Кык во коставлӧм бӧрын «Бессмертнӧй полк» бара на ӧтувтас Комиын уна сюрс олысьӧс. Тайӧ лоӧ Айму вӧсна Ыджыд тышын вермысьясӧс нимӧдан ыджыд акция.
Сыктывкарын да Эжва районын «Бессмертнӧй полк» восьлалас уличаясті, сӧмын бӧръяас Слӧбӧда изэрдӧ оз кежав. Та йылысь «Победа» оргкомитет чукӧртчылігӧн юӧртіс юркарса мэр Владимир Голдин.
Ставсӧ тайӧс веськыд эфирын да соцсетьын петкӧдлас «Юрган» телеканал.
Акциясӧ нуӧдігӧн пӧрадок бӧрся кутасны видзӧдны полицияса да Комиын Росгвардияса сотрудникъяс.
* * *
Сыктывкарысь Великӧй Отечественнӧй войнаын фашистлы паныд тышкасьысь Николай Рочев вочаалас Победа лунсӧ Москваын Гӧрд изэрдын парад дырйи. А со Микуньысь Ленинградын блокада пыкӧм Валентина Белоусова да Усинскысь фашист концлагерӧ тыр арлыдтӧмӧн веськавлӧм Александр Пожогин Май 9 лунӧдз ветласны Санкт-Петербургӧ.
Николай Акимович Рочевлысь стационарын видлалӧмаӧсь нин дзоньвидзалунсӧ. Туйын да кыпыд чукӧртчылӧмъяс дырйи сыкӧд орччӧн пыр лоӧ медик.
Валентина Белоусова да Александр Пожогинӧс Санкт-Петербургын виччысьӧны апрель 27-30 лунъясӧ. Налысь ветлӧмсӧ котыртӧма Ростислав Гольдштейнлӧн тшӧктӧм серти. Та кузя корӧмӧн Валентина Белоусова шыӧдчис Коми Республикаса юралысьлысь удж вӧчысь дорӧ сылӧн Емдін районӧ тавося февральын уджмогӧн волігас.
Рытыв-Войвыв регионын Коми Республикаса представительство урчитӧма нин ветеранъяслы торъя программа. Накӧд орччӧн тшӧтш лоӧ медик, дасьӧсь и туйӧ билетъясыс.