Кольӧм вежонӧ республикаса юралысьлысь удж вӧчысь Ростислав Гольдштейн ветліс Койгорт районӧ.
Муниципалитетас мунігӧн сійӧ медвойдӧр видзӧдліс, кыдзи дзоньталӧны-выльмӧдӧны Сыктывкарсянь Кудымкарӧ машинаӧн ветлан туйсӧ.
Таво ремонтсӧ шуӧма вӧчны тайӧ трасса вылас кыклаын: Сыктыв районын дзоньтавны 26 да Койгорт районын – 16 километр. Пӧдрадчикъясыс «Карьер» ООО да «Коми туй компания» акционер котыр. Кыдз тыдовтчис, уджалӧны зіля, ставсӧ вӧчӧны урчитӧм кадӧ. Поводдяыс оз падмӧд, и йӧзыс да техникаыс тырмымӧн. Став уджсӧ лӧсьӧдчӧны эштӧдны октябрӧдз.
Казьтыштам, Сыктывкар – Кудымкар автотрассасӧ дзоньталӧм кузя регионын олысьяс шыӧдчылісны Ростислав Гольдштейн дорӧ таво апрельын сыкӧд «Веськыд йитӧд» пыр, а сідзжӧ кар-районын аддзысьлӧмъяс дырйи.
Таво апрельын жӧ Ростислав Гольдштейн да Койгорт районса юралысь Лариса Ушакова уджмогъяс кузяыс аддзысьлігӧн сёрнитчисны Вежъю посёлокын кыпӧдны выль ФАП. Бурдӧдчаніныс важ, джынвыйӧ шогмытӧм нин стрӧйбаын, а медикъяс дорӧ шыӧдчылысьыс 177 морт, на лыдын 41 челядь.
Выль ФАП-сӧ восьтыны шуӧма таво сентябрын. Талун сійӧс кыпӧдан уджыс мунӧ тыр ӧдӧн. Ростислав Гольдштейн видзӧдліс, мый вӧчӧмаӧсь нин. Стрӧйба каркасыс дась, вӧчӧны вевтсӧ, панельӧн кышӧны стенсӧ, вайӧдӧны ва трубаяс.
Регионса веськӧдлысь воліс сідзжӧ Койгорт сиктын «Шӧр» да «ММЗ» котельнӧйясӧ, видзӧдліс, кыдзи сэні дасьтысьӧны тӧв кежлӧ.
Воддзаас дона мазут пыдди лӧсьӧдчӧны босьтчыны вӧдитчыны биоломтасӧн. Заводитӧмаӧсь выльмӧдны котельнӧйсӧ, но пӧдрадчикыскӧд абу ладмӧдчӧмаӧсь проект дон кузяыс да, уджыс сувтӧма. Но век жӧ, кыдз эскӧдіс «Коми коммунальнӧй технологияяс» акционер котырса генеральнӧй директор Магомед Османов, корсьӧмаӧсь позянлун разьны гӧрӧдсӧ да сёрнитчӧмаӧсь важ пӧдрадчикыскӧд помавны став уджсӧ. Ростислав Гольдштейн тшӧктіс ас кадӧ эштӧдны ремонтсӧ. А блок-модульысь кыпӧдӧм выль «ММЗ»-ыс дась нин ломтысян сезон кежлас.
Республикаӧн веськӧдлысь окотапырысь тӧдмасис мӧд номера детсадйын сэтчӧс кагульничаяслӧн водзмӧстчӧмӧн «Йӧзкостса бюджет» весьтӧ лӧсьӧдӧм этнокультура площадкаӧн.
«Люби и знай свой Коми край» проект серти сэтчӧ «локтӧмаӧсь» коми мойдъясысь геройяс, на лыдын Пера-багатыр. Челядь вермасны лыйсьыны ньӧввужйысь, кытшлавны лабиринтъясӧд, ворсны коми серъясӧн мичмӧдӧм шашкиӧн. Мини-музейын дзолюкъяс тӧдмасьӧны вужвойтырлӧн важся оласногӧн да велӧдчӧны сёрнитны комиӧн. Зонпоснилӧн эм асланыс град йӧр, кӧні быдтӧны да арнас асьныс жӧ идралӧны град выв пуктас.
Ростислав Гольдштейн вылӧ донъяліс сиктса детсадйын зільысьяслысь челядькӧд уджын водзмӧстчӧмсӧ. Сылӧн кывъяс серти, буретш татшӧм проектъясыс отсалӧны ышӧдны челядьӧс радейтны чужан мусӧ.
