Коми зонъяс пӧвстын «Пера-багатыр» конкурсын вермысьӧн лоис Сыктывкарса автомеханическӧй техникумысь студент Георгий Габов – восьса сьӧлӧма, зіль да уджач морт.
–Чужи-быдми Кӧрткерӧc районса Типӧсиктын, сэні менам бать-мам, и меным ставыс сэні муса. Радейта ветлыны вӧрӧ, кыйны чери, – висьталӧ Георгий. – Ичӧтсянь ислала-котрала лызьӧн. Эг ӧтчыд вермыв районса да республикаса ордйысьӧмъясын. Ӧні велӧдча автомеханическӧй техникумса медводдза курсын. Нёль во мысти лоа БПЛА-са (пилоттӧг лэбалан аппарат) операторӧн. Сідзжӧ вӧча-чукӧрта ичӧтик самолёт да аэродадь, велӧдча веськӧдлыны наӧн. Техникумса военно-патриотическӧй клубын тӧдмася военнӧй делӧӧн.
«Пера-багатыр» конкурссӧ таво сизимӧдысь нин котыртлісны. Ордйысьӧмӧ пырӧдчис 11 том зон: Изьва вожысь витӧн, Эжва йылысь – куимӧн, Удора, Инта да Кӧрткерӧс районъясысь – ӧти мортӧн. Апрель 9 лунӧ асывсяньыс Сыктывкарса педколледжын найӧ петкӧдлісны спортын да творчествоын сям-кужӧмсӧ, а конкурслы кывкӧртӧд вӧчисны рытнас вужвойтырлӧн шылада-драмаа театрын.
2025 восӧ Россияын шуӧма Айму дорйысь, а Комиын — герой воӧн, и тайӧ тӧдчис и конкурс нуӧданногӧ. Коми войтырлысь оласног тӧдӧм кындзи зонъяслы коліс и повтӧмлунсӧ, пельклунсӧ, геройясӧс пыдди пуктӧмсӧ петкӧдлыны. Ордйысьны ышӧдана кывъяса шыӧдчӧм ыстӧма налы и «Кӧрт кер» позывнӧя торъя военнӧй операцияын тышкасьысь воин:
«Чолӧм, дона ёртъяс, «Пера-багатыр» конкурсӧ пырӧдчысьяс!
Талун ті чукӧртчинныд Коми Республикаса ылі кар-сиктысь, медым петкӧдлыны коми вӧра-лысьяслысь тӧдӧмлунсӧ да сямсӧ, медым ошйысьыштны вын-эбӧсӧн да смеллунӧн, медым висьтавны асланыд семьяса геройяс йылысь.
Ме эска, мый тіян пиысь быдӧн петкӧдчас бура, ӧд ті быдманныд-туанныд Айму дорйысь, мам кыв видзысь да пӧль-пӧч оласног пыдди пуктысь войтырӧн.
Быд бурсӧ да ыджыд вермӧмъяс!».
И тайӧ кывъясыс инмӧны быд зонлы. Чайта, лыддьысьяслы окота тӧдмасьны накӧд ставныскӧд. А медбура тайӧ артмас, ас йывсьыс кӧ асьныс висьтасясны. Конкурс дырйи найӧ тадзи и вӧчисны.
Дмитрий Дуркин чужлӧма Кипиёв сиктын, бать-мамыслӧн кувсьӧм бӧрын олӧ Кыдзкарын Татьяна Владимировна Костромина тьӧтыс ордын. Ичӧтсяньыс радейтӧ ыджыдджык вокъясыскӧд ветлыны чери кыйны да вӧравны.
