Торъя военнӧй операцияын тышкасьысьясӧс власьт тэчасын уджӧ босьтчыны ышӧдӧм могысь Россияса президент Владимир Путин вӧзйис лӧсьӧдны «Время героев» федеральнӧй проект.
Комиын регионса татшӧм жӧ уджтас шусьӧ «Пера. Путь героя», и збыльмӧдны сійӧс заводитісны тайӧ вежонӧ.
Уджтасӧ пырӧдчысьяс дорӧ шыӧдчигӧн республикаӧн веськӧдлысь Ростислав Гольдштейн пасйис, мый тыш-косьын налӧн чӧжсьӧм опытныс ковмас и быдлунъя олӧмын.
–Ті ставныд – вермысьяс. Ті венінныд войнаса сьӧкыдлунъяс, и тіянлы колӧ веськӧдлыны Россия Федерацияӧн да Коми Республикаӧн, – висьталіс «Пера. Путь героя» программаӧ пырӧдчысьяслы Ростислав Гольдштейн. – Ме тшӧкыда ветлывла регионса каръясӧ да районъясӧ и тӧда, кӧні ті верманныд петкӧдлыны ассьыныд тӧдӧмлун-сямнытӧ. Программа серти велӧдчӧм бӧрын ті асьныд бӧръянныд уджтӧ да шуанныд: «Тані – менам фронт. И буретш тані Коми Республика сӧвмӧдӧм могысь ме верма вӧчны став позянасӧ и позьтӧмсӧ». Ог ми тіянӧс, а ті ми-янӧс кутанныд велӧдны, кыдзи колӧ ёртасьны, отсасьны ӧта-мӧдлы да шедӧдны вермӧмъяс.
Торъя военнӧй операцияса ветеранъяслысь команда котыртӧм йылысь мӧвпсӧ ошкисны и нималана спортсменъяс Александр Лебзяк, Алек-сей Тищенко, Андрей Баланов, Ахмедхан Адилов, кодъяс волісны Комиӧ боксысь Россияса первенство вылӧ да тшӧтш и челядьлы мастер-классъяс нуӧдісны.
Олимпиадаса кыкысь чемпион Алексей Тищенко пасйис, мый чужан Омск обласьтас тшӧтш лӧсьӧдӧмаӧсь СВО-ын тышкасьысьяслы «ПРОдвижение героев» программа.
–Эска, тіян пиысь быдӧн аддзас ассьыс туйвизьсӧ, и ставныдлы сиа гырысь вермӧмъяс, – шуис чемпион.
Уджтас панӧмкӧд йитӧдын чукӧртчылігӧн тӧдчӧдісны, мый регионъясын татшӧм программаясас босьтчыны тшӧктіс олӧмыс.
Комиын «Защитники Отечества» фондса филиалӧн юрнуӧдысь Валентина Дитц шуис, мый программа коланлунсӧ аддзӧны и асьныс геройяс, торъя военнӧй операцияын тышкасьысьяс. Найӧ пӧ фронт вылысь воӧм бӧрын кӧсйӧны пуктыны став вынсӧ, медым сӧвмӧдны чужан мусӧ.
Тыш-косьса ветеран Станислав Хахалкин казьтыштіс, кыдзи республикаын котыртчис Афганистанын войнаса ветеранъяслӧн союз. Сэки пӧ водзмӧстчысьяслы некод эз отсав, эз велӧд найӧс.
–А тіян эм зэв бур позянлун босьтны тӧдӧмлун. Велӧдчӧй! А ми отсалам тіянлы, – шуис сійӧ.
Велӧдчигас СВО-са ветеранъяслӧн наставникъясӧн лоасны оз сӧмын чина йӧз, но и Комиын да Россияын пыдди пуктана войтыр. На лыдын ФСБ-са генерал Владимир Джабаров, Афганистанын войнаса ветеран Станислав Хахалкин.
Программалысь вымпелсӧ Ростислав Гольдштейн сетіс Дмитрий Ивановлы. Уджтасӧ пырӧдчысьяс пӧвстын сійӧ медся томъяс лыдын. Сідз-кӧ, Комиын лоас война пыр мунӧмаяслӧн вына выль команда, и сійӧ кутас зільны, мед аслас уджысь лоас водзӧсыс.
Гижӧдсӧ дасьтіс Павел СИМПЕЛЕВ. Снимокыс ӧтуввезйысь.