Таво Сыктывкарын да матігӧгӧр посёлокъясын ӧзйыліс 68-ысь (мӧйму дорысь 16-18 прӧчентӧн унджыкысь). Та дырйи кувтӧдзыс сотчаліс 10, а доймаліс 4 морт (мӧйму та-тшӧмыс вӧлӧма 3 да 11). Медсясӧ неминучаыс суӧ керка-дачаын.
Кыдзи видзчысьны ускӧттьӧсьыс? Мый колӧ сюркнявны пель саяд истӧг тувйӧн чирк-ниттӧдз?
Тайӧ да мукӧд юалӧм вылӧ республикаса юралысьлӧн Общественнӧй приёмнӧйын вочавидзис Россияса МЧС-лӧн Главнӧй управлениеысь Сыктывкарын надзор да профилактика юкӧнӧн веськӧдлысьӧс вежысь Владислав Немчинов.
–Владислав Николаевич, тувсовъя кузь шойччан лунъясӧ унаӧн ропкисны, дасьтысим пӧ ветлыны дачаӧ да вадорӧ шашлык пражитны, а май 1-11 лунъясӧ йӧзӧдісны билы паныд водзсасян торъя режим…
–Мӧйму медунаысь ӧзйылӧма июньын (143) да майын (139), а медся этшаысь сентябрын (66). 207 пӧжар вӧлӧма вӧскресенньӧӧ, пекничаӧ – 153. Медсясӧ керка-патераын да мукӧд стрӧйбаын неминучаыс овлӧ пажын кадсянь квайт час рытӧдз.
Та вӧсна и йӧзӧдім билы паныд водзсасян торъя режим, медым йӧзыс эз личӧдчыны майся праздникъясӧ. Казьтышта, тайӧ кадас казялӧм тырмытӧмторйысь стрӧгджыка эськӧ кыским кывкутӧмӧ.
Дерт, йӧзыс неминучаӧ веськалӧны медсясӧ гажа юрӧн. Пӧжар дырйи татшӧмъясыс кувтӧдз пӧдӧны-сотчӧны. Найӧ чигаркаӧн водӧны вольпасьӧ, диван вылӧ, пуксӧн унмовсьӧны креслӧын. Папирос помыс усьӧ джодждӧра вылас, узьлан кӧлуяс да недыр мысти ыпнитӧ. Садь юра морт вермас на кыдзкӧ тшын дуксьыс либӧ сотчан дойсьыс садьмыны, а код юра мортыд оз и тӧдлы, пӧдас.
Сідз, «Горизонт» СНТ-са дачаын некымын лун гажӧдчӧмаӧсь. Май 4 лунлы воча войын стрӧйбаыс ыпнитӧма. Кор воӧмаӧсь кусӧдчысьяс, вылыс судтаыс сотчӧма нин. Бисӧ пӧдтӧм бӧрын буретш сэтысь аддзӧмаӧсь кык шой: 20 да 51 арӧса нывбабаяслысь. Улыс судтасьыс петкӧдӧмаӧсь тшынас пӧдӧм 24 арӧса мужичӧйӧс. 35 арӧса мужичӧй ачыс сяммӧма петны бисьыс.
Став сертиыс, ӧзйӧма пачсянь. Гудыр юрнад некод абу видзӧдӧма ломтысьӧм бӧрсяыс да.
–А мыйысь медся тшӧкыда ӧзйылӧ?
–Вӧрын ӧзйӧм дырйи кӧ тшӧкыда ыстысьӧны чардби вылӧ, керка-патера да мукӧд эмбур сот-чӧмысь медводз мыжа морт.
Медся унаысь таво ускӧттьӧыс сулӧма электроприборсянь, неуна этшаджыкысь – биӧн кужтӧма вӧдитчӧмысь, куритчӧм понда да пачсянь. Нӧшта этшаджыкысь – челядь мыж вӧсна да автомашинасянь.
Мӧйму серпасыс вӧлі мӧдджык. Сэки юркарын медунаысь ӧзйылӧма биӧн кикурӧда вӧдитчӧм да куритчӧм понда. Неуна этшаджыкысь ускӧттьӧыс суӧма шогмытӧм пачсянь. И медся этшаысь ыпнитлӧма электроприборсянь.
Тӧдӧмӧн ӧзтылӧмаӧсь дас кыкысь, мӧйму серти 17 прӧчентӧн унджыкысь. Гозъякост, рӧдвуж, тӧдсаяс вензьӧны-юксьӧны, а сэсся верӧсыс либӧ гӧтырыс ӧзтӧ керкасӧ, дачасӧ, машинасӧ, медым некодлы эз вичмы.
