Таво заводитчӧмсянь Комиын 14 сюрсысь унджык семья босьтӧма оланінысь да коммунальнӧй услугаясысь мынтысьӧм вылӧ субсидия, тӧлысьнас шӧркодя 3.816 шайт.
Тайӧ сьӧма отсӧгсӧ шуӧма вичмӧдны налы, кодъяслӧн ЖКХ услугаясысь вештысьӧм кузя рӧскодыс артавсьӧ ӧтувъя чӧжӧссьыныс 22 прӧчентысь унджык.
Такӧд йитӧдын рӧштшӧтсӧ вӧчӧны субсидияла шыӧдчан тӧлыссяньыс воддза квайт тӧлысьсӧ босьтӧмӧн.
Шуам, мортыс кӧ шыӧдчис таво майын, сылысь да семьяыслысь ӧтувъя чӧжӧссӧ арталасны 2024 вося октябрсянь 2025 вося мартӧдз.
Тӧдчана, мый та дырйи тӧд вылӧ босьтасны семьяас быдӧнлысь доходсӧ, сы лыдын удждон, пенсия, стипендия, уджтӧмалӧмысь пособие, быдсикас социальнӧй сьӧма отсӧг да с.в.
Кыдзи висьталісны регионса удж, занятосьт да йӧзӧс социальнӧя доръян министерствоын, кольӧмвося сентябрсянь кокньӧдӧма оланінысь да коммунальнӧй услугаясысь мынтысьӧм вылӧ субсидия босьтанногсӧ.
Кодъяслы вичмӧ нин тайӧ сьӧма отсӧгыс, локтан во джын кежлас та могысь эм-ӧ правоныс, соцучреждениеын уджалысьяс налӧн шыӧдчывтӧг асьныс тӧдмаласны ведомствояскостса электрон-нӧй йитӧд пыр.
Сэк жӧ кутшӧмсюрӧ справка-кабала ковмас вайны аслыныс субсидия босьтысьяслы, шуам, стипендия да алимент босьтӧм кузя.
Регионса минтрудаӧн веськӧдлысьлысь удж вӧчысь Татьяна Майковалӧн висьталӧм серти, оланінысь да коммунальнӧй услугаясысь мынтысьӧм вылӧ субсидияла шыӧдчысьыс Комиын абу этша.
Тавося январсянь налы мынтӧма бюджетысь 198 миллион шайт.
* * *
Колӧ пасйыны, тайӧ сьӧма отсӧгыс оз вичмы налы,кодъяслӧн бӧръя куим вонас чукӧрмӧма ЖКХ услугаясысь вештысьӧм кузя уджйӧз, и та йылысь кывкӧртӧд вӧчӧма суд.
<> Гижӧдсӧ дасьтіс Александра АРТЕЕВА. Снимокыс ӧтуввезйысь.