—Школа помалӧм бӧрын пыри велӧдчыны Сосногорскса технологическӧй техникумӧ, бӧрйи сварщик профессия. Кӧсъя, медым уджӧй вайис буртор и Коми Республикалы, и Россиялы. Меным кажитчӧ велӧдчыны, тӧдмавны мыйкӧ выльӧс, — висьталіс сійӧ. — Менам эм уна ёрт. Аддза, мый йӧзыс сибӧдчӧны ме дінӧ, сы вӧсна мый верма отсыштны, бурӧдны, сӧвет сетны. Тӧда, мый сьӧкыдлунъясыс вӧчӧны миянӧс ёнджыкӧн да сетӧны позянлун мунны водзӧ. Менсьым дедӧс, Гермоген Маркович Дуркинӧс, босьтӧмаӧсь армияӧ 1941 вося декабрь тӧлысьын. Воюйтӧма связистӧн Рытыввыв фронтын младшӧй лейтенант званиеӧн. 1944 вося гожӧмын Великӧй ю дорын тыш дырйи сьӧкыда ранитчӧма, веськалӧма госпитальӧ. Сэні сылысь ампутируйтӧмаӧсь веськыд коксӧ. Лечитчӧм бӧрас бергӧдчӧма гортас Кипиёв сиктӧ. Сэні уджалӧма изба-читальняын. Кув-сьӧма 1959 воын нелямын сизим арӧсӧн. Гермоген Марковичӧс наградитӧма I степеня Великӧй Отечественнӧй война орденӧн.
А сэсся лыддис дедыслысь фронт вывсянь гӧтырыслы да нывъясыслы ыстылӧм письмӧ:
«Менам донаяс, муса Дуняша гӧтырӧй да нывъяс, Валюк да Дуся. Ыста тіянлы ассьым боевӧй привет!
Медводз кӧсъя висьтавны, мый ме ловъя да здоров, да тіянлы сійӧс жӧ кӧсъя желайтны. Ме век на важ местаас. Тіянлысь письмӧястӧ кыкнансӧ пӧлучиті, ыджыд аттьӧ тіянлы наысь, новлӧдла гимнастёрка зептын, мед быд прӧстджык кадӧ позис выльысь лыддьыны. А лыддя да быттьӧ гортӧ вола, аддзыла тіянӧс.
Гӧгӧрвоа, Дуняша, мый сьӧкыд тэныд ӧтнадлы кык челядьӧн. Быд письмӧ бӧрын окота ёнджыка вины фашистскӧй гадъясӧс.
Кыдзи миян муса нылукъясыс быдмӧны? Кутшӧм окота тіянӧс аддзывны ставнытӧ. Ме тӧда, мый тэ менӧ виччысян, Дуняша. И та вӧсна менам лов вылын лоӧ кокниджык. Кутшӧма ме кӧсъя волыны гортӧ. Тані, окопъясын, ме казьтывла миянлысь войвывса вӧр-ванымӧс, казьтывла, кыдзи ми ӧтлаын ветлывлім вӧрӧ чери кыйны. Тані эм жӧ вӧрыс. Дерт, абу миян гортын кодь. Поводдяыс шоныд, шондіа, жар весиг овлӧ.
Гажтӧмтча, донаӧй, тэысь. Квайт тӧлысь нин ме война вылын. Квайт тӧлысь нин ми тэкӧд эг аддзысьлӧй.
Дуняша, тайӧ письмӧсӧ ме гижа бой водзын. Час да джын мысти мунам. Ог тӧд, воа ог бӧрсӧ. Вермас лоны, мый тайӧ бӧръя письмӧ. А овны окота на. Окота лолавны, окота аддзывны тіянӧс кӧть син пӧлӧн.
Эн печалитчы, Дуняша, донаӧй. Ми салдатъяс. Миянлы сетасны приказ — мунам бойӧ и доръям ассьыным Рӧдинаӧс. Оз ло некутшӧм пӧщада фашистъяслы быд тіян синва войтысь. Виччысьӧй миянӧс, и ми локтам бӧр.
Та вылын помала. Кутам тышкасьны врагъяскӧд бӧръя вир тусьӧдз. Вӧтлам найӧс асланым му вылысь и кутам овны.
Муӧдз копырӧн тэныд Гермоген верӧсыд».
—Аттьӧ дедлы Победаысь! Ме помнита, ме пыдди пукта! — сигӧртіс сёрнисӧ Дмитрий.
