Коми Республикаса госслужба да веськӧдлан академия пӧртіс олӧмӧ «Вынаяслӧн история» спортивнӧй медиамарафон» уджтас.
Кольӧмвося сентябрын тайӧ ыджыд проектсӧ збыльмӧдӧм вылӧ «Мортлысь сям сӧвмӧдан академия» АНО шедӧдіс Коми Республикаса юралысьлысь грант.
Ӧкмыс тӧлысь чӧж уджтасӧ пырӧдчис матӧ сё морт. Юркарысь да Эжваысь 8-11 классын велӧдчысьяс «Медиа-Спорт» программа серти босьтісны тӧдӧмлунъяс нёль сессия дырйи.
Медиаюкӧнын томулов босьтісны ыджыд опыт: видлісны сямсӧ корреспондент, оператор, видеограф, режиссёр уджын.
Ныв-зон тӧдмасисны вермытӧм спортсменъяскӧд, окотапырысь босьтісны интервью, снимайтісны видео да дасьтісны спорт нимӧдан тырвыйӧ контент.
–Буретш тайӧ и лои проектлӧн медшӧр могыс – паськыда висьтавны Коми Республикаын сӧвман адаптивнӧй спорт сикасъяс йылысь, – тӧдчӧдіс уджтас нуӧдысь да наставник Анна Лушкова. – Миян ставыс артмис! Сы мында интереснӧй да, пасъя, вына йӧзкӧд мойвиис тӧдмасьны ныв-зонлы! Тайӧ и торъя военнӧй операцияса инвалид-геройяс, и вермытӧм спортсменъяс, кодъяс зіля пырӧдчӧны адаптивнӧй спорт сикасӧ. Быдмысь войтырлы найӧ – ыджыд пример!
Тайӧ збыльысь социальнӧй тӧдчанлуна ыджыд да колана уджтас. Ӧд ныв-зон ӧнісянь нин вермасны мӧвпыштлыны профессия бӧрйӧм йылысь.
И нёль сессия дырйи тыдовтчис, мый татчӧ веськалісны зэв тӧлка да водзмӧстчысь, быдтор тӧдны кӧсйысь да креативнӧй велӧдчысьяс.
Уси шуд аслым накӧд тӧдмасьны да юксьыны опытӧн уджтассӧ олӧмӧ пӧртігӧн. Кутам лача, унаӧн на пӧвстысь коркӧ лоасны нималана журналистъясӧн.
Наставникъяскӧд ӧтув велӧдчысьяс дасьтісны вель уна статья да видеофильм.
Академияса залын проектсӧ кыпыда сигӧртігӧн вӧлі позянлун видзӧдны найӧс.
А сэсся нин уджъяссӧ йӧзӧдісны социальнӧй сетьын да сайтъясын, ысталісны тшӧтш и республикаса школаясӧ.
И медшӧрыс – проектӧ пырӧдчысьяс став вӧчӧм-чукӧртӧм уджсьыс дасьтісны-лэдзисны «История сильных» небӧг, кодӧс тшӧтш разӧдасны велӧдчанінъясӧ.
«Вынаяслӧн история» спортивнӧй медиамарафон» уджтассӧ олӧмӧ пӧртны отсалісны регионса экономика сӧвмӧдан, промышленносьт да транспорт министерство.
Партнёръясӧн лоины республикаса физкультура да спорт, йӧзӧс велӧдан да наука министерствояс, адаптивнӧй спорт сикасъясын сборнӧй командаяс дасьтан да адаптивнӧй физкультура сӧвмӧдан шӧрин, Комиын «Айму дорйысьяс» фонд, юӧр сетан тэчасын уджалысьяс (тшӧтш и Коми йӧзӧдчан керка) да том йӧзлӧн политика комитет.
Татшӧм колана да тӧдчана уджтас олӧмӧ пӧртысьяслы муӧдз копыр бергӧдӧм уджысь!
Виччысям «Вынаяслӧн история-2» выль проект.
<> Галина МАКАРОВА.
Снимокъясыс Коми Республикаса госслужба да веськӧдлан академияысь пресс-службалӧн.