтш и кагульничаяс костын вермасьӧм. Кор да кыдзи артмис тайӧ?
–Куим во сайын миян институтӧн веськӧдлысь Галина Владимировна Китайгородскаякӧд аддзысьлiм Россияса чужан кывъяс туялан институтса веськӧдлысьяскӧд. Сэки чужан кыв велӧдысьяс пӧвстын конкурссӧ нуӧдӧны нин вӧлi, да ми вӧзйим ышӧдны тшӧтш и чужан кыв велӧдысь воспитательясӧс. Медводдза конкурсас Сыктывкарысь Надежда Мальцева шедӧдіс коймӧд места, кольӧм во Зеленечысь Виолетта Бабикова лоис лауреатӧн, а таво Выльгортысь Анастасия Панычева бара коймӧд места босьтіс. Кута лача, коркӧ лоас и медводдза места, и сэки конкурссӧ нуӧдасны миянын, Комиын!
–Кольӧм во тiян команданыд дасьтіс «Ворс да сёрнит» веб-сайт. Сійӧ уналы лӧсялас: мам-батьлы, велӧдысьлы, кагульничалы бара жӧ. Но ті ӧд та кындзи унатор на удитанныд…
–Эм миян «Школа игропедагогики «Дзолюк-малышок» брендӧвӧй проект. Сэтчӧ ми корам ог сӧмын челядькӧд комиӧн сёрнитысьясӧс, а быдӧнӧс, кодi велӧдӧ дзолюкъясӧс тӧдны да радейтны коми культура. Нӧшта миян эм «Шуда челядьдыр коми сёрни пыр» фестиваль, сэнi некымын нимпас, и бара жӧ быдӧн вермас пырӧдчыны сэтчӧ.
–Тӧда, мый ті зіля пырӧдчанныд тшӧтш и гранта конкурсъясӧ. Кор медводдзаысь босьтчинныд тайӧ уджас, да кутшӧм кывкӧртӧд позьӧ нин вӧчны?
–Эм уна мӧвп, и найӧс быть колӧ пӧртны олӧмӧ, корсьны та могысь сьӧм, тшӧтш и грантъяс отсӧгӧн. Медводз ми дасьтiм «Фонохрестоматия челядьлы кывзӧм вылӧ: музыка да литература» проект, уджалiм сэки Финляндияысь фондкӧд. Ӧні корсям Россияса да регионса грантъяс, дерт, оз век артмы тайӧ. Медводз сы вӧсна, мый котыртысьясыс виччысьӧны дзик выль водзмӧст-чӧмъяс, а ми ӧти и сійӧ жӧ проектъяссӧ паськӧдам да выльмӧдам.
–Зоя Васильевна, а мыйджык эз на артмы, эн на вермӧй пӧртны олӧмас?
–Ме нин висьталi, кор мамлы вочавидзи коми кыв велӧдӧм йылысь: колӧ эськӧ вӧчны коми кывъя «Дзолюк» шӧрин, кӧнi челядьлы позяс петкӧдлыны асьсӧ, комиӧн сёрнитны. Мед эськӧ сэнi вӧлiны и миян лаборатория, и звуко- да видеостудияяс, сценаа зал, кӧні позяс челядькӧд дасьтыны спектакльяс. И мед сулалiс сійӧ Сыктывкар шӧрын! И мед быдӧн, кодi сiйӧс аддзас, юалiс: «Тайӧ кодлы?». И кыліс вочакыв: «Тайӧ коми челядьлы!». Окота татшӧмсӧ вӧчны, но эз на артмы.
–Вера Муравьёвасянь шоныд кывъяс воисны: «Зоя Васильевна! Чолӧмала! Лаборатория – тіян кагук, тіян быдтас! Уна и бур да коланатор вӧчӧма тайӧ кадколастнас! Кутшӧм выль пособие матысса каднас тіянсянь кутам виччысьны? Зэв ыджыд аттьӧ!».
–Да, миян планын эмӧсь татшӧм пособиеяс. Тайӧ и коми кыв велӧдан программа, и физкультураысь, математикаысь методика боксянь индӧдъяс. Эм мый вылын уджавны!
–Аттьӧ, Зоя Васильевна! Мунам водзӧ! Сиа тіянлы уна вын да эскӧм, мый ӧтув ми ставсӧ вермам!
<> Инесса Орёл. Снимокыс Виктор Кутькинлӧн.