И.А.Куратов нима Сыктывкарса педколледжысь студент Назар Терентьев ас йывсьыс висьталіс, семьяын чой-вок пӧвстын пӧ ме медыджыд. Батьӧй, Илья Николаевич Терентьев, уджалӧ школаын физкультура урок велӧдысьӧн да лызьӧн котралӧм кузя тренерӧн, та вӧсна кык арӧссянь нин ме сувті лызь вылӧ.
—Школаын велӧдчигӧн босьті лызьӧн войлӧм кузя мӧд спортивнӧй разряд да «Войвывса многоборье» вермасьӧмын медводдза разряд. 2024 воын Салехард карын нуӧдісны Арктика регионъясса ордйысьӧм, и ме сэні лои черӧн шыбласьӧмын вермысьӧн, — висьталіс Назар. — Кыдз сиктын чужӧм да быдмӧм морт, ме зэв радейта кыйны чери, вӧравны, чукӧртны тшак да вотӧс, отсасьны бать-мамлы гортгӧгӧрса уджын.
Сыктывкарса вӧр институтысь студент Михаил Игнатов рӧдыслысь некымын кӧлена казьтыштӧмӧн шуис, менам нимӧй пӧ Подь Трӧш Ӧлексей Гриша Миш Володь Митрей Миш.
—Ме эжвайывса коми, Помӧсдін сиктысь, 18 арӧсӧдз ӧлі сэні, помалі Тима Вень нима Помӧсдінса шӧр школа. Мӧдӧд во нин ола-велӧдча карын вӧр видзысьӧ. Тайӧ уджсӧ бӧрйи сьӧлӧм корӧм серти, та вӧсна велӧдчыны кажитчӧ. Ай-мамлӧн уджыс тшӧтш вӧркӧд йитчӧма. Семьяын ме медыджыд пи, менам эм кык чой. Вокыд менам абу, и ме батьлӧн ӧтка отсасьысь. Айӧй вель уджач да киподтуя, и сылы отсасигӧн быдсяма уджсӧ тӧдмалі. Ӧні, карад олігӧн, весиг гажӧй бырлӧ уджсьыд — кӧдзыд тӧвся рытӧ пес поткӧдлӧмысь, гожся шондіа лунӧ турун пуктӧмысь, — висьтасис сійӧ. — Велӧдчӧмысь шойччан кадӧ ме вӧчавла коми кывъя мемъяс (серамбана серпасъяс), вуджӧдлывла комиксъяс, корсюрӧ редактируйта ёртъяслысь вуджӧдӧмъяссӧ. 18 арӧс-сянь велотуризм менӧ кыскис: велосипедӧн ветлі нин Печора да Ухта каръясӧ, вӧлі Мылдін, Кӧрткерӧс, Кулӧмдін районъясын.
Институт помалӧм бӧрас Михаил кӧсйӧ поздысьны чужан либӧ мӧд мича коми сиктӧ.
Сыктывкарса лесопромышленнӧй техникумысь Дмитрий Канев чужлӧма Петрунь сиктын.
—Миян ыджыд шуда котыр: батьӧй, мамӧй, кык дзоляджык вок. Миян семьяын уна кӧлена нин кӧр видзысьяс. Прадедӧй, Михаил Михайлович Канев, уджаліс тундраын, дедӧй, Максим Михайлович, водзӧ нуӧдіс сылысь туйвизьсӧ, а сэсся нин батьӧй муніс налӧн туйӧд. Сиктын велӧдчигӧн ме тшӧтш ветлӧдлі чомйӧ, батьӧкӧд видзӧдім кӧръяс бӧрся, яндайтім, разим-пуктім чомнымӧс. Карскӧй саридзӧдз воӧдчылім. И тайӧ кадыс лоис меным мусаӧн да шудаӧн, вунӧдны позьтӧмӧн, тундраын ме кылі ачымӧс вӧльнӧй лэбачӧн, помтӧм олӧм вына детинаӧн, — висьталіс Дмитрий. — Прӧст кадӧ радейта разьны-чукӧртны мототехника, чери кыя, вӧрала. «Петруньса югӧръяс» фольклор котырсакӧд сьылам-йӧктам, петкӧдчам республика пасьталаын.
Сыктывкарса политехническӧй техникумысь студент Илья Канев чужлӧма Варыш грездын.
