Август 25 лунӧ, выль велӧдчан во водзын, республика пасьталаысь учительяс чукӧртчылісны педсӧвет вылӧ.
–Ті кывкутанныд 178 сюрс томулов вӧсна, быд лун велӧданныд найӧс да туйданныд лоны бур йӧзӧн. Уджӧн ӧтувтӧм семьяаныд тіян 30 сюрсысь унджык морт, на лыдысь 15 сюрсыс – педагогъяс. Быд велӧдысь – миян странаса аскиа лунлӧн архитектор. Ті быдтанныд найӧс, кодъяс некымын во мысти нин кутасны бӧрйыны, кутшӧмӧн лоас олӧмыс Коми Республикаын да Россияын. И тіян сайын, кутшӧм йӧзӧн лоасны миян челядь, – татшӧм кывъясӧн шыӧдчис педсӧвет вылӧ чукӧртчӧм велӧдысьяс дорӧ республикаса юралысьлысь удж вӧчысь Ростислав Гольдштейн.
Республикаса правительство водзын пуктӧм медтӧдчана могъясӧн Ростислав Гольдштейн пасйис выль школаяс да детсадъяс кыпӧдӧм. Таво выль школа воссяс Изьва сиктын, а Печора районса Озёрнӧй посёлокын – выль детсад. Изьва районса Бакурын ичӧт нывкаяс да детинкаяс ветлӧны нин сӧмын на лэптӧм челядь видзанінӧ. 2027 воӧ восьтас ӧдзӧссӧ Сыктывкарса Тентюков уличаын выль школа.
Комиын збыльмӧдӧны и школаяс капитальнӧя дзоньталан программа. 2025 восянь сэтчӧ пыртӧма и техникум-колледжъяс, а локтан восянь программаас веськаласны и детсадъяс. Таво дзоньтасян уджсӧ вӧчӧны 25 школаын да ӧти техникумын, 2026 воӧ босьтчасны дзоньтавны нӧшта 20 школа, ӧти детсад да ӧти техникум.
«Профессионалитет» федеральнӧй уджтас серти Комиын лӧсьӧдӧны регионса экономикалы медся колана специалистъясӧс дасьтан кластеръяс. Сыктывкарса лесопромышленнӧй техникумын уджалӧ «Вӧр промышленносьт» кластер, а Сыктывкарса автомеханическӧй техникумын кластерыс воссяс сентябрь 1 лунӧ.
Комиысь 14 прӧчент школаын сетӧны бур тӧдӧмлун. Республикаса ныв-зон шедӧдӧны школьникъяслӧн олимпиадаясын, Россияса да регионса конкурсъясын вермӧмъяс, быд во кызь витысь унджык выпускник сдайтӧ ӧтувъя госэкзаменсӧ 100 балл вылӧ.
Ӧні колледжъясысь 82 да вузъясысь 75 прӧчентыс велӧдчӧм помалӧм бӧрас аддзӧны аслыныс удж. Челядь да томулов водзмӧстчӧны и общественнӧй олӧмын. Сідз, «Движение первых» ӧтмунӧмӧ таво пырӧдчӧмаӧсь кызь сюрсысь унджык ныв-зон.
Педагогъяс костын федеральнӧй конкурсъясын вермысьлы ӧні сетӧны 200 сюрс шайта, а республикаса тшупӧдын 1 места шедӧдысьлы – 100 сюрс шайта премия. Ростислав Гольдштейн вӧзйис йӧзӧс велӧдан министерствоӧн веськӧдлысь Наталья Якимовалы вит пӧв содтыны премияяссӧ.
Но велӧдан юкӧнын эмӧсь и мытшӧдъяс. Торйӧн кӧ, оз тырмы педагогыс. Медся ёна тайӧ майшӧдлӧ Сыктывкарын, Ухтаын, Печораын. Тайӧ падмӧгсӧ венӧм могысь том специалистъяслы удждон дорас содтӧд мынтӧны. «Земский учитель» программа серти 2020 восянь республикаса школаясӧ уджавны воис 49 велӧдысь, нӧшта квайт педагог локтас таво.
–Выль велӧдчан во водзын сиа учительяслы, бать-мамлы, школьникъяслы, студентъяслы бура велӧдчӧмнас да уджын вермӧмъяснас петкӧдлыны, мый Коми Республикаын медбур педагогъяс да велӧдчысьяс, – висьталіс Ростислав Гольдштейн.
Республикаса педсӧвет дырйи уна вося бур уджысь В.П.Налимов нима Выльгортса 2-ӧд номера школаысь математик Светлана Васильевна Косолаповаӧс пасйисны «Отличник просвещения» знакӧн, «Россия Федерацияса йӧзӧс велӧдан юкӧнын почёта уджалысь» ним сетісны Кӧрткерӧс районысь Пӧдтыбокса школаын география да обществознание велӧдысь Татьяна Александровна Баваевалы, Микуньса 1-ӧд номера школаын преподаватель-организатор Наталья Христафоровна Ермаклы, Сыктыв районысь И.П.Морозов нима Межадорса школаын коми кыв велӧдысь Ирина Алексеевна Чумаковалы, Сӧветскӧй Союзса Герой И.П.Горчаков нима Поёлса школаын химик-биолог Татьяна Леонидовна Ломановалы, Коми Республикаса юралысь бердын Ю.А.Спиридонов нима искусство гимназияысь педагог-организатор Любовь Николаевны Малыхлы, Сыктывкарса 40-ӧд номера школаысь ичӧт классъясын велӧдысь Людмила Александровна Шевченколы.
«Коми Республикаса заслуженнӧй уджалысь» ним сетісны Сосногорскысь 3-ӧд номера школаын история да обществознание велӧдысь Ирина Николаевна Волковалы, «Коми Республикаса йӧзӧс велӧдан юкӧнын почёта уджалысь» ним – Сыктывдін районса Выльгортысь 10-ӧд номера детсадйӧн веськӧдлысь Марина Владимировна Осиповалы. Педсӧвет дырйи почёт грамотаясӧн пасйисны и мукӧд водзмӧстчысь велӧдысьӧс.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.