Туйяс дзоньталӧм, юан ва весалӧм, социальнӧй такси лӧсьӧдӧм да сикт-посёлокын олысьясӧс майшӧдлана мукӧд мытшӧд-падмӧг йылысь сёрни вӧлі Койгорт районса депутатъяскӧд, овмӧдчӧминъясӧн веськӧдлысьяскӧд да общественникъяскӧд Ростислав Гольдштейнлӧн ад-дзысьлӧм дырйи.
Сёрнисӧ панігӧн сійӧ шоныд бур кывъяс висьталіс район да сэні олысьяс йылысь да пасйис, мый медтӧдчанаыс йӧзкӧд татшӧм аддзысьлӧмъясас:
–Верма шуны ӧтитор – ни ачым ме, ни министръяс да найӧс вежысьяс оз мӧдны кӧсйысьны вӧчны сійӧс, мый абу на пыдісянь да гӧгӧрбок видлалӧма да абу на позянлуныс талун збыльмӧднысӧ. И эм кӧ тіян юалӧм, код вылӧ ӧдйӧ вочавидзны ог вермы, веськыда шуа, мый гӧгӧрбок видлалам юалӧмнытӧ да веськыда жӧ сетам сы кузя вочакыв.
Ростислав Гольдштейн бара на пасйис, кутшӧм тӧдчана талун ӧтув мӧвпыштӧмӧн бӧрйыны, мый колӧ медвойдӧр вӧчны, а мый бӧрынджык. И та дырйи зэв тӧдчана власьт тэчас да общественносьт костын топыд йитӧда ӧтувъя удж.
Та пӧрйӧ татшӧм ногӧн жӧ вӧлі сёрниыс сы йылысь, кыдзи отсавны вермытӧмъяслы, инвалид коляскаӧн ветлысьяслы, кодъяслы сьӧкыд воӧдчыны, шуам, спорткомплексӧ, школаӧ, больничаӧ. Регионӧн веськӧдлысь вӧзйис петан туй: ньӧбны районлы спецтранспорт да вӧдитчыны сыӧн социальнӧй таксиӧн моз.
Кажым посёлокын олысьяс, кыдз висьталісны аддзысьлӧм дырйиыс, васӧ босьтӧны водохранилищеысь, но сійӧ абу сӧстӧм. А васӧ бурмӧдӧм кузя проектсӧ збыльмӧдны позянлуныс абу, уджыс зэв дона сувтӧ да – ӧкмыс миллион сайӧ шайт пӧ колӧ мынтыны.
Ростислав Гольдштейн такӧд йитӧдын шензьыштіс, кытысь босьтӧмаӧсь татшӧм донсӧ.
–Эмӧсь миян асланым зэв бур специалистъяс «Коми коммунальнӧй технологияяс» компанияын, «Сыктывкарса водоканалын». Позьӧ жӧ сэтчӧ шыӧдчывны, мед видзӧдласны, мый колӧ вӧчны. Абу быть корны Санкт-Петербургысь проектировщикъясӧс, – пасйис регионӧн веськӧдлысь да тшӧктіс «Коми коммунальнӧй технологияясысь» генеральнӧй директор Магомед Османовлы босьтчыны разьны кажымсаяслысь гӧрӧдсӧ.
Юасисны Койгорт районын олысьяс и сикт-грезданыс биару вайӧдӧм йылысь, эм-ӧ налысь муниципалитет газифицируйтӧм кузя программаыс.
Аддзысьлӧмсӧ сигӧртігӧн регионӧн веськӧдлысь аттьӧаліс Койгорт районын олысьясӧс да пасйис, мый та пӧрйӧ сёрниыс накӧд вӧлі эз сӧмын уна сикас мытшӧд-падмӧг йылысь, но и кыдзи да мый вӧчны найӧс бырӧдӧм могысь. И вӧчны тайӧс колӧ власьтлӧн да обществолӧн ӧтвылысь зільӧмӧн. Ростислав Гольдштейн корис койгортсаясӧс водзӧ ӧтув уджавны да районын олӧмсӧ бурмӧдны.
* * *
Содтӧд пасъям, Ростислав Гольдштейн ошкис Койгорт районын олысьяслысь вӧзйӧмсӧ йӧзӧдны 2026 восӧ Коми Республикаын сиктлы сиӧм воӧн.
<> Гижӧдсӧ дасьтіс Александра АРТЕЕВА. Снимокъясыс ӧтуввезйысь.