—Ме зэв радейта кыйны чери да ветлыны батькӧд ягӧ пӧткала. Черисӧ кыйны уналаӧ веськавла, но медся радейтана местаыс — Діюр грезд дорын, ӧд сэтчӧ ветлігӧн пыравлa и бабӧ дорӧ, — чужаніннас гӧрдитчӧмӧн висьтасис Илья. — Изьва районын быд во нуӧдӧны зэв мича гаж — «Луд». Сэні йӧзыс сьылӧны, йӧктӧны, а рытнас йӧзыс вуджӧны Изьва ю мӧдлапӧвса ыджыд эрд вылӧ, кӧні ордйысьӧны верзьӧмӧн вӧвъясӧн. Зэв уна йӧз локтӧны сэтчӧ видзӧдны, коді лоас медся тэрыбӧн. А вӧлӧн ордйысьӧм бӧрын бӧрйӧны медмича нылӧс. Меным окота тӧдмӧдны аслам сиктӧн уна йӧзӧс, мед ставӧн тӧдісны, кутшӧм мича Изьва муным.
Ухтаса медколледжын велӧдчысь Дмитрий Чупров чужлӧма Сизяб сиктын.
—Ме радейта занимайтчыны спортӧн, кӧсъя, медым вӧлі вынаӧн да дзоньвидзаӧн. Менам эм ГТО-ысь зарни значок. Победа лунлы сиӧм эстафетаясӧ пырӧдча, котӧртлывлі Ыбсянь Бакурӧдз 2 километр, а гырысь классъясын велӧдчигӧн — Мокчойсянь Ыбӧдз 7 километр. Радейта ворсны футболӧн, районса ордйысьӧмъясын век босьтлім призӧвӧй местаяс. Школаын велӧдчигӧн турист слётъясӧ пырӧдчылі, ветлывлім Изьва районса уна сиктӧ сэтчӧс история тӧдмалӧм могысь. Школаын жӧ ёртъяскӧд пыр отсасим олӧма йӧзлы, вӧлім волонтёръясӧн. 2024 воӧ пыри велӧдчыны Ухта карса медколледжӧ, кӧсъя лоны фельдшерӧн. Меным ичӧтсянь кажитчӧ тайӧ уджыс, ӧд чужан сиктын фельдшертӧ пыдди пуктӧны. Помала колледж да кута уджавны тэрыб отсӧг сетан станцияын фельдшерӧн, — висьтасис ас йывсьыс Дмитрий. — Ме радейта ассьым Сизяб сиктӧс, ассьым рӧдвужӧс. Мария Павловна бабӧй пыр висьтавліс меным миян семьяысь Айму дорйысьяс йылысь. Григорий Павлович дедӧй Великӧй Отечественнӧй война воясӧ вӧлӧма Войвыв флотса подлодка вылын матросӧн.
Сиктса ног — Галӧ Вась Лена Ромӧн — висьтасис и Ю.А.Спиридонов нима Коми Республикаса юралысь бердын искусство гимназияын велӧдчысь Роман Филиппов.
—Чужи да быдми Изьва районса Кулим сиктын. Велӧдчи сэні жӧ Вениамин Мисаилович Пальшин нима школаын, а ӧні — искусство гимназияса 11-ӧд классын. Ичӧтсянь водзмӧстчи и школаса, и сиктса олӧмын, дорйылі сиктлысь нимсӧ «Йӧктӧ керка, йӧктӧ пач», «Удал зон», «Сьылан кыа» районса конкурсъясын, — шуис сійӧ. — Гимназияын олӧмыс тшӧтш жӧ пуӧмӧн пуӧ, и быд уджын ме окотита лоны коланаӧн: воспитательлы Выль во кежлӧ жыръяс мичмӧдігӧн, сьӧкыд кӧрӧбъяс кыскалігӧн, ёртлы алгебраысь гортса удж гӧгӧрвоӧдігӧн да и уна мукӧдторйын. Зіля унджык тӧдмавны и чужан сикт, Коми му, Россия йылысь. Алла Александровна Таскаева велӧдыськӧд ме гижи аслам прапрадед Аким Ильич Рочев йылысь туясян удж да, лов вылын лӧсьыд лои сыысь, мый юӧртӧг вошӧм прапрадедлысь бур паметь видзӧмӧ пай пукті. Фронт вылын вошӧм пӧльӧй ышӧдіс менӧ пырӧдчыны «Наследие» поискӧвӧй отрядӧ. Унаӧн пуктісны ассьыныс ловсӧ Победа шедӧдӧмӧ, и та вӧсна миян, быдмысь войтырлӧн, мог — бура тӧдны Айму вӧсна Ыджыд тышса история, быд салдатлысь ичӧт либӧ ыджыд подвиг. 2024 вося моз тӧлысьӧ ветлі Псков обласьтса Невель районӧ «Паметь вахтаӧн». Сэки Россияысь да Белоруссияысь 300 том морт 10 лун чӧж нуӧдім корсьысян удж. Ми, поискӧвикъяс, кыз му улысь кыпӧдім 24 салдат коляс. Тайӧ колана уджас эм и менам пай.
