Ломтысян да шоныд сетан кад кежлӧ дасьтысьӧм йылысь сёрни вӧлі регионса правительстволӧн чукӧртчылігӧн, кытчӧ корлісны и муниципалитетъясӧн юрнуӧдысьясӧс.
Кыдзи юӧртіс правительствоӧн веськӧдлысьӧс вежысь Эдуард Слабиков, август 14 лунӧдз дасьтӧма 5.319 керка (урчитӧмсьыс 70 прӧчент), 231 котельнӧй (67%), 1.603 километр шоныд сетан труба (83 прӧчент), 2.156 километр ва труба (80%), 1.432 километр канализация труба (80%).
Заптӧма и ломтас: 61 сюрс тонна из шом (индӧмсьыс 109,6 прӧчент), 26 сюрс тонна мазут (121,9%), 3.390 тонна пес, чаг да брикет (41,24 прӧчент). Сэк жӧ ылі районъясӧ колана мында ломтассӧ абу на вайӧма. Сідз, Чилимдін районын ломтассӧ дасьтӧма коланасьыс сӧмын 59 прӧчентсӧ.
Эдуард Слабиковлӧн кывъяс серти, вермас лоны, ӧткымын районын олан керкаясӧ да мукӧд стрӧйбаӧ шоныдсӧ сетасны сёрмӧмӧн.
Воркутаын да Вуктылын ньӧжмыда вежӧны важмӧм трубаяс, найӧс колӧ выльмӧдны и Синдор посёлокын. Емваын абу дзоньталӧмаӧсь пуысь плита вӧчан заводлысь котельнӧй, ёна важмӧмаӧсь Удораса Междуреченскын да Микунь карын котельнӧйяс, Ярегаын абу ладмӧдӧмаӧсь ва шоныд туялан аппаратура. Улыс Одесын колӧ дзонтавны ва весалан станция.
Кыдзи венӧны тайӧ мытшӧдъяссӧ, юӧртісны кар-районӧн веськӧдлысьяс. Вуктылысь Наталья Новикова висьталіс, мый уна патераа керкаясын мыськалӧны шоныд сетан трубаяс, кӧдзыдъяс кежлӧ дасьтӧны нёль муниципальнӧй да ӧти ведомственнӧй котельнӧй. Медыджыд падмӧгъясыс пӧ Вуктылса шӧр котельнӧйын, сійӧс нелямын вит воысь нин дырджык уджӧдӧны да. Биыс кӧ пӧ оз ло, кӧдзыдъяс дырйи карын олысьяс вермасны кольны ватӧг да шоныдтӧг.
«Коми коммунальные технологии» компанияса директор Магомед Османов эскӧдіс, Вуктылӧ пӧ регыд ваям дизель-генератор да би кусігӧн сійӧс кутам уджӧдны. Кӧсйысис сійӧ дзоньтавны и карса шӧр котельнӧй.
Княжпогост районса юрнуӧдысь Анатолий Немчиновлӧн висьталӧм серти, Синдорын шоныд сетан трубаяссӧ вежӧны хозспособӧн, а Емва заводса котельнӧйын сувтӧдӧны выль пӧрт.
Удора районын босьтчӧмаӧсь вӧчны чаг, Улыс Одесын ва весалан станция дзоньталӧм могысь виччысьӧны республикаса правительствосянь субсидия.
Медся надзӧн вежӧны шоныд сетан важмӧм трубаяссӧ Воркутаын. Карса мэр Игорь Гурьевлӧн кывъяс серти, тадзи лоис сы вӧсна, мый воддза сезонын шоныдсӧ дугдісны сетны июль 2 лунӧ, а август 27 лунсянь Воркутаса 2-ӧд номера ТЭЦ-лы да «Северные тепловые сети» компаниялы бара нин ковмас могмӧдны йӧзсӧ шоныднас. Позьӧ пӧ эскыны, мый теплоэлектроцентральын тӧв кежлӧ дасьтысьӧмын падмӧгъясыс оз лоны, а «Северные тепловые сети» муниципальнӧй предприятие планын индӧм шоныд сетан 400 метр трубаысь дзоньталӧма 110 метр – 27 прӧчентсӧ сӧмын. Медым эштӧдны уджсӧ, карса администрация корӧма Коми Республикаса резерв фондысь сьӧм.
Регионса бюджетысь Воркуталы торйӧдӧмаӧсь 108 миллион шайт. Тайӧ сьӧм вылас ньӧбасны «Северные тепловые сети» компанияса котельнӧйясӧ из шом да «Воркутаса водоканал» предприятиеын дзоньтасян удж вӧчны коланасӧ.
«Северные тепловые сети» муниципальнӧй предприятиеын вот мынтан уджйӧзыс артавсьӧ 240 миллион шайт. Чӧжсьӧма сійӧ абу ӧти воӧн.
2017 воын предприятиеыслы вӧлі вуджӧдӧма нёль муниципальнӧй котельнӧй, и дзоньтавны найӧс ковмӧма уна сьӧм.
«Северные тепловые сети» МУП-лы уна – 300 миллион шайт – уджйӧзалӧма «Воркутаса водоканал» ООО. И сьӧм тырмытӧм вӧсна предприятиеыс ӧні оз вермы заптыны колана мында ломтас да тыр-бура дасьтысьны тӧв кежлӧ. Отсӧгыс воӧ сӧмын республикаса да карса резерв фондъясысь.
Республикаса правительствоын чукӧртчылігӧн Игорь Гурьев висьталіс, 2024 вося сентябрын пӧ «Воркутаса водоканал» ООО-лысь став эмбурсӧ вӧлі вуджӧдӧма выльӧн лӧсьӧдӧм «Воркутаса водоканал» МУП-ӧ. Но и сійӧ пӧ вермас лоны банкротӧн – предприятиеыслысь перйӧны 156 миллион шайт уджйӧзалӧм вот. Карын олысьяс оз жӧ ас кадӧ вештысьны ваӧн могмӧдӧмысь, абу мынтӧмаӧсь 90 миллион шайт.
Кыдзи пасйис Воркутаса мэр, шоныд сетан кад кежлӧ дасьтысян уджсӧ «Воркутаса водоканал» вермас вӧчны, республикаса резерв фондысь кӧ вичмӧдасны сылы сьӧм.
* * *
Регионӧн веськӧдлысь Ростислав Гольдштейн тшӧктіс кар-районӧн юрнуӧдысьяслы тырвыйӧ да сёрмытӧг пӧртны олӧмӧ тӧв кежлӧ дасьтысян могъяс.
–Воркута – миян войвыв юркар. И шоныднас сэні олысьясӧс колӧ могмӧдны ас кадӧ, – шуис республикаса юралысьлысь удж вӧчысь да индіс правительствоӧн веськӧдлысь Дмитрий Братыненколы да сійӧс вежысь Эдуард Слабиковлы торйӧн бур видзӧдны, кыдзи Воркутаын вӧчӧны тӧв кежлӧ дасьтысян уджсӧ.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.