Июль 28 лунӧ мир пасьталаын пасйисны Виж висьӧмлы (гепатитлы) паныд водзсасян-тышкасян лун.
Коми Республикаын мӧйму 25 морт кӧвъялӧма А гепатит вирус. Кыдз юӧртӧ Роспотребнадзор, Россияын серти миян регионын тайӧ пӧрӧснас нёрпалысьыс дас прӧчентӧн унджык.
Медсясӧ висьӧны карсаяс. Сідз, юркарын татшӧмыс дас, Ухтаын – ӧкмыс, Воркутаын – нёль, Сыктывдін районын да Усинскын – ӧтиӧн.
Мыйсяма тайӧ висьӧм, кыдзи сыысь видзчысьны да, кӧвъясис кӧ нин, позьӧ-ӧ мынтӧдчыны?
Тайӧ да мукӧд юалӧм вылӧ республикаса юралысьлӧн Общественнӧй приёмнӧйын вочавидзис республикаса инфекция больничаысь гепатология шӧринӧн веськӧдлысь, врач-инфекционист Анастасия Новикова.
–Анастасия Викторовна, мыйсяма тайӧ пӧрӧс, да уна-ӧ Комиын нёрпалысьыс?
–Мускыд вермас висьны уна помка вӧсна, оз сӧмын гепатитысь.
Ми медсясӧ тӧдам А, В, С, D да E гепатит йылысь. Но врачьяс туялӧны вируса 21 сикас татшӧм висьӧм. Е шыпасаыс бӧръя кадӧ заводитӧма паськавны лунвыв регионъясын. Казялӧмаӧсь, мый сыӧн медсясӧ нёрпалӧны нӧбасьысь нывбабаяс, и висьӧмыс мӧрччӧ тшӧтш кагукныслы.
Гепатитыс овлӧ ёсь да хроническӧй. Воддзаыс, медсясӧ А шыпасаыс, висьӧдӧ зэв ӧдйӧ, да квайт тӧлысь мысти мортыс бурдӧ. Тайӧ пӧрӧсыс оз вудж мӧдас. Хроническӧйӧн нёрпалӧны ёна дырджык, и сыысь мускад артмӧ цирроз либӧ лёк пыкӧс, мыйысь мортыс кувсьӧ. Сэк жӧ В да С гепатитыс вермас лоны и ёсьӧн, и хроническӧйӧн.
D шыпасаыс артмӧ В гепатит да дельта-антиген вирус ӧтлаасигӧн. D-ыс ачыс оз висьӧд, но В-кӧд ӧтувтчӧмӧн вермас некымын лунӧн ыстыны мортсӧ мӧдаръюгыдӧ.
Комиын врачьяс син улас кутӧны хроническӧя 3.800 висьысьӧс. Быд во пӧрӧсыс кӧвъясьӧ ылӧсас 400 мортлы.
Сыктывкарса гепатология шӧринӧ районъясысь ыстӧны йӧзыслӧн нёрпалӧм йылысь юӧръяс. Миян специалистъяс ставсӧ гӧгӧрбок донъялӧм бӧрын вӧзйӧны бурдӧдчанног.
Ёсь вируса гепатит бӧръя вит-квайт восӧ надзӧник чинӧ. Бур, мый гежӧдджыка паныдасьлӧ В гепатит. Тайӧ зэв лёк висьӧмсӧ миян странаын, позьӧ шуны, дзикӧдз бырӧдім профилактика программа отсӧгӧн. Таысь кындзи В, С да D висьӧмыс вуджӧ и парентеральнӧя (гемоконтактнӧя). Морт вир-яйын кизьӧр сорасыс уна сикас. Вирусыс вермас веськавны вирад наркотикӧн да мукӧд дурмӧдчанторйӧн уколасигӧн, мусукасигӧн, медицинаын да косметикаын быдсикас операция дырйи, татуировка, пирсинг, маникюр, педикюр вӧчигӧн «няйт» инструментӧн вӧдитчигӧн. Гӧгӧрвоана, лючки больничаын гепатитыс оз вермы кӧвъясьны. Сэні ставыс сӧстӧм, ӧтчыдысь вӧдитчан шприцъясӧн уколсӧ вӧчӧны да с.в.
–Позьӧ-ӧ гӧгӧрвоны, мый мортыс висьмис гепатитӧн?
–Оз ӧд весьшӧрӧ татшӧм висьӧмсӧ нимтыны желтухаӧн. Кучикыд да син бугыльыд вижӧдӧ, торйӧн нин В да А шыпаса дырйи. Оз вижӧдны челядь. Таысь кындзи висьмӧ юрыд, юкалӧ ки-кокыд, кыптӧ температура, лов вылад деливӧ, вукӧдӧ, он вермы сёйны ни юны, кудзыд лоӧ чай рӧма. Овлӧ, бытшкӧ веськыд бокад. Таысь «мыжанас» вермасны лоны и гыркйыд, и сювйыд, и поджелудочнӧй железаыд. Воинныд кӧ та выйӧдз, пыр жӧ шыӧдчӧй врач дорӧ. Эн виччысьӧй, кор висьӧмыс топӧдас, мед кӧть тайӧ и абу гепатит.
Талун быдӧнлы позьӧ мынтысьтӧг прӧйдитны диспансеризация, профосмотр. С гепатитсӧ тшӧкыда казялӧны мортсӧ операция кежлӧ дасьтігӧн, а сідзжӧ санаторий-курортӧ бурдӧдчыны мунӧм водзвылас. Вир анализыс петкӧдлӧ, эм-ӧ кутшӧмкӧ пӧрӧс.