Быд каникул дырйи Роман ветлывлӧ чужан сиктас, муса бабыс ордӧ. Сылӧн пӧ 7 внук, а менӧ шуӧ «витӧд челядьӧн», ӧд ме быдми сы дорын. Кулим сиктӧй пӧ кыскӧ менӧ, сетӧ олӧм вын, бурдӧдӧ лов. И нинӧм пӧ оз торк сыкӧд крепыд йитӧдсӧ.
И.П.Морозов нима Сыктывкарса медколледжысь студент Сергей Паршуков чужлӧма Кулӧмдін сиктын.
—Медицина кыскис менӧ ичӧтсянь, и ме сэки нин шулі йитны олӧмӧс сыкӧд, — висьталіс Сергей. — Менам ӧти шӧр хобби — спорт, ворса футболӧн. Коймӧд классянь тшӧтш видлі ачымӧс аккордеонӧн ворсӧмын да ворслі йӧз водзын концертъяс дырйи. Менам семья (мам, бать, вок) ыджыд пай пуктӧ менам олӧмӧ. Ми видзам традицияяс да зілям кыдз позьӧ унджык кад ӧтвылысь коллявны. Ме отсася гортын бать-мамлы, шуа налы ыджыд аттьӧ радейтӧмысь да отсӧгысь. Менам олӧмын шӧр девиз: «Пукты ас водзад сьӧкыд могъяс да век воӧдчы наӧдз». Ме эска аслам позянлунъясӧ да тӧда, мый лоасны выль вермӧмъяс.
Удораса зон Никита Зорин велӧдчӧ Сыктывкарса политехническӧй техникумлӧн Удораса филиалын. Ӧкмысӧд классӧдз велӧдчӧма Важгортса школаын да аттьӧалӧ сэтчӧс велӧдысьясӧс бур тӧдӧмлун сетӧмысь, чужан му радейтны ышӧдӧмысь.
—Менам семьяӧй ыджыд: мам, бать, ме, кык вок да ичӧтджык чой. Мам да батьӧ уджалӧны Важгортса школаын, — висьталіс Никита. — Ӧні ме велӧдча Сыктывкарса политехническӧй техникумын. Сэні ме тӧдмаси уна бур зонкӧд, сёрнитам накӧд комиӧн, кывзам коми шылад. Ёртася нималана сьылысь Владимир Трошевкӧд, тшӧкыда кывза сылысь «Муса олӧм», «Гажа вой», «Маръямоль» сьыланкывъяс. «Пера-багатыр» конкурс тӧдмӧдас менӧ коми культураӧн да традицияӧн.
Питирим Сорокин нима Сыктывкарса университетысь студент Андрей Тимушев ёна радейтӧ паськыд, мича да озыр Коми мунымӧс. И ньӧти пӧ ог яндысь чужан коми кывйысь да велӧда ёртъясӧс сёрнитны комиӧн. Тадзи пӧ менам отсӧгӧн роч йӧз тӧдмалӧны выль коми кывъяс.
