Няня-сола «Кӧйдыс»

Кольӧм вежонӧ Сыктыв районса войтыр бара на вочаалісны миян республикаысь да мукӧд регионысь воӧм фольклор котыръясӧс – Визинын мӧд во помся шыаліс-гажӧдчис «Кӧйдыс» том йӧз-лӧн этнофольклорнӧй фестиваль.

Таво сэтчӧ пырӧдчывны окотитісны Удмуртияысь, Марий Элысь, Чувашияысь, Архангельск да Киров обласьтъ-ясысь, Изьва да Сыктыв районъ-ясысь сьылысь-йӧктысьяс.

Фестивальлысь медводдза лунсӧ сиисны Сыктыв район артмӧмсянь 90 во тырӧмлы: тӧдмӧдісны «Ставыс тэ йылысь, чужан му» документальнӧй фильмӧн да восьтісны мича арт-объект.

Тшупӧда пасӧн сыктывсаӧс чолӧмаліс Коми Республикаса правительствоӧн веськӧдлысьӧс вежысь, видз-му овмӧсса министр Анатолий Князев. Сійӧ сетіс районса веськӧдлысь Роман Носковлы регионса юралыссянь козин – 30 миллион шайта сертификат.

Та бӧрын пансис уна йӧза гаж. Вижъюр йылысь легендаса шӧр героиня, турунӧн бурдӧдысь Марпида няньӧн-солӧн вочааліс «Кӧйдыс» фестиваль вылӧ воысьясӧс, кодъяс ас пайсьыныс петкӧдлісны «визитнӧй карточкаяс». Помасис тайӧ петкӧдчӧмыс аслыссикас флешмобӧн – фестивальӧ пырӧдчысьяс сувтісны ёртасян ӧти паськыд кытшӧ.

Праздниксӧ водзӧ нуӧдісны томулов. Шӧр изэрдын ворсісны-сьылісны юркарысь гӧсьтъяс: «Олд скул» кавер-группа, «Шоу барабанщиков + 2», «Чародеи» иллюзион-шоу. А рытнас енэжсӧ югзьӧдіс мича салют.

Мӧд лунас районса культура керкаын син гажӧдіс «Сыктывса дзоридзьяс» выставка, а фестиваль вылӧ воысьяс сцена вылын петкӧдлісны ас войтырлысь мича сьылӧм-йӧктӧмсӧ.

«Кӧйдыслӧн» бӧръя луныс пансис «Сыктыв му кузя ме муна» ӧтувъя ветлӧмӧн. Тані жӧ асланыс вӧчӧмторъясӧн паськӧдчисны ки- подтуя войтыр. А сэсся юргис гала-концерт. Конкурсса жюриӧ пырысьяс кыпыда юӧртісны вермысьясӧс. Таво Гран-при вичмис Кировысь «Слобода» йӧзкостса фольклор котырлы, медводдза места шедӧдіс Визинысь «Визув ва». Мӧд тшупӧда диплом гортас нуис Кудымкарысь «Шай-Май» фолк-группа, коймӧд места ас костаныс юкисны Чувашияысь «Камал» да Марий Элысь «Эр ужара» ансамбльяс.

Видзӧдысьясӧс тшӧтш гажӧдісны юркарса артистъяс Елена Лодыгина, Эдуард Морозов, «Балалайка» да мукӧд котыр, а сідзжӧ Визинысь гудӧкасьысь Фёдор Горинов да балалаечник Денис Лазарев.

«Кӧйдыс» гаж шымыртіс районса став олысьсӧ да гӧсьтсӧ – зонпоснилы и верстьӧлы позис шойччыны сьӧлӧм сертиыс: пырӧдчывны уна сикас мастер-классӧ, чӧсмасьны пӧсь пӧжасӧн да пражитӧм яйӧн, ньӧбны киподтуя войтырлысь вӧчӧмтор, чеччалыштны да ветлӧдлыштны вӧв-верблюдӧн «Вильшасян грездын».

* * *

Казьтыштам, «Кӧйдыс» фестивальсӧ котыртысьясыс – республикаса национальнӧй политика министерство да Сыктыв районса администрация. Таво фестиваль лоис вермысьӧн «Народнӧй бюджет» уджтаслӧн регионын олысь войтырлысь этнокультура сӧвмӧдӧм кузя юкӧнын.

Коми Республикаса национальнӧй политика министерстволӧн юӧр серти.

Няня-сола «Кӧйдыс»

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх