Коми Республикаса вужвойтырлӧн шылада-драмаа театр збыльмӧдіс «Движение Первых» грант весьтӧ «Майбыр» гожся интенсив.
Кыдзи висьталіс театрын зільысь Евгения Удалова, тайӧ уджтасыс гожся каникул дырйи ӧтувтіс челядьӧс да томуловӧс театрын.
Квайт лун Сыктывкарысь да матысса Сыктывдін, Сыктыв районъясысь ныв-зон волывлісны вужвойтырлӧн шылада-драмаа театрӧ тӧдмасьны артистлӧн уджӧн, ветлісны экскурсияӧн вурсян цехӧ, реквизит вӧчан мастерскӧйӧ, тӧдмасисны коми йӧзкостса шылада инструментъясӧн (тӧдмӧдіс Александр Ветошкин), видзӧдісны «Квартирник» да спектакльяс.
Сідзжӧ вӧлі позянлун художник-декораторъяскӧд ас киӧн вӧчны театральнӧй маска да кутшӧмсюрӧ реквизит. А сёрнитны сцена вывсянь велӧдіс Алёна Гаранина.
Колӧ пасйыны, мый театрлы тайӧ уджтассӧ дасьтыны вӧзйӧма Сыктывкарысь школаын велӧдчысь Саша Савин.
—Саша, збыльысь тайӧ тэнад мӧвпыс?
—Збыльысь. Ме помалі коймӧд класс, — ас йывсьыс оз рочӧн, а комиӧн висьталӧ Саша. — Зэв ёна радейта театр. Волывла татчӧ спектакль, концерт видзӧдны. Думайта да, а мый, мися, кутам вӧчны гожӧмнас? Сэсся мамлы и вӧзйи, сійӧ тані театрын уджалӧ. (Сашалӧн мамыс Евгения Удалова театрын веськӧдлӧ литература юкӧнӧн. — Е.М.). Нимкодь, мый кӧсйӧмӧй збыльмис.
—Ачыд тшӧтш вӧчасян? Мый медъёна кажитчӧ?
—Руч маска вӧчим, гипсысь пемӧс мыгӧръяс краситім, коми серӧн серпасасим, артистъяскӧд аддзысьлім, концерт-мойд видзӧдім. Зэв ёна кажитчӧ, кыдзи юргӧны коми йӧзкостса инс-трументъяс. Артист Александр Ветошкин на йылысь висьталіс миянлы.
—Ачыд, гашкӧ, ворсан мыйӧнкӧ?
—Ог куж.
—Саша, гашкӧ, артистӧн кӧсъян лоны, быдман да?
—Кӧсъя.
—Ныв-зонмыс мый шуӧны? Тэ накӧд, гашкӧ, сёрнитан, кыдзи донъялӧны уджтассӧ?
—Ставныслы кажитчӧ.
Художник-декоратор Елена Кривоклуб висьталіс, мый ныв-зон окотапырысь пырӧдчӧмаӧсь уджтасӧ. Еленакӧд найӧ краситӧмаӧсь гипсысь пемӧс мыгӧръяс.
—Пемӧс мыгӧръяссӧ водзвыв дасьті гипсысь. Бӧрйим сэтшӧмъясӧс, кодъяс олӧны коми пармаын. Тӧдмӧді и коми серӧн, тшӧтш видлісны сійӧс серпасавны, — висьталіс Елена.
Вужвойтырлӧн шылада-драмаа театр ыджыд удж нуӧдӧ коми кыв да культура видзӧм-сӧвмӧдӧм могысь. Дасьтӧма «Коми театр быдӧнлы» велӧдан да культура уджтас, «Ме радейта коми кыв» акция, кодъяс отсӧгӧн тӧдчымӧн тшӧкыдджыка кутісны ветлыны чукӧрӧн национальнӧй постановкаяс вылӧ школаын велӧдчысьяс.
«Майбыр» уджтаскӧд йитӧдын театрӧ квайт лунӧн воліс 600 сайӧ ныв-зон. Евгения Удаловалӧн кывъяс серти, татшӧм уджтасъясыс збыльысь зэв коланаӧсь. Томулов матысяньджык тӧдмасьӧны театр пыр коми культураӧн, кывйӧн, традицияясӧн. Да, дерт, артистлӧн уджӧн.
Вермас лоны, тайӧ уджтасыс тшӧтш лоас бур традицияӧн.
<> Екатерина МАКАРОВА.
Снимокъясыс авторлӧн да Коми Республикаса вужвойтырлӧн шылада-драмаа театрысь.