Айму вӧсна Ыджыд тышын Вермӧмсянь 80 во тыригкежлӧ Изьва районса Щельяюрын «Народнӧй бюджет» уджтас серти кыпыда восьтісны войнаын усьӧмаясӧс казьтылан мемориал комплекс. Сійӧс вӧчисны важмӧм памятник пыдди.
Щельяюрса администрацияӧн веськӧдлысьлысь удж вӧчысь Василий Назаренко казьтыштіс чукӧртчӧмаяслы, мый 1941-1945 воясӧ фронт вылӧ посёлокысь муніс 600-ысь унджык морт.
–Победа шедӧдӧмсянь колис 80 во нин, но сійӧ миянлы ӧнӧдз зэв тӧдчана. Ми век кутам помнитны фронт вылын да тылын Победа дорысьясӧс. И тайӧ казьтылан пассӧ восьтӧмӧн ми нӧшта ӧтчыд нэммӧдам Айму дорйысьяслысь югыд паметьсӧ, – висьталіс Василий Назаренко.
Отеч Иаков вежӧдіс воинъяслы сиӧм мемориал комплекссӧ да пасйис, Ыджыд Победа шедӧдӧмыс пӧ – став войтырлӧн ӧтувъя удж-зільӧм.
Та бӧрын Великӧй Отечественнӧй войнаын Айму дорйысьясӧс казьтыштісны здук чӧв-лӧньӧн.
«Народнӧй бюджет» серти Щельяюрын мемориал комплекссӧ вӧчӧм могысь вӧлі видзӧма республикаса сьӧмкудйысь 1,990 миллион да меставывса бюджетысь 297.750 шайт, нӧшта 150 сюрс шайт чукӧртісны посёлоксаяс.
Памятникыс гӧрд гранит плитаясысь. Шӧрас сьӧд гранит стелаын серпасалӧма веськыд киас меча да шуйгаас – нывкаа салдат. Стела ӧтар-мӧдарас – Гӧрд Звезда да Отечественнӧй война орденъяс, а уліас – пӧгибнитӧм фронтӧвикъяслӧн ним-вич-ова плитаяс. <>
Алина Латышева. Снимокыс ӧтуввезйысь.