Турбизнесын зільысьяслӧн Коми Республикаса юралысьлысь удж вӧчысь Ростислав Гольдштейнкӧд аддзысьлігӧн видлалісны регионын туризм юкӧнын мытшӧдъяс да сійӧс сӧвмӧдны позянлунъяс.
–Миянлы колӧ ӧтув лӧсьӧдны-урчитны республикаын туризм сӧвмӧдан уджтас, медым татчӧ волыны окотитысьыс содіс. Ӧні йӧзыс пырджык бӧрйӧны мукӧд регионъяс, шуам, Алтайӧ ли Териберкаӧ веськӧдчӧны. А колӧ, мед туристъяс миянлань видзӧдчисны, зілисны Комиӧ веськавлыны. Унджыкӧн воласны – унджык и нажӧвитам, – сёрнисӧ панігӧн тӧдчӧдіс регионӧн веськӧдлысь.
Чукӧртчӧмаяс тӧдчӧдісны, талун пӧ йӧзыслы абу тырмымӧн бипур дорын палаткаын шойччыны, найӧ кӧсйӧны нимкодясьны вӧр-ваӧн да тшӧтш и тӧдмасьны культура озырлун-аслыспӧлӧслунӧн.
«Ёляты» семьяӧн шойччан парк лӧсьӧдысь Иван Дегтярёвлӧн видзӧдлас серти, туръяс котыртігӧн колӧ дасьтыны путешествуйтысьяслы шойччӧм могысь став коланасӧ. Та дырйи медсясӧ ас вылӧ лача кутны, а оз государствосянь субсидия виччысьны.
Ростислав Гольдштейн вӧзйис шойччан лунся туръяс пыдди ышӧдны туристъясӧс коллявны тані унджык кад, а та могысь мед вӧлі гӧсьтъяслы и аэропорт, и гостиница, и нуръясянін, и прӧст кадсӧ лючки котыртны.
Коми Республикаса вузасян-промышленнӧй палатаса вице-президент Елена Катаева корис мӧд ногджык видзӧдлыны вужвойтырлӧн нэмӧвӧйся традиция-оласног вылӧ. ТПП пӧ котыртліс нин Комиын районъясӧ сёян-юанӧн тӧдмасян некымын экспедиция. И, шуам, ляз кодь сёяныс пӧ весиг вермас лоны республикаса визитнӧй карточкаӧн.
«Кедр Глэмп» гӧститан комплексӧн веськӧдлысьясысь ӧти Алексей Гарштя ас пайсьыс висьталіс, турбизнессалӧн пӧ талун эмӧсь зэв бур мӧвп-вӧзйӧмъяс, да йӧзыс тшӧкыда мунӧны предпринимательяслы паныд, оз лэдзны збыльмӧдны кӧсйӧмсӧ.
Та вылӧ регионӧн веськӧдлысь вочавидзис, йӧзыскӧд пӧ быть колӧ сёрнитчыны-воӧдчыны ӧти кывйӧ.
Ростислав Гольдштейн тшӧтш пасйис, регионын пӧ колӧ вочаавны и котырӧн-массӧвӧя волысьясӧс, и дзик аслыспӧлӧс услугаысь-эксклюзивысь мынтысьны дась туристӧс. А турбизнессалы ӧта-мӧдкӧд венласьӧм пыдди ёртасьны уджаныс.
–Вайӧ ӧтвылысь мӧдам сӧвмӧдны туризмсӧ, – чуксаліс чукӧртчӧмаясӧс регионӧн веськӧдлысь. – Сӧмын ӧтув зільӧмӧн ми вермам вӧчны республиканымӧс став туристыслы веж петкӧдланаӧн да эскӧдны, мый Комиын мукӧдлаын дорысь медся на бур да лӧсьыд.
Республикаса правительство пӧ тшӧтш вӧчӧ та могысь став позянасӧ. Торйӧн кӧ, талун нин сёрнитчам Мариинскӧй театрса генеральнӧй директор Валерий Гергиевкӧд регионын театрса филиал восьтӧм кузя – тайӧ тшӧтш ышӧдас унджык туристӧс волыны Комиӧ.
<> Гижӧдсӧ дасьтіс Елена ПЛЕТЦЕР. Снимокъясыс ӧтуввезйысь.