Парфма-ягын ӧзйӧмин туялысь лётчик-наблюдательясӧс Россияын дасьтӧны сӧмын ӧти велӧдчанінын – федеральнӧй авиалесоохраналӧн авиационнӧй учебнӧй шӧринын.
Кольӧмвося сентябрсянь сэні велӧдчисны да зэв колана профессия босьтісны и вӧрын кусӧдчан республикаса шӧринысь Сыктывкарса да Чилимдін районса юкӧнъясын уджалысьяс Никита Лемницкий да Сергей Чипсанов.
Найӧ тренируйтчисны чеччавны парашютӧн, лэччыны лэбан самолётсянь му вылӧ кӧрт гезйӧд. Велӧдчисны вӧчны тайӧс сэтшӧм ногӧн, медым сотчанінӧ воӧдчигӧн аскӧдныскӧд эз ло некутшӧм неминуча. Тренажёръясӧн сӧвмӧдісны самолётӧн лэбалан сямсӧ, тӧдмасисны навигацияӧн.
Экзаменъяс бура сдайтӧм бӧрын налы сетісны профессиональнӧй тӧдӧмлун содтӧм йылысь диплом.
Но парма-яг весьтті Ан-2 самолётӧн да Ми-8 вертолётӧн кытшлавны найӧ вермасны сӧмын ыджыд опыта наставниккӧд 45 час лэбалӧм бӧрын, ӧд лётчик-наблюдательлӧн уджыс сьӧкыд, зэв кывкутана, да налы колӧ сяммыны вӧчны ставсӧ, медым видзны йӧзлысь олӧмсӧ да миян республикаын вӧрса озырлунсӧ.
<> Гижӧдъяссӧ дасьтіс Павел СИМПЕЛЕВ.
Снимокъясыс ӧтуввезйысь.