—Ачым ме чужи да быдми Кулӧмдін районса Дон сиктын. Ӧні велӧдча юркарын магистратураса бӧръя курсын радиофизикӧ. Велӧдчӧм кындзи удита пырӧдчыны спортӧ да творчествоӧ, ворса волейболӧн Кулӧмдін районса «Парма» командаын. Кольӧм во уджалі «Коми гор» радиоын, тӧдмӧді выльторъясӧн. Сідзжӧ велӧда йӧзӧс ветлыны машинаӧн, уджала автоинструкторӧн, — шуис Андрей да содтіс: — Коми зонъяслы сиа ён да крепыд дзоньвидзалун, а нывъяслы — муслун да шуда олӧм.
Конкурс бӧрын нин Роман Филиппов со тадзи донъяліс ордйысьӧмсӧ:
—«Пера-багатыр» конкурсын меным, 11-ӧд классын велӧдчысьлы, лои венласьны техникум-колледжса, университетса студентъяскӧд. Спорт юкӧнас меным вӧлі сьӧкыд. Мичурин паркті 1 километр котӧртігӧн усис лым, вӧлі вильыд. Но меным кажитчис. Нӧшта коліс хорейӧ асык шыбитны (дас ӧти мортысь сӧмын кыкӧн веськалісны), норт вомӧн чеччавны. Пажнайтӧм бӧрын пансис творчествоын венласьӧм. Быдӧн бура дасьтысьӧмаӧсь. Эз кокни вӧв накӧд ордйысьны, но ме ӧд гимназист, а гимназистъяслы ставыс вын-эбӧс сертиыс, быдтор вӧчасны.
Конкурс эм конкурс, и вермысьыс сэні ӧти. Пера-багатырӧн лоис Георгий Габов. Регыд сійӧ ветлас Москваӧ «Сердце Родины» фестиваль вылӧ.
—Ме и чайтны эг куж, мый верма. Кор висьталісны менсьым нимӧс, нюмӧс кутны эг вермы. Ме зэв рад тайӧ вермӧмыслы, — шуис Георгий.
Жюри эз вунӧд и мукӧд ордйысьысьӧс. Михаил Игнатовӧс донъялысьяс пасйисны «Рӧд тӧдысь» нимпасын, Сергей Паршуковӧс шуисны медся сюсь, Дмитрий Дуркинӧс — киподтуя, Назар Терентьевӧс — тӧлка, Илья Каневӧс — удал, Роман Филипповӧс — енбиа, Дмитрий Чупровӧс — зіль, Андрей Тимушевӧс — ён, Дмитрий Каневӧс — повтӧм, Никита Зоринӧс — медся вежавидзысь зонмӧн.
Коми Республикаса Госсӧветӧн веськӧдлысь Сергей Усачёв ордйысьысьяс дорӧ шыӧдчигӧн пасйис, енбиныд, сямныд пӧ тіянлы лоас и олӧмад вермӧмъяслы зумыд подулӧн.
—Ті босьтінныд ас вылад чужан му, мам кыв, миян оласног вӧсна ыджыд кывкутӧм. Тайӧ подулас кутасны быдмыны выль геройяс, — шуис сійӧ.
Жюриӧ пырысь Людмила Камбалова пасйис, ок, и ёна пӧ кажитчӧ меным тайӧ конкурсыс. Но донъявны коми зонъясӧс пӧ аминь сьӧкыд, ӧд ставныс сьӧлӧмсяньыс дасьтысьӧмаӧсь да зэв бура петкӧдлісны ассьыныс кужӧмлун да сям. Людмила аттьӧаліс конкурс котыртысьясӧс, ордйысьӧмӧ пырӧдчысьясӧс да налы дасьтысьны отсасьысьясӧс.
—Кӧсъя пасйыны, мый сизимӧдысь конкурссӧ нуӧдісны, и тайӧ каднас сцена вылӧ петаліс уна том морт — и ставныс найӧ Пера-багатыръяс! — шуис конкурслы кывкӧртӧд вӧчигӧн Людмила Камбалова.
<> Павел Симпелев.
Снимокъясыс «ВКонтактеын «Коми войтыр» котырысь да Людмила ИГУШЕВАЛӦН.