Видео | Ловъя серпас

Изьва районса Чика грездлы 140 во тырӧ. Тайӧ гӧгрӧс тшупӧда пас кежлас дас квайт арӧса водзмӧстчысь зон Генрих Немчинов неыджыд фильм (ловъя серпас – тадзи вуджӧдӧма фильм кывсӧ авторыс) снимайтӧма. Висьтавсьӧ сэні и история, и грездын олысьяс да налӧн талунъя тӧжд-майшасьӧм йылысь.

Фильмсӧ вӧчны отсалӧмысь Генрих пӧся аттьӧалӧ Геннадий Алексеевич Артеевӧс да Николай Иовлевич Терентьевӧс, кодъяс пыдди пуктӧмаӧсь том мортлысь водзмӧстчӧмсӧ да лӧсьыда висьтасьӧмаӧсь грездлӧн олӧм йылысь.

Ловъя серпассӧ Генрих йӧзӧдӧма ӧтуввезйын, и сизим сюрс морт нин сійӧс видзӧдӧма. Унаӧн ошкӧмаӧсь сійӧс, молодеч пӧ, сэтшӧм бур козин грездыслы вӧчӧмыд! Енбиа морт пӧ тэ, и водзӧ эн эновтчы тайӧ уджсьыс.

Вӧзйӧмаӧсь весиг Чикаса туйяс йылысь фильм снимайтны. Туйясыс пӧ шогмытӧмӧсь, зэрас да, вӧйны верман. Кызь ӧтиӧд нэмын пӧ олам, наука да техника кадӧ, а прамӧй туй вӧчны ог сяммӧй.

Генрих Немчинов велӧдчӧ искусствояс гимназияын, неважӧн ёртъясыскӧд экспедицияӧн ветлӧмаӧсь Перым крайӧ, и бара жӧ сэні ловъя серпастӧ вӧчӧма. Да абу ӧтиӧс, а куимӧс. И бара жӧ ошкана кывъяс нажӧвитӧма.

Павел Анохин.

Видео | Ловъя серпас

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх