Эжваын, кӧні олӧ квайтымын сюрс морт, сӧмын ӧти ыджыд стадион – «Бумажник». Стрӧитлӧмаӧсь сійӧс Сыктывкарса вӧр комбинаткӧд ӧти кадӧ. Дерт, уна вонад стадионыс важмис, та вӧсна «Монди СЛПК» компания шуис выльмӧдны сійӧс. Уджыслысь медводдза юкӧнсӧ вӧчӧм могысь вӧлі вичмӧдӧма 80 миллион шайт.
2019 вося январсянь, кор босьтчӧмаӧсь уджас, унатор нин удитӧмаӧсь вӧчны: ӧні стадионсӧ югзьӧдӧ энергия видзтан технология серти вӧчӧм оборудование, лӧсьӧдӧмаӧсь выль пыранін, вермытӧм йӧзлы спорткомплексас торйӧдӧмаӧсь 40 пуклӧс, вежӧмаӧсь и видзӧдысьяслы лабичьяс.
Вӧчӧм уджсӧ бур ногӧн донъялӧма госстройнадзорлӧн Коми Республикаса инспекция.
Выльмӧдӧм стадионын матысса кадӧ нин нуӧдасны «Монди СЛПК»-ын зільысь кусӧдчысьяс костын эстафета да Эжвалӧн чужан лунлы сиӧм концерт.
–Комбинат да Эжва район костын йитӧдыс топыд. Та йылысь висьталӧ и «Бумажник» спорткомплексысь стадион выльмӧдӧмыс. Сідзжӧ «Монди Сыктывкарса ЛПК» отсалӧ муниципалитетлы видзны-сӧвмӧдны инфраструктурасӧ, пырӧдчӧ социальнӧй юкӧнын да культураын тӧдчана уджтасъясӧ, – пасйис предприятиеса генеральнӧй директор Клаус Пеллер.
–Ми аттьӧалам «Монди Сыктывкарса ЛПК»-ӧс стадион выльмӧдӧмсьыс. Районын олысьяслы тайӧ збыльысь ыджыд козин, ӧд эжвасаысь унаӧн зільӧны комбинатас, – висьталіс Эжва районса администрацияӧн веськӧдлысьлысь удж вӧчысь Татьяна Таскаева.
2020 воӧ стадионын лӧсьӧдасны му косьтан дренаж система да нюжӧдасны зэр ва лэдзан трубаяс, а сідзжӧ выльӧн вольсаласны стадион эрдлысь эжасӧ да котралан туйяссӧ.