1941-1945 вося Айму вӧсна Ыджыд тыш… Миян уна сикас войтыра странаын абу сэтшӧм семьяыс, медся ылі пельӧсыс, кодлы эськӧ эз инмы, кодӧс эз дойд сійӧ. Но весиг воштӧмӧн да курыд шогӧн тыр кадӧ век эмӧсь йӧз, кодъяслысь мукӧдыс велӧдчӧны бура да югыдас. И медвойдӧр тайӧ – школаын велӧдысьяс. Налӧн шуӧмыс, вӧчӧмыс, оласногыс, быд воськов йӧз син водзынӧсь, а сиктад и кык пӧвста на. Окота бур кыв висьтыштны Петрунь сиктса школаӧ Айму вӧсна Ыджыд тыш мунан кадӧ воӧм учительяс йылысь.
1941 воын институт помалӧм бӧрын Сыктывкарсянь Петруньӧ удж вылӧ воӧдчӧма томиник ныв Анна. Война грымакылӧма первой во на, но сылӧн киньыс лэбӧма нин ылыс войвыв сиктӧдз.
Тадзи казьтылӧма сійӧ кад йывсьыс Анна – Анна Фотиевна Канева: «Сійӧ жӧ паракоднас, мыйӧн вои ме, нуисны фронт вылӧ медводдза мужичӧйясӧс. 1941 вося декабрын тыш-кось вылӧ мунісны школаса директор Георгий Иванович Канев да математика велӧдысь Яков Тихонович Царень. Велӧдчанінын сизим класслы тӧдӧмлун сетысьыс колис квайт. Да интернатын заведующӧй да воспитатель пыдди сизимӧд класс муртса на помалысь ныв П.С.Уляшева.
Велӧдчим кык стрӧйбаын. Школаын петкӧдлана некутшӧм пособие эз вӧв. Эз тырмы и велӧдчӧм могысь коланаыс: тетрадь, чернила, ручка. Учебникыс вӧлі этша. Челядь гижасисны важ небӧгъясын строкаяс костӧ. Черниласӧ тшӧкыда вӧчлім саысь, пакулаысь. Велӧдім карасин лампа би улын.
Нывкаяс да зонкаяс пасьтасьлісны коді кыдзи: ӧтияс бать курткаӧн ветлісны, мӧдъяс купайкаӧн. А сёяннад кутшӧм дзескыд вӧлі!
Школалы пес на коліс заптыны, и тайӧс вӧчисны техничкаяс, а налы отсасьлісны велӧдысьяс да велӧдчысьяс. Интернатын став уджсӧ бергӧдіс ӧти морт. Сійӧ и пусис, и пелькӧдчис, и пес- ласис.
Став тайӧ сьӧкыдлун вылас видзӧдтӧг унджык челядьыс зілисны бура велӧдчыны. Вичмыліс кадыс и гортса удж вӧчны, и горт гӧгӧрыс отсасьны, и концертын петкӧдчывны. Гожӧмнас колхозлы турун пуктывлісны».
Нэм джын – быдса ветымын во – уджаліс Анна Фотиевна школаын, наысь дас ӧкмыссӧ директораліс. Сёрӧнджык ань веськӧдліс Петрунь сиктса музейӧн.
История да география велӧдысь Елена Парменовна Сорвачеваӧс Коми АССР-са просвещение министерство мӧдӧдӧма уджавны Косьювомса сизим вося школаӧ. Буретш сэні 1941 вося сентябрын босьтчӧма тӧдӧмлун сетан уджӧ. Во мысти нин, 1942 воын, индӧмаӧсь Петруньса школаӧ директорӧн. Сійӧ кад йывсьыс Елена Парменовна казьтылӧма Анна Фотиевна Канева моз жӧ: «Война воясӧ велӧдан-воспитайтан уджын вӧлі уна сьӧкыдлун: би эз вӧв, ломтысим пескӧн. Став верстьӧ-дзоньвидза мужичӧйыс фронт вылынӧсь да, пессӧ заптылім велӧдысьяс и велӧдчысьяс. Эз тырмы учебник, тетрадь, ручка, чернила…».
Тайӧ кык аньыслӧн и олӧманыс ӧткодьлуныс уна. Найӧ кыкнанныс радейтісны йӧзсӧ, Чужан му, бӧрйӧм уджсӧ. Елена Парменовна Сорвачева зілис Петруньса школаын ветымын кык во.
Великӧй Отечественнӧй война дырйи да сыбӧрся сьӧкыд воясӧ Петруньса школаын чужан кыв да литература велӧдіс Глафира Петровна Хозяинова. Сійӧ уджаліс школаын 1942-ӧдсянь 1953 воӧдз.
1943 воын фронт вылысь воӧм бӧрын школаын зілис Айму вӧсна Ыджыд тыш вылӧ ветлӧм Иван Александрович Сорвачев. Медводз военрукаліс да нуӧдіс физкультура урок, а сёрӧнджык велӧдіс томуловӧс чертитчыны да ки помысь вӧчасьны. Школаын сійӧ зілис нелямынысь унджык во – 1984 воӧдз.
Мокчойса педучилище помалӧм бӧрын 1944 воӧ чужан сиктас ичӧт классъяс велӧдысьӧн бергӧдчис Фёдор Алексеевич Филиппов. Сёрӧнджык, Коми пединститутысь филология факультет помалӧм мысьт, зілис карса роноын инспекторӧн, Интаса 5-ӧд номера школаын завучӧн, директораліс рытъя школаын. Фёдор Алексеевич – народнӧй образованиеса отличник, Коми АССР-са заслуженнӧй велӧдысь.
Валентина Антоновна Хозяинова Петруньса школаӧ воис 1945 воын Сыктывкарын учительскӧй институт помалӧм бӧрын. Уна во сійӧ сетіс быдмысь войтырлы роч кывйысь да литератураысь тӧдӧмлун, завучаліс.
* * *
Петруньын олысьяс тӧдӧны, помнитӧны да видзӧны ас сиктса историясӧ, оз вунӧдны сиктсаясӧс. Война воясӧ да сы бӧрын Петруньса школаын уджавлӧм учительясӧс казьтывлӧны бурӧн, дасьтӧма и талы сиӧм торъя альбом. Сэні медводдза лист бокас ки помысь гижӧма: «Друзья – ребята! Чтите и цените наставников своих беспечных дней. В сердцах своих навеки запишите святые имена учителей»…
<> Татьяна Воробьева. Снимокъясыс Интаса асму туялан музейысь.