Татшӧм мыжсӧ, кыдзи и парма-ягын ки помысь пӧжар, туялӧ полиция. Ми сӧмын корсьысям сотчӧминас, чукӧртам миянлы коланаторсӧ да кывкӧрталам, мый вӧсна ӧзйис. Биыс кӧ паськалӧма кыкладорсянь, тайӧ стӧча нин тӧдӧмӧн лёксӧ вӧчӧм.
–Мый бӧрся видзӧдӧ ведомствоныд?
–Быд во мартын чукӧртчылам мэрияысь, МЧС-ысь, полицияысь специалистъяскӧд да сёрнитчам, кодлы мый колӧ вӧчны, медым лючки вуджны тулыс-арсӧ.
Нуӧдам профилактика удж. Волывлам предприятие-организацияӧ, велӧдчан учреждениеӧ, аддзысьлам и керка-патераын да дачаын олысьяскӧд. Казьтылам биысь видзчысьӧм, пачӧн, электричествоӧн видзчысьӧмӧн вӧдитчӧм, тулысын кос турун сотӧм йылысь, разӧдам памяткаяс, видзӧдам, медым стрӧйбаяс дорас вермисны матыстчыны кусӧдчан машинаяс, пожводоёмын вӧлі тырмымӧн ва да с.в.
Та дырйи подуласям 69-ӧд номера федеральнӧй оланпас вылӧ, кодӧс вынсьӧдӧма 1994 вося декабрь 21 лунӧ. Дерт, эм и уна мукӧд документ-индӧд. Шуам, 2020 вося сентябрь 16 лунӧ Россияса правительствоӧн вынсьӧдӧм 1479-ӧд номера постановлениеын стӧча индӧма, мый пред- приятие-организацияын колӧ видзӧдлыны шоныд сетан став оборудованиесӧ, электроприборсӧ. Мыйкӧ кӧ жугалӧма, дзоньтавны либӧ вежны. Котельнӧйӧ да шоныд сетан оборудованиеӧн вӧдитчанінӧ колӧ инавны уджавны сӧмын та могысь велӧдчӧм да кывкутысь специалистӧс.
Керкаын пачӧн вӧдитчысьлы тшӧтш колӧ сюся видзӧдлыны, абу-ӧ кыткӧ потӧма, лючки-ӧ пӧд-лассьӧ ӧдзӧсыс. Гашкӧ, колӧ вежны сотчӧм кирпич, мавтны потассӧ сёя сорасӧн да белитны. Пач вом водзвылас колӧ вольсавны 50 сантиметр пасьта да 70 кузьта кӧрт лист. Тӧлысьнас ӧтчыд пач трубасӧ колӧ весавны саысь.
–Кутшӧм нӧшта вежсьӧм пыртӧма билы паныд водзсасьӧм кузя оланпасъясӧ?
–Быд во унатор вежсьӧ оланпасъясын. Ылӧсас 85 прӧчентсӧ выльмӧдӧны. Гӧгӧрвоана, тӧд-чымӧн чорзьӧдӧма оланпасъяс, кодъяс серти шуӧма торйӧн ёна дорйыны пӧжарысь детсад-ясли, школа да мукӧд велӧдчанін, челядьлы шойччан лагеръяс, перинатальнӧй шӧринъяс, социальнӧй интернат-керкаяс да ваӧн могмӧданінъяс.
Уна вежсьӧм пыртӧма пиротехникаӧн вӧдитчӧм кузя.
Комиын 250 сикт-посёлок, позьӧ шуны, парма-ягын. Вӧрыс кӧ ӧзъяс, биыс вермас ньылыштны и керкаяссӧ. Сыктывкаркӧд орччӧн эмӧсь жӧ татшӧм посёлокъясыс. Оланпасъяс, Россияса президентлӧн да правительстволӧн индӧдъяс серти татшӧм сикт-посёлок гӧгӧрыс колӧ керавны пуяссӧ, медым вӧр да сыкӧд орчча керкаяс костас вӧлі куш му либӧ лыа.
Судъяс меставывса администрацияӧн веськӧдлысьяслы та вылӧ жӧ индӧны, стрӧжитӧны, но найӧ немтор оз вермыны вӧчны, муыс вӧр фондын да. Колӧ кад, медым вуджӧдны сійӧс кар-посёлок борд улӧ. Юркарын дас во нин нуӧдӧны тайӧ уджсӧ.