Медводз врач тшӧктас вӧчны вир анализ, медым тӧдмавны, эм-ӧ сэні HBsAg (аш бэ эс антиген) вирус юкӧн. Овлӧ, вирусыс вирас абу, а лабораторияса тестыс сійӧс петкӧдлӧ. Та вӧсна С гепатит казялӧм могысь ковмылӧ некымынысь сдайтны анализсӧ.
–Позьӧ-ӧ дзикӧдз мынтӧдчыны висьӧмсьыс?
–Медводз эськӧ ӧлӧді аснаукӧн бурдӧдчӧмысь. Сэсся врач кӧ индіс юны лекарство, оз позь дугӧдчыны кадысь водзджык.
Гепатитӧн 97 прӧчент висьысьыс бурдӧ. С гепатитысь мынтӧдчыны позьӧ, В шыпасаысь – дзикӧдз оз артмы. Ӧткымын вирус вежласьӧ, мутируйтӧ, та вӧсна сьӧкыд бӧрйыны лекарствосӧ.
Но колӧ тӧдны, дженьыд кадӧн мынтӧдчыны гепатитысь он вермы. Тайӧ хроническӧй висьӧм. Бурдӧдчӧм могысь колӧ водны больничаӧ. 2008 восянь ФОМС тшӧт весьтӧ тайӧ висьӧмсӧ мӧдісны бурдӧдны инфекция больничаяс бердын восьтӧм стационаръясын. Сэсся зэв дона лекарствоыс. Ӧти курсысь колӧ вештыны 500 гӧгӧр сюрс шайт. И некод оз тӧд, мыйта татшӧм курсыс ковмас.
Но кӧсъя пасйыны, мый бӧръя 2-3 вонас лекарствоыс донтӧммис. Фармацевтика сӧвмӧ водзӧ, медицинаса учёнӧйяс туясьӧны, вӧчӧны бурджык да донтӧмджык бурдӧдчантор. Кольӧм воӧдз кӧ мыйсюрӧ эг вермӧй лечитны, талун тырмымӧн кӧкъямыс вежон быд лун юны ӧти таблеткаӧн.
Зэв сьӧкыд мынтӧдны гепатитысь вӧркӧн нёрпалысьӧс, челядьӧс, нӧбасьысь нывбабаӧс, лекарствоыс чорыд да. И татшӧм мытшӧдыс мир пасьталаын. Республикаын вонас бурдӧдам 30-40 мортӧс. Тайӧ, дерт, зэв этша. Выльӧн висьмысьыс, артмӧ, унджык…
2024 восянь гепатитысь бурдӧдам нывбабаясӧс, кодъяс кӧсйӧны лоны мамӧн. Ӧд пӧрӧсыс сысянь вермӧ вуджны кагукыслы. Мӧйму Комиын чужис вируса 12 дзолюк, таво – куим.
–Позьӧ-ӧ кыдзкӧ видзчысьны висьӧмсьыс?
–Мукӧд пӧрӧсысь видзчысьӧм могысь моз жӧ, тырмымӧн тшӧкыдджыка майтӧгӧн мыссьыны, пузьӧдӧм либӧ бутилируйтӧм ва юны. Торйӧн нин кӧнкӧ отпускалігӧн. Ӧд А да Е гепатитыс медсясӧ паныдасьлӧны шоныд странаясын. Оз позь киасьны да ӧтлаын сёйны-юны, овны гепатитӧн висьыськӧд ӧти жырйын.
Сёрнитны кӧ вируслӧн парентеральнӧя паськалӧм йылысь, тані видзчысьӧмыс ВИЧ-ысь профилактика кодь жӧ: оз позь уколӧн сюйны вирад быдсикас «няйтсӧ» да мусукасьны тӧдтӧм йӧзкӧд. Весьӧпӧрлан йӧзыслӧн асланыс дзоньвидзалун дорӧ веськодьлунысь. Лунвыв регионъясын да суйӧр сайын шойччигӧн унаӧн шыӧдчылӧны уличвывса косметика, пирсинг да татуировка вӧчан салонъясӧ. Ёна кӧ нин телепит, колӧ бӧрйыны сӧмын косметология да медицина шӧрин-учреждениеяс, кӧні санитария да эпидемиология боксянь ставыс лючки.
А да В гепатитысь медся бур видзчысьны вакцина вӧчӧмӧн. Пузчужӧм кагукӧс пыр и уколаласны, мамыслӧн кӧ вӧлі виж висьӧм. Мукӧдсӧ уколалӧны куим тӧлыссяӧн. Специалистъяслӧн висьталӧм серти, ӧти уколыс дорйӧ мортсӧ во дас, и куимысь кӧ уколасьны, нэм кежлад позяс вунӧдны тайӧ висьӧм йывсьыс. Прививкасӧ позьӧ вӧчны и верстьӧлы. Мӧд уколсӧ – тӧлысь, коймӧдсӧ – во джын мысти. В гепатитысь уколыс сідзжӧ пӧ дорйӧ и D шыпасасьыс, сы вӧсна мый бӧръя вирусыс рӧдмӧ воддзаыскӧд ӧтув. С-ыслы паныд некутшӧм вакцина абу на лӧсьӧдӧма, вирусыс ёна вежласьӧ да.
<> Николай РАЗМЫСЛОВ. Снимокъясыс ӧтуввезйысь.