Нёль да джын сюрсысь унджык шыӧдчӧм воис Ростислав Гольдштейнлы апрель 21 лунӧ ӧтуввезйын «Веськыд йитӧд» пыр. Республикаса юралысьлысь удж вӧчысь вочавидзис комын сайӧ юалӧм вылӧ.
Эфирсӧ нуӧдісны «Молодёжка Народного Фронта» котырысь координатор Дарья Крепышева да Эжваса спортшколаысь директор, «Пера. Путь героя» регионса программаӧ пырӧдчысь Виталий Шкоропада.
Тӧв бӧрын кар-сикт-посёлокын пелькӧдчан уджӧ чина йӧзӧс сибӧдӧм йылысь юалӧм вылӧ вочавидзигӧн Ростислав Гольдштейн пасйис, мый республиканымӧс сӧстӧмӧн вӧчӧмыс миян ӧтувъя мог, и быдӧнлы колӧ пуктыны тайӧ уджас ассьыс пай, тшӧтш и апрель 26 лунӧ субӧтник вылӧ петалӧмӧн.
–Ачым быть кута субӧтникавны да кора ставнытӧ ӧтлаын вӧчны кар-посёлокнымӧс сӧстӧм-джыкӧн, – шыӧдчис республикаын олысьяс дорӧ регионӧн веськӧдлысь.
Победасянь 80 вося юбилей водзын ветеранъяслы содтӧд сьӧм сетӧм йылысь висьталігӧн Ростислав Гольдштейн пасйис, май 9 лунӧдз пӧ налы быдӧнлы воас сьӧмыс, и та могысь некодлы некытчӧ шыӧдчыны оз ков. Федеральнӧй индӧдъясын урчитӧм сьӧма отсӧг дорӧ содтӧд Комиын Великӧй Отечественнӧй войнаын тышкасьысьяслы да инвалидъяслы мынтасны 50 сюрс шайтӧн, тылын уджалысьяслы, фашист лагеръясӧ веськавлӧм челядьлы, война вылын тышкасьысьяслӧн дӧваяслы, блокада кытшӧ босьтӧм Ленинградын, а сідзжӧ Севастопольын да Сталинградын олысьяслы – 20 сюрс, война кадся челядьлы – 5 сюрс шайтӧн.
«Веськыд йитӧд» дырйи Сыктывкарын олысь нывбаба элясис, Куслытӧм бидорса скверын пӧ аллеяясас асфальтыс шогмытӧм, и 92 арӧса мамӧйлы пӧ сьӧкыд лоас восьлавны татшӧм туйӧдыс мемориал дорас.
Ростислав Гольдштейн вочавидзис сылы, Куслытӧм би дорын пӧ дзоньтасян уджсӧ лоӧ эштӧдӧма Ыджыд Вермӧм лунӧдз.
–Торъя военнӧй операцияын тышкасьысьяс ыджыд водзӧсӧн вермасны уджавны власьт тэчасын. Найӧ веськыд сёрниа войтыр, век дасьӧсь отсавны ёрта-ёртыслы, збыльмӧдны сэтшӧм могъяс, мыйӧ мукӧдыс оз и босьтчыны. А медся бурыс, мый эм наын, – Айму дорӧ муслун, – пасйис республикаӧн веськӧдлысь «Пера. Путь героя» конкурс йылысь висьтасигӧн. – Тайӧ конкурсыс миян регионлы зэв тӧдчана, ӧд вермысьясыслӧн лоас позянлун уджавны власьт тэчасын. Кодлӧн та пӧрйӧ эз артмы веськавны на лыдӧ, босьтас содтӧд тӧдӧмлун да мӧдысь видлас вынсӧ конкурсас. И сэки сылӧн артмас.
Федеральнӧй законын вежсьӧмъяс серти сикт-посёлокын власьт тэчассӧ шуӧма киритны. Но, кыдзи висьталіс Ростислав Гольдштейн, Коми – зэв ыджыд регион, и миян республикалы лӧся-лӧджык меставывса власьтлӧн кык тшупӧда – муниципалитетса да сикт-посёлокса – тэчасыс. Ми пӧ зілям кыпӧдны сэні зільысьяслысь тӧдӧмлунсӧ, мед найӧ бурджыка вермисны дорйыны йӧзлысь корӧмъяссӧ да збыльмӧдны вӧзйӧмъяссӧ.
Талы отсалӧ и «Гордость. Уверенность. Победа» проект. Сы серти республикаса быд карын да районын котыртласны форум, кытчӧ чукӧртчыласны меставывса власьт тэчасын уджалысьяс да общественнӧй котыръясын водзмӧстчысьяс.
