Гожся тӧлысьясӧ республикаса квайт районын да юркарын 832 том морт видлісны вын-сямсӧ стӧча лыйсьӧмын, на пӧвстысь куимсё дасӧн шедӧдісны ГТО норма тыртӧм йылысь пас.
Татшӧм кывкӧртӧд вӧчисны «Школьник, научись стрелять, сдай нормы ГТО» фестивальлы. Физкультура да спорт, велӧдан да экономика министерствоясӧн вичмӧдӧм сьӧм вылӧ сійӧс котыртліс пуляӧн да стендӧвӧй лыйсьӧм кузя федерация.
Лыйсьӧм – ёна паськалӧм спорт сикас, ӧд та могысь оз ков уна сьӧм. И тайӧ сетӧ позянлун пыртны сійӧс школаясӧ. Но, статистика серти, ӧні республикаын уджалӧ сӧмын куим тир, кӧні зільӧ ӧкмыс тренер. Районъясын оз тырмы колана тӧдӧмлуна велӧдысьыс, винтовкаыс да мукӧд эмбур. Тайӧ мытшӧдъяссӧ венӧм могысь и дасьтісны проектсӧ.
Уджтасӧ пырӧдчисны Сыктывкарысь, а сідзжӧ Емдін, Сыктыв, Сыктывдін, Кӧрткерӧс, Луздор, Койгорт районъясысь 5-9 классъясын велӧдчысьяс. Ныв-зонлы нуӧдісны мастер-классъяс, велӧдісны колана ног вӧдитчыны винтовкаӧн, а сэсся сетісны позянлун шедӧдны ГТО пас.
Торйӧн уджалісны сідз шусяна сьӧкыд челядькӧд. Ӧд спорт отсӧгӧн позьӧ гӧгӧрвоӧдны томуловлы, кутшӧм тӧдчана овны дзоньвидза да ас вӧсна кывкутӧмӧн.
Федерацияын зільысьяс уджалісны эз сӧмын челядькӧд, но и физкультура да ОБЖ велӧдысьяскӧд – накӧд, коді бӧрти вермас отсавны ныв-зонлы вӧчны спортын медводдза воськовъяс. Велӧдысьяслы котыртлісны семинаръяс. Ыджыд опыта тренеръяс юксисны, кутшӧм ногӧн бурджык туйдны челядьӧс, сетісны колана тӧдӧмлун, гӧгӧрвоӧдісны, кыдзи дасьтыны-нуӧдны челядь пӧвстын ордйысьӧм да ГТО сдайтан чукӧртчылӧм. А медым водзӧ вылӧ уджыс муніс колана ногӧн, школаын зільысьясӧс могмӧдісны методичкаясӧн.
Гранта сьӧм вылӧ федерация ньӧбис районъясӧ колана эмбур: винтовка, ичӧт пуляяс, мый отсалас котыртны школабердса тиръяс, а, сідзкӧ, томулов кутасны ветлӧдлыны кружок-секцияӧ да сӧвмӧдны лыйсян сямсӧ.
Мария ИГУШЕВА.
Снимокъясыс пуляӧн да стендӧвӧй лыйсьӧм кузя
федерациялӧн.