Сикт-грездын вогӧгӧрся спартакиадакӧд йитӧдын Кӧрткерӧс районса Шойнатыын неважӧн котыртлісны пневматика винтовкаӧн лыйсян районса ордйысьӧм.
Адзорӧмысь команда сэні шедӧдіс медводдза места, а ӧткӧн петкӧдчигӧн медбурӧн лои Екатерина Морозова. Адзорӧмысь жӧ Виктория да Максим Казакевичьяс босьтісны коймӧд места.
Виктория Казакевич уджалӧ Адзорӧмса школаын ичӧт класса челядьӧс велӧдысьӧн. Таысь кындзи сійӧ – спорт кузя инструктор. Чужӧма-быдмӧма Кӧрткерӧс районса Выльыб грездын. Школа помалӧм бӧрын велӧдчӧма Куратов нима педколледжын да сэсся заводитӧма уджавны Адзорӧмын. Сэні жӧ петӧма верӧс сайӧ. Радейтана Максим верӧсыскӧд, коді ӧні МВД-са пенсионер, быдтӧны пи.
–Спортӧ заводиті пырӧдчыны школаын велӧдчигӧн на. Ворсі да и ӧнӧдз ворса волейболӧн, баскетболӧн, тшӧтш и котравны радейті – мыйын сӧмын эг видлы кужанлун-сямӧс. Винтовкаӧн заводиті лыйсьыны школаын 8-ӧд классын ОБЖ урокъяс дырйи. Велӧдіс-тренируйтіс миянӧс Ыджыдвидз сиктысь ОБЖ урок нуӧдысь, ӧні спорт кузя инструктор Михаил Иванович Симпелев. Сэксянь нин меным тайӧ спорт сикасыс воӧ сьӧлӧм вылӧ. Ветлывлі быдсяма ордйысьӧм вылӧ, тшӧтш и школа помалӧм бӧрын, – висьталӧ Виктория.
Пневматика винтовкаӧн лыйсьӧм кузя пӧ ыджыд вермӧм абу на, но верӧсыскӧд тшӧкыда петкӧдчӧны быдсяма татшӧм ордйысьӧмас. Та могысь бурджык винтовка весиг кӧсйӧ ньӧбны.
–Гоз-мӧд во сайын район тшупӧдын босьтлі коймӧд места. Таво коймӧдӧн жӧ лоим верӧскӧд. Колӧ пасйыны, мый Шойнатыын неважӧн лыйсигӧн мӧд местасӧ босьтіс менам мам Арина Николаевна Макарова. Сійӧ и медводдзасӧ босьтлӧ район тшупӧдын. Кыдзи и ме, велӧдӧ ичӧт класса челядьӧс, – водзӧ нуӧдӧ сёрнисӧ Виктория.
Шуӧны, пневматика винтовкаӧн лыйсигӧн пӧ мортыс велалӧ лоны повтӧмӧн, писькӧсӧн, сӧвмӧ сылӧн паметьыс. Тайӧ спорт сикасыс ышӧдӧ томуловӧс кутчысьны дзоньвидза оласногӧ.
Спорт кузя инструкторлы пыр колӧ сӧвмӧдны кужанлун-сямсӧ, унакӧд ёртасьны. Адзорӧмын Виктория Казакевич ёнджыкасӧ уджалӧ 35 арӧса да верстьӧджык войтыркӧд, ёртасьӧ клубын, а ӧні тшӧтш и библиотекаын уджалысьяскӧд.
–Сикт-грездын спортыд зэв колана и томуловлы, и верстьӧлы. Водзті посёлокса тшӧкыда чукӧртчывлісны волейболасьны, но школасӧ ремонт вылӧ тупкӧм бӧрын эз на артмыв ворснысӧ. Спорт радейтысьяс виччысьӧны ывлаын шондӧдӧм. Миянлы колӧ эськӧ спорт база, ин, кӧні позяс чукӧртчывны да тренируйтчыны. Быдӧнлы мед позис сэні пӧльзаӧн коллявны прӧст кадсӧ. Сэки, чайта, унджыкӧн кутасны пырӧдчыны спортӧ. Мӧд-кӧ, ёна колӧны сідз шусяна универсальнӧй тренеръяс. Ме эськӧ и ачым татшӧм дорас радпырысь кута волывлыны, – юксьӧ аслас мӧвпъясӧн водзмӧстчысь ань. – А район тшупӧдын спорт сӧвмӧ. Нӧшта бур эськӧ котыртлыны нималана спортсменъяскӧд аддзысьлӧмъяс, медым татшӧм ногӧн ныв-зонмӧс да арлыда нин войтырӧс ышӧд-ны кутчысьны дзоньвидза оласногӧ.
Районын спорт сӧвмӧдӧм кузя Викториялӧн уна дум-кӧсйӧм. Но ставсӧ пӧ ог удит, медшӧр удж вылӧ уна кадыс мунӧ да.
–Ичӧт класса челядьӧс велӧда 2020 восянь. Кор школа помалӧм бӧрын ковмис бӧрйыны, кытчӧ водзӧ мунны велӧдчыны, стӧча тӧді, кодӧн кӧсъя лоны. Пыри Сыктывкарса канму университетӧ, мед англия да коми кыв велӧдысьӧн лоны, но во мысти вуджи педколледжӧ. Мыйла? Ог тӧд. Мыйкӧ вӧлi оз тырмы. Ичӧт класса челядькӧд уджавны интереснӧ. Ӧнi менам классын 11 нывка да зонка, и быдӧн аслыспӧлӧс, быдӧнкӧд колӧ кужны сёрнитны, быдӧнӧс колӧ радейтны. Челядь велӧдӧны мӧд ногӧн олӧм вылас видзӧдны. Найӧ кужӧны радлыны, скӧравны, серавны, бӧрдны тані и ӧні, сьӧлӧм-кылӧмсӧ ас пытшкас оз дзебны, – водзӧ висьталӧ ань. – Сьӧкыдлуныс сыын, мый велӧдан юкӧнын ӧтарӧ мыйкӧ вежсьӧ, он удит ӧтиторйӧ велавны, мӧдтор нин колӧ збыльмӧдны. Медым лоны бур велӧдысьӧн, пыр колӧ велӧдчыны, выль тӧдӧмлун босьтны. Дерт, абу кокни. Содтӧд на, Адзорӧмса школа ремонт вылӧ пӧдлалісны да, челядь велӧдчӧны Приозёрнӧйын да Маджаын. И ставӧн виччысям, кор нин радейтана школанымӧс восьтасны.
<> Екатерина МИКУШЕВА. Снимокъясыс ӧтуввезйысь.