–Проектыс ӧтувтас найӧс, кодъяс кӧсйӧны вӧчны республиканымӧс сэтшӧмӧн, мед быдӧн вермис гӧрдитчыны сыӧн, – пасйис Ростислав Гольдштейн.
«Веськыд йитӧд» дырйи регионӧн веськӧдлысь тӧдчӧдіс, ыджыд да паськыд республикаын пӧ колӧ, мед медся ылі сикт-грездӧдз позис воӧдчыны. Тайӧ кӧ пӧ оз ло, йӧзыс эновтасны чужанінсӧ да овмӧдчасны мукӧдлаӧ.
–2025 воӧ нин босьтчам пӧртны олӧмӧ транспорт инфраструктура выльмӧдан программа, – шуис сійӧ.
Уджтас сертиыс урчитӧма ньӧбны Воркутаӧ да Кулӧмдін районӧ 10 ыджыд да 4 шӧрпӧлӧс автобус, Удораӧ катер да баржа. Нӧшта 7 миллион шайт лоӧ торйӧдӧма Пыисдін сиктын Мозын ю вомӧн вуджӧдчан паром дзоньталӧм вылӧ. Сідзжӧ индӧма туявны транспортӧн могмӧдан юкӧнысь медся сьӧкыд мытшӧдъяс да дасьтыны найӧс венӧм кузя вӧзйӧмъяс.
Республикаса юралысьлысь удж вӧчысь дорӧ уна юалӧм вӧлі и культура керкаяс да социокультура шӧринъяс дзоньталӧм-стрӧитӧм йылысь.
–Культура министерство корис нин Кӧрткерӧс районса Шойнатыын да Сыктыв районса Первомайскӧйын культура керкаяс стрӧитӧм вылӧ федеральнӧй субсидия. И 2026 воын ми найӧс кутам нин кыпӧдны. Медым лэптыны культура керка, шӧркодя колӧ 126 миллион шайт. Уджсӧ ӧддзӧдӧм могысь лоӧ дасьтӧма типӧвӧй проектъяс, – висьталіс Ростислав Гольдштейн.
2025 вося февральын республикаса культура министерство ыстӧма Россияса ведомствоӧ квайт татшӧм шыӧдчӧм. Шойнатыын да Первомайскӧйын кындзи культура керкаяс да социокультура шӧринъяс кӧсйӧны стрӧитны Сыктывдінса Лӧзымын, Емдін районса Студенечын, Кулӧмдін ра-йонса Дереваннӧйын да Помӧсдінын. Луздорса Вуктым посёлокын культура керка кыпӧдан проектсӧ шуӧма пыртны Коми Республикаса инвестиция программаӧ.
Сыктывкарса 4-ӧд номера школаын велӧдчысьяслӧн бать-мам майшасьӧны, дзоньтасян уджыс пӧ сэні ньӧжйӧ мунӧ. Ростислав Гольдштейн висьталіс, пӧдрада удж вӧчысьыс пӧ кикурӧда ма-тыстчӧма аслас могъяс дорӧ да, сыкӧд сёрнитчӧмсӧ вӧлі киритӧма, перйӧма штрап. Пӧдрада удж вӧчысьсӧ индӧма выльӧс.
–Эска, сентябрь 1 лунӧ ныв-зон бара кутасны велӧдчыны асланыс школаын, – шуис регионӧн веськӧдлысь.
Сыктывдінса Выльгорт сиктын ӧні уджалӧ кык школа, классас велӧдчӧны комын мортӧдз, а тайӧ оз лӧсяв санитарнӧй нормаяслы. Коймӧд школа сэні босьтчылӧмаӧсь кыпӧдны концессияа сёрнитчӧм серти, но удж вӧчан предприятиесӧ мыждӧмаӧсь, и уджыс сувтӧма. Ӧні сёрнитчӧмсӧ киритӧны, но, кыдзи пасйис Ростислав Гольдштейн, тайӧс пӧ абу кокни вӧчны да, уна кад ковмас.
–Кор венам став мытшӧдсӧ, школасӧ кутам стрӧитны. Кор тайӧ лоас, шуны ог на вермы, – висьталіс сійӧ.
* * *
«Веськыд йитӧд» дырйи жӧ Ростислав Гольдштейн юӧртіс, мый майнас сійӧ ветлас Луздор да Удора районъясӧ, аддзысьлас сэтчӧс олысьяскӧд, тӧдмасяс социальнӧй учреждениеясын уджӧн.
<> Гижӧдсӧ дасьтіс Павел СИМПЕЛЕВ. Снимокыс ӧтуввезйысь.