–Кӧть талун билы паныд водзсасян торъя режимыс абу, кыдз колӧ видзчысьны неминучаысь?
–Медводз, оз позь биасьны вӧрын, керасын. Ӧд гӧгӧр посньыд понӧль, чаг-рос, пилипызь, кос яла-нитш да турун.
Бипур позьӧ пестыны, матысса стрӧйбаӧдз кӧ 50 метр. Сэсся матігӧгӧрсӧ мед вӧлі весалӧма кос турунысь да лӧп-ёгысь. Шашлык пражитӧм могысь мангалсӧ позьӧ пестыны керкасянь 5 метр ылнаын. Бипур да мангал гӧгӧрыс мед вӧлі 1,4 метр куш му либӧ лыа. Орччӧн колӧ сувтӧдны гоз-мӧд ведра ва.
Дерт, оз позь биасьны тӧла поводдя дырйи.
Би бӧрсяыс колӧ сюся видзӧдны. Мӧйму олӧма ань дачаас чукӧртӧма ёгсӧ да биасьӧма, а ачыс пырӧма тшай юны. Тӧв нырыс би киньяссӧ шыбитӧма орчча стрӧйбаяс вылас. Сотчӧма аньыслӧн эмбурыс, да тшӧтш и суседыслы лоӧма ускӧттьӧ.
Весиг здук кежлӧ оз позь кольны бипурсӧ челядьлы, кыдзи и ломтысян пач да включитӧм электроприбор. Дерт, колӧ саймовтны наысь истӧг-зажигалка да сись.
Унаӧн куритчигас пепельнича пыдди гаровтӧны кабалаысь кулёк либӧ пӧимсӧ печлалӧны истӧг кӧрӧбӧ, тыртӧм сигарет пачкаӧ. Бӧрас шамыртӧны да чӧвтӧны урнаӧ, шыблас контейнерӧ. А недыр мысти нин сэні ставыс заводитӧ тшынасьны-сотчыны. Чигарка пом оз позь шыбитны и лифт шахтаӧ, кос турунӧ да сідз водзӧ.
Оз позь видзны керка-патера жырйын, подъездын, йирк вылын да балкон-лоджияын, гӧбӧчын ломтас-мавтаса, краскаа да мукӧд химия сораса банка-канистра.
Пескӧн ломтысян пачӧ оз позь шыблавны из шом либӧ койыштны мазут-бензин. Унаӧн косьтӧм могысь тэчӧны уль плакасӧ пач водзас. Тырмымӧн ичӧтик ӧгыр, и…
Ваймӧм пачысь пӧимсӧ оз ков чукӧртны картон кӧрӧбӧ, фанера ящикӧ, кабала либӧ целлофан мешӧкӧ. Пӧимас би кинь вермас лун-мӧд на ӧгыравны. Бурногӧн кӧ, пӧимсӧ колӧ кыскавны кӧрт дозйӧ да кисьтыштны сэтчӧ ва.
Оз позь вӧдитчыны жугалӧм, ас вӧчӧм электроприборӧн, сідз шусяна «жучокӧн». Уналысь казявлан стенса проводас бовъялысь да изолентаӧн гартӧм розетка. Ме эськӧ ӧлӧді вӧдитчыны тройникӧн да ӧттшӧтш включитны чайник, СВЧ-пач да утюг. Быд прибор колӧ чуткыны торйӧн. Унаӧн удлинительсӧ нюжӧдӧм могысь йитӧны сійӧс мӧд да коймӧд удлинительӧ. Тадзи вӧчны оз позь. Розеткасянь приборӧдз мед вӧлі ӧти провод.
Электропроводка нюжӧдігӧн колӧ вӧдитчыны кабельпроводӧн, гофра трубкаӧн. Проводсӧ оз позь тувъявны веськыда шпалерас.
–А кыдз стрӧжитӧны пӧжарлы паныд водзсасян правилӧяс торкалӧмысь?
–Торъя йӧзлысь кикурӧда биӧн вӧдитчӧмысь водзті перйылісны 1-4 сюрс шайт, а талун ковмас мынтыны 5-20 сюрс нин. Сідз шусяна юридическӧй лицо водзті вештыліс 40-50 сюрс шайт, ӧні жӧ штрапыс – 100-500 сюрс.
Нӧшта казьтышта, казялінныд кӧ пӧжар, пыр жӧ звӧнитӧй 01 либӧ 112 номера телефон пыр.
<> Николай РАЗМЫСЛОВ. Снимокъясыс авторлӧн да ӧтуввезйысь.