Анастасия Шмигельскаяӧс шуӧма Коми Республикаын медбур вурсьысьӧн. Сійӧ лоис «Профессия серти медбур» ставроссияса конкурслӧн регионса тшупӧдын «Вурсьысь» нимпасын вермысьӧн.
Конкурсыс вӧлі июнь 10 лунӧ Сыктывкарса политехническӧй техникумын. Татшӧм ордйысьӧмсӧ котыртӧма Россияса президент Владимир Путинлӧн индӧд серти вынсьӧдӧм «Кадры» нацпроектлӧн «Человек труда» федеральнӧй уджтас весьтӧ. Сы могысь, медым кыпӧдны рабочӧй профессиялысь тӧдчанлунсӧ, бӧрйыны медбур специалистъясӧс да сетны налы позянлун юксьыны радейтана уджас асланыс опытӧн.
«Профессия серти медбур» конкурссӧ Комиын вӧлі нуӧдӧма медводдзаысь на. Вурсьысьяслӧн ордйысьӧмӧ пырӧдчисны предприниматель Елена Захарова, А.В.Дубовцев ИП дорын уджалысь Галина Лапшина, Коми Республикаса юралысь бердын искусство гимназияын зільысь Анна Михайлова да Виктор Савин нима академическӧй драма театрысь Анастасия Шмигельская.
Конкурссӧ панігӧн найӧс водзмӧстчӧмсьыныс аттьӧаліс регионса удж, занятосьт да йӧзӧс социальнӧя дорйӧм кузя министрӧс вежысь Валерий Коротин.
–Ті пырӧдчинныд республикаын «Медбур вурсьысь» ним шедӧдӧм могысь конкурсӧ, и тайӧ нин висьталӧ, мый ті эсканныд асланыд тӧдӧмлун-сямӧ. Регионса тшупӧдын вермысьлӧн лоас позянлун петкӧдчыны таво сентябрын Улыс Новгородын федеральнӧй ордйысьӧмын. Колӧ пасйыны, мый тавосянь ставроссияса «Профессия серти медбур» конкурсын вермысьяслы сьӧма призсӧ урчитӧма тӧдчымӧн ыджыдджыкӧс.
Медводдза места босьтысьлы сетасны миллион шайт, мӧд местаысь – витсё сюрс да коймӧдсьыс – куимсё сюрс шайт. Век жӧ та дырйи медся тӧдчанаыс сыын, мый асланыд профессионализмӧн нималанныд Россия Федерация пасьталаын, – вурсьысьяслы быдӧнлы вермӧм сиис Валерий Коротин.
Конкурсӧ пырӧдчысьяслы колӧ вӧлі урчитӧм кадӧ юксьыны асланыс профессиональнӧй тӧдӧмлунӧн, висьтавны, кыдзи видзчысьны удж вылын неминучаысь, петкӧдлыны сямнысӧ, кыдзи бурджыка вурны воротник, зеп, юбка бӧж да с.в.
Уджнысӧ донъялісны конкурсса комиссияӧ пырысьяс: Сыктывкарса политехническӧй техникумын велӧдысьяс, регионын йӧзӧс уджӧн могмӧдысьяс да минтрудаысь специалистъяс.
Кывкӧртӧд вӧчӧм бӧрын республикаын медбур вурсьысьӧн шуисны Анастасия Шмигельскаяӧс. Мӧд места босьтіс Анна Михайлова, а коймӧдсӧ – Елена Захарова.
Найӧс нимӧдасны июнь 27 лунӧ Коми Республикаса торгово-промышленнӧй палатаын «Работа России. Время возможностей» ставроссияса ярманга вылын кыпыд чукӧртчылӧм дырйи.
<> Гижӧдсӧ дасьтіс Александра АРТЕЕВА. Снимокъясыс ӧтуввезйысь.