2022 вося март 26 лунӧ торъя военнӧй операция дырйи миян морпех рота вермис веськавны вӧрӧг кытшӧ. Налы отсӧг вылӧ воисны Владимир Носов да сылӧн ёртъяс.
Гвардияса капитан Носов повтӧг нуӧдӧма ас бӧрсяыс саридзса пехотинечьясӧс. Кытшӧ босьтны миянлысь воинъясӧс вӧрӧг абу вермӧма, но ачыс Владимир Носов пӧгибнитӧма. Апрель 9 лунӧ сійӧс дзебӧмаӧсь чужан сиктас Чилимдін районса Мӧскашорын.
Странаса президентлӧн индӧдӧн 2022 вося май 25 лунӧ Владимир Николаевич Носовлы сетӧма Россияса Герой ним.
Россияса Герой Владимир Носов нимаӧсь ӧні Балтика флотса противо-диверсионнӧй катер, Мӧскашорса кадет да Калининград обласьтысь Балтийск карса 4-ӧд номера школаяс.
Куим во колис Геройлӧн подвигсянь, и март помын Чилимдін районӧ волісны Балтийскса школаын велӧдчысьяс, тшӧтш и Владимир Носовлӧн Диана нылыс. Кыдзи висьталіс сійӧ, бать чужанінӧ волӧмыс пӧ лов вӧрзьӧдана лоис, весиг пӧ кывъяс оз сюрны, медым сьӧлӧм-кылӧмӧс петкӧдлыны.
Балтийскысь ныв-зон тӧдмасисны Мӧскашорса школаысь кадетъяскӧд, волісны Геройлӧн бать-мам Надежда Владимировна да Николай Иванович Носовъяс дорӧ гортас. Чилимдін вочаалӧма найӧс шондіа поводдяӧн да джуджыд толаясӧн. Лымсӧ пӧ ми ог и аддзывлӧй, и лыжи вылӧ сувтім да медводдзаысь исласим Коми Республикаын.
А.В.Журавский нима музейын налы висьталісны Чилимдін сиктса озыр история йылысь, тӧдмӧдісны челядьӧс Комиын нэмсӧ олысь роч йӧзлӧн культураӧн, традицияясӧн, ышӧдісны ныв-зонмӧс босьтчыны туявны рӧдныслысь вужъяс, ас семья радейтӧмсянь пӧ и Айму дорӧ муслуныд чужӧ.
Мӧскашорса кадетъяс Балтийскысь побратимъяскӧд (тадзи чилимдінса шуисны гӧсьтъясӧс) ӧтув нуӧдісны военно-тактическӧй ворсӧм. Пансис сійӧ Геройлы памятник дорын, том войтыр маршируйтӧмӧн мунісны сы дорті, налӧн юр весьтын дӧлаліс Балтика флотса морскӧй пехотаысь 336-ӧд бригадалӧн флаг – сэні служитліс Владимир Николаевич Носов.
Ворсігас ныв-зонлӧн отрядлы коліс бырӧдны «вӧрӧглысь» пристань дорӧ писькӧдчӧм.. Отряд ӧдйӧ аддзис диверсант группасӧ да бырӧдіс сійӧс, а сэсся Печора ю кузя сынӧдса пӧдушкаа десант катерӧн катіс йи вывті вуджанінлань, сэні томулов сӧлісны машинаясӧ да мунісны эновтӧм карьер- лань, кытысь тшӧтш коліс вӧтлыны «вӧрӧгӧс». Снегоходъясӧн кытшовтісны да мышсяньыс уськӧдчисны сы вылӧ. «Вӧрӧг» эз виччысь тайӧс да пышйис.
Мӧскашорысь кадет школаса директорӧс вежысь Алексей Тирановлӧн юрнуӧдӧм улын ворсӧмсӧ вӧлі дасьтӧма Владимир Носовлӧн бӧръя тыш серти, медым тырвыйӧ петкӧдлыны сылысь командуйтан сямсӧ. Ворсіс и Геройлӧн Диана нылыс, и сы вылӧ видзӧдӧмӧн вӧвлӧм кадетъяслы син водзас сувтіс, кыдзи уна во сайын учениеяс дырйи киас автоматӧн тадзи жӧ котраліс «Беркут» военно-патриотическӧй клубса командир Володя Носов.
Татшӧм аддзысьлӧмъясыс бур боксянь тӧдчӧны том йӧз вылӧ. Найӧ аддзӧны, мый Владимир Носовлы Айму радейтӧмыс лоис аслас олӧмысь донаджык, и сійӧ тырвыйӧ пӧртіс олӧмӧ воин могсӧ. Быдмысь войтыр кӧсйӧны, медым Украинакӧд войнаыс ӧдйӧджык помасяс, да миян салдатъяс бергӧдчасны гортаныс ловйӧн. Мӧскашорысь Марина Чупрова Владимир Николаевич Носов йылысь гижӧдын пасйӧ, медым пӧ лоны патриотӧн, колӧ радейтны бать-мамтӧ, рӧдвужтӧ, бура велӧдчыны, нырччыны спортӧ, бӧрйыны лов серти удж да збыльмӧдны ас водзад сувтӧдӧм став могтӧ. Владимир Носов да Россияса мукӧд Геройяс пӧ повтӧм, веськыд, шань йӧз, и найӧ асьсӧ жалиттӧг сувтісны дорйыны Рӧдинанымӧс.
Балтийскысь котырӧн юрнуӧдысь Татьяна Зуева аттьӧаліс чилимдінсаӧс пӧся примитӧмысь да шуис, кута пӧ лача, мый и водзӧ мӧдам ёртасьны.
* * *
Март 26 лунӧ Владимир Николаевич Носовӧс казьтылісны и Балтийск карса 4-ӧд номера школаын. Гӧсьтъяс пӧвстын сэні вӧліны и «Парма» котырын да «Коми землячествоын» зільысьяс Светлана Терентьева да Николай Рулёв, ӧд буретш Калининград обласьтын да Москваын олысь миян землякъяс водзмӧстчисны тӧдмӧдны ёрта-ёртыскӧд Россияса Герой Владимир Носов нима кык школаын велӧдчысьясӧс да лӧсьӧдны на костын топыд йитӧд.
<> Павел Симпелев. Снимокъясыс ӧтуввезйысь.