Ростислав Гольдштейнлӧн индӧд серти Комиын кутасны мынтыны регионса поликлиника-больничаын врач-наставникъяслы стажёръясӧс туйдӧм-велӧдӧмысь оклад дораныс содтӧд сьӧм, быд том специалистысь – дас прӧчент.
Том йӧзлы ыджыд опыта врачьяслӧн отсӧгыс зэв колана да тӧдчана. Республикаса медучреждениеясӧ быд во удж вылӧ инасьӧ шӧркодя 70-80 том врач. Медым ышӧдны медвуз помалысьясӧс уджавны республикаса бурдӧдчанінъясын, вынсьӧдӧма «Земский доктор» да «Земский фельдшер» программаяс. И быд во ветымын гӧгӧр врач да фельдшер воӧны уджавны кар-сиктӧ, кӧні олысьыс ветымын сюрсысь этшаджык. Тӧдчана, мый сиктӧ воӧм врачьяслы быдӧнлы ӧтчыдысьӧн мынтӧны кык миллион шайт, сиктса фельдшеръяслы да Интаын, Усинскын, Печораын, Сосногорскын, Вуктылын да Емваын медучреждениеясӧ удж вылӧ инасьӧм врачьяслы быдӧнлы – миллион да тайӧ жӧ каръясас фельдшеръяслы – витсё сюрс…
Медым республикаса поликлиника-больничаясын тырмымӧн вӧлі уджалысьыс, быд во Россияса медвузъясӧ целевӧя да контракт серти велӧдчыны пырӧ Комиысь этша вылӧ сё дас морт. 2022 восянь Сыктывкарса государственнӧй университет бердын ординатураын содтӧд тӧдӧмлун босьтӧны хирургъяс, анестезиологъяс да реаниматологъяс, терапевтъяс, кардиологъяс, акушеръяс да гинекологъяс.
Таысь водзӧсыс эм. Целевикъясысь сизимдас прӧчентыс босьтчӧны уджавны договор сертиыс – тайӧ быд во квайтымынысь унджык том врач.
Республикаса медколледжъяс быд во помалӧ нёльсёысь унджык специалист, и на лыдысь кӧкъямысдас сайӧ прӧчентыс инасьӧны удж вылӧ регионса государственнӧй медорганизацияясӧ.
Коми Республикаса бюджетысь шуӧма вичмӧдны ӧтчыдысьӧн миллион шайт врачьяслы, кодъяс босьтчӧны уджавны Воркутаса бурдӧдчан учреждениеясын да витсё сюрс – торйӧн колана специальносьтъяс серти медвуз помалысьяслы.
2024 восянь республикаса бюджет весьтӧ содтӧд сьӧма отсӧг шуӧма вичмӧдны специалистъ-яслы, кодъяс локтӧны уджавны ФАП-ясӧ, кӧні водзті эз вӧв медикыс. Налы быдӧнлы ӧтчыдысьӧн сетӧны оланін ньӧбны миллион шайт да во чӧж удждон дораныс быд тӧлысь – содтӧд 38,8 сюрс шайт. Кольӧм во татшӧм сьӧма отсӧгсӧ сетӧмаӧсь вит медиклы. Таво регионса минздрав дась татшӧм ногӧн жӧ ышӧдны ФАП-ын уджавны дас специалистӧс.
Содтӧд пасъям, мый Комиын торйӧн нин колана врач-специалистъяс лыдынӧсь торакальнӧй хирург, неонатолог, пульмонолог, хирург, сердечно-сосудистӧй хирург, челядьлы лабораторнӧй генетик, паллиативнӧй медицина отсӧг сетӧм кузя судебно-психиатрическӧй эксперт да медицина реабилитация кузя колопроктолог.
Шӧр тӧдӧмлуна медикъясысь медся коланаӧсь медсестраяс, лаборантъяс, медрегистраторъяс, бурдӧдчан физкультураса инструкторъяс да инструктор-дезинфекторъяс.
<> Гижӧдсӧ дасьтіс Александра АРТЕЕВА. Снимокъясыс ӧтуввезйысь.