Май 6 да 8 лунъясӧ Виктор Савин нима драмтеатрын петкӧдлісны «Уляшёвы» выль спектакль, кодӧс сиӧмаӧсь Ыджыд Вермӧмсянь 80 во тырӧмлы.
Режиссёрыс Денис Рассыхаев индӧма постановкаыслы героическӧй поэма жанр.
Кыдзи пасйис театрӧн веськӧдлысь Михаил Матвеев, республикаын олысьяслы кӧть тайӧ – спектакль, кӧть Виктор Кушмановлӧн документальнӧй повесьт (театрлы пьесасӧ Виктор Кушмановлӧн повесьт серти гижӧма Лариса Ершова) – тайӧ миян история.
Война кадӧ Кулӧмдін районса Бадьёльйылысь Айму дорйыны мунӧмаӧсь да гортас ловъяӧн абу воӧмаӧсь 112 Уляшев. И подвигыс, дерт, тӧдчана абу сӧмын миян республикаса олысьяслы, но и ставнас страналы.
Спектакльыс заводитчӧ шуда здуксянь: Бадьёльйылӧ армияысь воӧма Ёгор Уляшев. Ставӧн, дерт, радлӧны. Том мортлӧн водзын радейтана Нинуккӧд быдса олӧм. Ёгор коралӧ Нинаӧс, ныла-зонма кикутӧны. Сиктсаяс сьылӧны гудӧк улӧ. Но шуда олӧмыс регыд гудыртчӧ – заводитчӧ война.
Сьӧрсьӧн-бӧрсьӧн фронт вылӧ мунӧны сиктысь мужичӧйяс…
Фашисткӧд тышсӧ оз петкӧдлыны. Салдатъяс мыччысьлӧны сӧмын тылӧ кольӧм аньяслӧн мӧвпъясын, кор лыддьӧны фронт вывсянь письмӧсӧ.
Курыд кадыс мыччысьӧ аньяс пыр, кодъяс тшыг нисьӧ пӧт бертісны Ыджыд Вермӧм ради сьӧкыд удж.
–Документальнӧй повесьтсӧ вӧчим художественнӧйӧн. Спектакль жанрнас инді героическӧй поэма, сы вӧсна мый тайӧ – война кадӧ аньлӧн подвиг. Войвылын тылын аньяс отсасисны фронтлы. Налӧн, а тайӧ мамъяс, чойяс, ыджыд мамъяс, гӧтыръяс, пельпом вылӧ усис ыджыд удж. Налӧн вынлы, терпенньӧлы, виччысьны кужӧмлы ми и муӧдз копыртчам асланым ӧнія уджын, – висьталіс Денис Рассыхаев.
Художник-постановщикыс Полина Карпухина сцена вывсӧ, позьӧ шуны, юкӧма кык пельӧ. Пыдіас тыдаліс пармаӧ вӧйӧм коми сикт, а авансцена вылас серпасыс вежласис: вӧлі и керка жыр, и сиктса улича, и вӧр делянка. Паськӧмъясын тшӧтш вӧліны кутшӧмкӧ да пасъяс, кодъяс индісны и коми вылӧ либӧ война кад вылӧ. Зэв тӧдчана пасӧн вӧлі, кыдзи аньяс домасьӧмӧн кыскисны ыджыд гӧр (комияс шуӧны гӧрны-уджавны).
Галина Микова ворсіс Устиньяӧс, кодлӧн война вылӧ муніс сизим пи, и сӧмын ӧти, Иван, локтіс ловйӧн.
–Виктор Кушманов уджавліс миян театрын, да ми, арлыдаджык ворсысьяс, ёртасим сыкӧд. Война йылысь уна книга лыддьылі да уна кино видзӧдлі, но тайӧ медся ёна дойдіс сьӧлӧмӧс. Гаш-кӧ, сы понда, мый ӧні тшӧтш олам война кадӧ. Виктор Витальевич уна гижис аньяс йылысь, кодъяс овлісны война кадӧ, но тайӧ гижӧдыс, ме серти кӧ, медся ён. И тайӧ постановкаыс, чайта, вӧрзьӧдас сьӧлӧмсӧ видзӧдысьлысь.
