Оланін дзоньтавны – сьӧма отсӧг
Ыджыд Вермӧмсянь 80 во тырӧмкӧд йитӧдын Коми Республикаса ветеранъяслы вичмӧдасны оланіннысӧ дзоньталӧм могысь сьӧма отсӧг. Тайӧс лоӧ вӧчӧма регионса веськӧдлысьлӧн тшӧктӧм серти.
Компенсациясӧ мынтасны дзоньталӧм вылӧ видзӧм мында, но 100 сюрс шайтысь оз унджык. Татшӧм отсӧгсӧ урчитӧма вичмӧдны Айму вӧсна Ыджыд тышса ветеранлы да вермытӧмлы, фашист концлагерӧ веськавлӧмалы, Великӧй Отечественнӧй войнаса участник-инвалидлӧн дӧва-дӧвечлы да тылын зільысьлы.
–Сьӧмсӧ мынтасны ӧтчыдысь ставнас, но сійӧс босьтны позяс сӧмын дзоньтасьӧм бӧрас нин, – гӧгӧрвоӧдіс удж, занятосьт да йӧзӧс социальнӧя дорйӧм кузя министрӧс вежысь Александр Хохлов. – Оланінсӧ колӧ выльмӧдны-дзоньтавны пӧдрада котыркӧд либӧ ас вылӧ уджалыськӧд сёрнитчӧм кырымалӧмӧн. Та дырйи керка-патераыс мед вӧлі Коми Республикаын, а ветераныс вӧлі сэні кӧзяинӧн да пыр оліс, тшӧтш и пасйысьӧма на дай.
Тӧдчана тшӧтш, сьӧма отсӧгсӧ оз мынтыны овны шогмытӧм керка-патера дзоньталӧм-выльмӧдӧмысь.
Компенсациясӧ вичмӧдны корӧмӧн колӧ шыӧдчыны тавося ноябрь 1 лунӧдз йӧзӧс социальнӧя доръян шӧринӧ.
Республикаса ветеран сӧветысь юӧр серти, оланінсӧ дзоньталӧмысь сьӧма отсӧгла регионын вермас шыӧдчыны ылӧсалӧмӧн 140 ветеран. Ӧні минтрудсоцын, социальнӧя доръян шӧринъясын да меставывса асвеськӧдлан тэчасъясын зільысьяс стӧчмӧдӧны лыдпасъяссӧ, а сідзжӧ тӧдмалӧны, кодлы ковмас дзоньтасьӧмын да колана документъяс чукӧртӧмын отсӧгыс.
Шойччасны-ёнмӧдчасны
Ыджыд Победалы 80 во тырӧмкӧд йитӧдын «Максаковка» социально-реабилитационнӧй шӧринын шойччасны-ёнмӧдчасны 100 ветеран да война кадся челядь.
Дзоньвидзалунсӧ бурмӧдны найӧ кутасны апрель 28-ӧдсянь май 15 лунӧдз. Та йылысь «Победа» оргкомитет чукӧртчылігӧн юӧртіс Коми Республикаса правительствоӧн веськӧдлысьӧс вежысь Екатерина Грибкова.
Регионса ветеран сӧветӧн вӧзйӧм серти шойччысь-ёнмӧдчысьяс лыдын Айму вӧсна Ыджыд тышса ӧти участник да кык дӧва, тылын 16 зільысь, фашист концлагерӧ тыр арлыдтӧмӧн веськавлӧм 10 да война кадӧ быдмӧм 71 морт.
Традиция серти олӧма йӧзӧс нуласны Сыктывкарӧ кыпыд концерт вылӧ, а Май 9 лунӧ найӧ видзӧдасны Степан изэрдын парад да аддзысьласны Коми Республикаса юралысьлысь удж вӧчысь Ростислав Гольдштейнкӧд.
Та кындзи 18 лунӧн олӧма йӧзлы котыртласны «Максаковка» шӧринын сьылан-йӧктан да ветеран котыръяскӧд, а сідзжӧ школаын велӧдчысьяскӧд да томуловкӧд рыт-аддзысьлӧмъяс.
Стройын — верстьӧ, челядь, техника…
Май 9 лунӧ Сыктывкарса Степан изэрдын парадын петкӧдчас дас ӧти расчёт.
Коми Республикаса военнӧй комиссар Дмитрий Фединлӧн висьталӧм серти, Ыджыд Вермӧм лун кежлӧ дасьтысьӧны ӧнісянь нин. Торйӧн кӧ, котыртлӧны техникалы, салдат-служащӧйяслы, кадет-юнармеечьяслы да колледжын велӧдчысьяслы парадӧн ветлан тренировкаяс.
Май 9 лунӧ 11 часын Степан изэрд кузя кыпыда восьлаласны-маршируйтасны 5134-ӧд войскӧвӧй часьтын, пӧрадок видзан тэчасын да МЧС-ын служитысьяс, медицина да торгово-экономическӧй колледжъясын тӧдӧмлун босьтысьяс, кадетъяс да юнармеечьяс. Петкӧдчасны 500 гӧгӧр морт да 19 техника.
Та бӧрын юркарын олысьяслы да гӧсьтъяслы котыртласны уна сикас площадка да концерт. Сідз, «Победалӧн шылад» арт-проект збыльмӧдысьяс дорын позяс ливкйӧдлыштны война кадся сьыланкывъяс да йӧктыштны, «На привале» да «Гӧрд гвоздика» концертъяс дырйи нимкодясьны сійӧ воясся жӧ сьыланъясӧн. Нуӧдасны тшӧтш быдсикас мастер-класс да флешмоб, «Война кадся челядь» фотовыставка, ярманга да с.в. А рытнас юркарса шӧр изэрдын юргас «80 во Вермӧм пас улын» концерт.
<> Гижӧдъяссӧ дасьтіс Елена ПЛЕТЦЕР. Снимокъясыс ӧтуввезйысь.