«Сыктывкарса ЛПК» акционер котыр лоис предпринимательство юкӧнын «Золотой Меркурий» национальнӧй премиялӧн регионса тшупӧдын вер-мысьӧн. Сынӧдӧ тшына ру лэдзӧм чинтӧмысь комбинатлы сетісны «Экологически ответственное предприятие» нимпасын награда.
Сынӧдӧ петан ру чинтӧм могысь вӧр комбинатса ТЭЦ-ын вӧчӧмаӧсь кырсь да кер пилитігӧн артмӧм мукӧд шыблас сотан пӧрт.
–Тайӧ пӧртъяс этшаджык биару колӧ сотны, сідзкӧ, чинӧ и сынӧдӧ веськалан углерода руыс, – висьталіс «Сыктывкарса ЛПК» акционер котырысь главнӧй эколог Дмитрий Караваев.
Биотопливоӧн – пу кырсьӧн да ва пыдӧсӧ пуксьӧм неджӧгӧн – уджӧдан пӧртйыс вежис куим важмӧмӧс да тӧдчымӧн чинтіс сынӧдӧ лэдзан русӧ. Биаруыс сэні колӧ сӧмын пӧрт ломзьӧдігӧн да биоломтас быригӧн. Выль пӧрт уджӧдӧмыс сетіс позянлун чинтыны биаруӧн вӧдитчӧмсӧ матӧ 100.000 кубометр, а сынӧдӧ петан русӧ – 185.000 тонна сайӧ.
ТЭЦ модернизируйтігӧн кырсь сотан выль пӧрт вӧчӧмыс петкӧдлӧ, мый вӧр комбинатын зільӧны эновтчыны важмӧм да пыртны ӧнія кадлы лӧсялана технологияяс.
«Сыктывкарса ЛПК»-лысь сынӧдӧ лэдзан ру чинтӧм кузя уджтасыс Россияса минпромторглӧн промышленносьтын юӧртан тэчас сайтса климатическӧй проектъяс лыдын.
2002 воын Россияса вузасян да промышленносьт палатаӧн вынсьӧдӧм предпринимательство юкӧнын «Золотой Меркурий» национальнӧй премия олӧмӧ пӧртны отсалӧны Федерацияса Сӧвет да Государственнӧй Дума.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.