Изьва районса Красноборысь Светлана Терентьевалы 29 арӧс. Чужлӧма сійӧ Діюр грездын. Помалӧма Коми Республикаса госслужба академия, а сы бӧрын Москваса юридическӧй академияын магистратура. Уджалӧма Изьва районса администрацияын. 2021 вося ноябрсянь веськӧдлӧ Краснобор сиктса овмӧдчӧминӧн.
Неважӧн Светлана Терентьева дорйӧма диплом президент академияса «Мэр школаын». Велӧдчыны сэтчӧ босьтӧны сӧмын вуз помалысьясӧс, кодъяс этша вылӧ кык во зільӧмаӧсь веськӧдлан тэчасын.
«Мэр школаын» 2024 вося октябрсянь 2025 вося июньӧдз велӧдчигӧн Светлана Терентьева тӧдмасьӧма Россия пасьталаысь муниципалитетъясын уджаланногӧн.
–Быд регионын миянкӧд аддзысьлісны губернаторъяс да мэръяс, вочавидзисны миян юалӧмъяс вылӧ да унаысь тӧдчӧдлісны, вӧчны позьтӧмыс пӧ нинӧм абу. А велӧдчӧмнымӧс помалім Москваын «Сенеж» веськӧдлан мастерскӧйын, – висьталіс Краснобор овмӧдчӧминӧн веськӧдлысь. – Миян том йӧз оз эновтны чужанінсӧ, кольччӧны сиктӧ, и ас керка кыпӧдӧм улӧ мусӧ налы торйӧдам вӧвлӧм видзьяс вылын, кӧні туйясыс некор эз вӧвны, да найӧс колӧ на лӧсьӧдны. Краснобор сикт улын вит грезд, помсянь помӧдз артмӧ кызь кымын километр. Туйясыс жӧ нюжалӧны квайтымын километрысь унджык. Та вӧсна туйяс дзоньталӧм кузя юалӧмсӧ и видлалі диплом уджын.
Велӧдчигӧн босьтӧм тӧдӧмлуныс ковмас Светлана Терентьевалы и уджалігас. Сідз, сійӧ кӧсйӧ лӧсьӧдны «туй» чат, медым сиктын олысьяс ӧдйӧ вермисны юӧртны гӧп-гуранъяс, лым толаяс йылысь.
Красноборсаяс ошкӧмаӧсь сылысь и мӧд вӧзйӧм – пырӧдчыны «Том Сойер Фест» ставроссияса ӧтмунӧмӧ. Сэні водзмӧстчысьяс асланыс кар-сиктас дзоньталӧны важ стрӧйбаяс. История боксянь тӧдчана стрӧйба кӧсйӧны дзоньтавны и Красноборын.
Сентябрь 24 лунӧ президент академия помалыськӧд аддзысьліс республикаса юралысь Ростислав Гольдштейн.
–Медым сӧвмӧдны регионъяс, колӧ дасьтыны тӧлка веськӧдлысьясӧс, и «Мэр школаын» босьтӧм тӧдӧмлунтӧ ті дасьӧсь пыр жӧ пыртны уджад, медым бурмӧдны ас сиктсалысь олӧмсӧ. А ми таын отсалам тіянлы, – эскӧдіс Светлана Терентьеваӧс республикаӧн веськӧдлысь.
<> Гижӧдъяссӧ дасьтіс Павел Симпелев. Снимокъясыс ӧтуввезйысь.