Казьтыштам, режиссёр Нина Чадоромцева коркӧ снимайтліс «Уляшёвы» кино, кӧні Денис Рассыхаев тшӧтш петкӧдчис, ворсіс Устиньялысь Феодосий писӧ (Вера Габова снимайтчылӧма жӧ и ворсӧ тайӧ спектакльын). Денис Рассыхаев висьталӧ, киноысь пӧ нинӧм эг босьт. Стӧчджыка кӧ, и Нина Маркеловна, и сійӧ подуласьӧмаӧсь Виктор Кушмановлӧн гижӧдӧ. И та вӧсна пӧ, дерт, мыйкӧ лоас ӧткодьыс.
Сідзжӧ Денис Рассыхаев тӧдчӧдіс, мый киноыс – документальнӧй быт, а спектакльын уна пас.
–Помнита, ичӧтдырйи вӧлі листала важ фотокарточкаяса альбом, а бабӧй висьтавлӧ на йылысь, кодъяс сэні. Тайӧ постановкаыс быттьӧ тшӧтш альбом листалӧм. Снимок вывсьыс йӧзсӧ, налысь образъяссӧ ми ловзьӧдім сцена вылын. (Кор ме видзӧді «Уляшёвы» спектакльсӧ, вӧр пӧрӧдысь аньяс пӧвстысь аддзи ассьым ыджыд мамӧс. Сылы вӧлӧма 12 арӧс, кор заводитчис война, а 14 арӧс да джынйӧн мамыс нуӧдӧма сійӧс вӧр пӧрӧдны, арлыдсӧ содтӧма да. – Е.М.)
–Денис Александрович, кутшӧм сьӧлӧмкылӧмъясӧн сэки снимайтчинныд киноын и ӧні нин дасьтінныд тайӧ постановкасӧ кыдз режиссёр?
–Сэки ме том на вӧлі, медводдза либӧ мӧд курсын велӧдчи. И киноын снимайтчӧмыс вӧлі миянлы приключение кодь, сы вӧсна мый эг пыдӧ пырӧдчӧй материалас: кыдзи шуисны ворсны, сідзи и вӧчим. А ӧні, дерт, дзик мӧд ног. Тайӧ миян история, миян дой, кодӧс некор он вунӧд.
–Збыль, зэв сьӧлӧм вӧрзьӧдана постановка, видзӧдігӧн синватӧ он кут…
–Оз пыр ков видзӧдысьӧс гажӧдны. Колӧ корсюрӧ налы и пукыштны-шогалыштны. Кодкӧ казьтыштас, кодкӧ тӧдмалас мыйкӧ. Тані абу гажаа чиктылӧм-чеччалӧм. А мыйысь чиктывнысӧ? Сиктӧ кӧ быд лун воӧны усьӧм салдатъяс йылысь юӧръяс. Война вылын кӧ салдатъяс асьнысӧ гажӧдӧм ради и сьылісны, и шмонитісны, а тылын аньяс олісны сӧмын уджӧн, мед сьӧлӧмныс шогысла эз пот. Ме шензя, кыдзи найӧ нёль-вит во эз узьны: луннас уджалісны фронтлы, войнас – аслыныс. Ӧд быдӧнлӧн на вӧлі горт овмӧс, кодлӧнкӧ ичӧт челядь.
Ме зэв ёна надейтча, мый тайӧ спектакль бӧрын дугдасны шуны Сыктывкарын Куслытӧм би дорын усьӧм салдатъяслы мемориалсӧ «бабы жарят крокодилаӧн», – тӧдчӧдіс Денис Рассыхаев.
* * *
Колӧ пасйыны и сійӧс, мый кадысь кадӧ спектакльын юргис коми кыв, коми сьыланкыв (кикутігӧн, потанын кага качайтігӧн).
А бӧрас став артистыс еджыд паськӧмӧн петісны сьывны «Коми ань», но роч вылӧ вуджӧдӧмӧн. А куим ань шӧрас сулалісны Куслытӧм би дорын мемориал моз: мам, гӧтыр да чой…
<> Екатерина МАКАРОВА. Снимокъясыс Юлия ЛЕГОТИНАЛӦН.