Комиысь велӧдысь Ольга Сенькина лоис Первой каналын «Поле чудес» телешоулӧн фи-налын да суперворсӧмын вермысьӧн.
«Поле чудеслысь» тайӧ петассӧ вӧлі сиӧма Россияса регионъясын сёрнисикасъяслы.
Мӧд «тройкаын» ворсіс Сыктывкарысь роч да коми кывъяс, а сідзжӧ литература велӧдысь Ольга Сенькина.
Сійӧ сяммис тӧдмавны «бабничаться» кыв да веськаліс финалӧ.
Студияын сылы отсасис Виктория нылыс. Сійӧ мичаа лыддис Коми Республикалы сиӧм кывбур, мыйысь телеведущӧй козьналіс акань.
Та бӧрын Сыктывкарысь ань сьӧрсьӧн-бӧрсьӧн тӧдмаліс куим шыпас. Таысь сылы вӧзйисны бӧрйыны шкатулка, кӧні ӧтиас вӧлі пуктӧма вит сюрс. Виктория отсаліс мамыслы бӧрйыны сьӧмасӧ.
Таысь кындзи Ольга Сенькина велӧдіс Леонид Якубовичӧс комиӧн сёрнитыштны да козьналіс нималана телеведущӧйлы миян вужвойтырлысь вӧлӧга.
Финалын нин Сыктывкарысь ань тӧдмаліс «гвоздануть» кадакыв. XIX нэмын Тверь губернияын тадзи висьтавлӧмаӧсь, кор кодкӧ стӧча да сюся мыйкӧ шулӧма.
Кор телеведущӧй вӧзйис пырӧдчыны суперворсӧмӧ, Ольга дзик пыр и кӧсйысис. Кроссвордын сійӧ тӧдмаліс «самовариться» кыв. Вежӧртасыс – важӧн чай юигӧн кад коллялӧм. Таысь кындзи и «банить» – Донын тадзи шулӧмаӧсь, кор шоныд ваӧн мыськасьлӧмаӧсь.
Суперворсӧмын вермӧмысь Ольга Сенькиналы вичмис гортса кинотеатр да кубок.
<> Гижӧдсӧ дасьтіс Екатерина МИКУШЕВА. Снимокъясыс ӧтуввезйысь.