Комиын олысьяс «Кадры» национальнӧй проектлӧн «Активные меры содействия занятости» федеральнӧй уджтас весьтӧ вермасны мынтысьтӧг босьтны содтӧд тӧдӧмлун-сям да выль профессия. Та йылысь унджык юӧр позьӧ тӧдмавны ӧтуввезйын «Работа России» порталын, а сідзжӧ кар-районса занятосьт службаын.
Кыдзи висьталісны регионса удж, занятосьт да йӧзӧс социальнӧя доръян министерствоын, Комиын олысьяслы тайӧ колана да тӧдчана. Та йылысь юалӧмъясӧн унаӧн шыӧдчылісны республикаса юралысьлысь удж вӧчысь Ростислав Гольдштейн дорӧ апрель 21 лунӧ «Веськыд йитӧд» пыр.
–И тайӧ гӧгӧрвоана, – пасйис минтрудаын министрлысь удж вӧчысь Татьяна Майкова. – Та могысь жӧ водзті вынсьӧдлӧм «Демография» нацпроектысь водзӧсыс вӧлі ыджыд: квайт сюрсысь унджык морт босьтісны содтӧд тӧдӧмлун-сям да выль специальносьт-профессия. Та вӧсна и Россияса президент Владимир Путинлӧн индӧд серти йӧзкӧд тайӧ уджсӧ шуӧма нуӧдны водзӧ, да та могысь вынсьӧдӧма «Кадры» нацпроект.
Сылӧн программаяс серти велӧдчыны вермасны матысса воясӧ пенсия вылӧ петан арлыдаяс, 50 арӧса да олӧмаджыкъяс, куим арӧсӧдз каганысӧ отпускын дӧзьӧритысьяс, сизим арӧсӧдз челядя аньяс, оз кӧ найӧ уджавны, инвалидъяс, уджтӧмалысьяс да занятосьт служба пыр удж корсьысьяс, спецоперацияын служитысьяс да налӧн матыссаяс, 2014 вося май 11 лунсянь ДНР-ын да ЛНР-ын тыш-косьса участникъяс.
«Кадры» нацпроект серти мынтысьтӧг позьӧ велӧдчыны и 35 арӧсӧдз том йӧзлы, армияын служитӧм либӧ велӧдчӧм йылысь документ босьтӧм бӧрас кӧ нёль тӧлысьысь дырджык абу вермӧмаӧсь инасьны удж вылӧ. Программаяс артыштӧма и налы, кодъяслӧн абу шӧр либӧ профессиональнӧй тӧдӧмлун.
Кыдзи тӧдчӧдісны ведомствоын, «Кадры» нацпроект серти шуӧма велӧдны йӧзсӧ медвойдӧр регионын медся колана профессияясӧ.
Содтӧд тӧдӧмлун-сям да выль профессия босьтӧм могысь Комиын олысьяслы колӧ мӧдӧдны шыӧдчӧмнысӧ «Работа России» портал пыр либӧ волыны кар-районса занятосьт шӧринӧ.
<> Гижӧдсӧ дасьтіс Александра АРТЕЕВА. Снимокыс ӧтуввезйысь.