Игорь Поляк –XXI нэмся вӧр лэдзысь

«Монди Сыктывкарса ЛПК»-лӧн вӧр заптан Вылыс Эжваса участокысь Асыввыв отделениеын харвестерӧн уджалысь машинист Игорь Поляк босьтіс мӧд места «Лесоруб XXI века» ставроссияса конкурсын. Вӧр заптысьяс костын тайӧ тӧдчана ордйысьӧмыс муніс август 7-10 лунъясӧ Архангельск обласьтса Устьянскӧй районын.

Таво чемпионатын петкӧдчис Россияса компания-предприятиеясысь 50 команда. Ордйысисны вит нимпасын: форвардерӧн, харвестерӧн, гидроманипуляторӧн, вӧр сӧвтан погрузчикӧн да экскаваторӧн вӧдитчӧмын. Машинистъяслӧн вӧлі позянлун бӧрйыны аслыныс лӧсялана «чибӧӧс» 20 сикас техникаысь.

«Монди Сыктывкарса ЛПК»-сянь конкурсын петкӧдчисны нёльӧн: экскаваторса машинист Владимир Лодыгин, вӧр заптан форвардерса машинист Александр Прудников, вӧр заптан харвестерса машинист Игорь Поляк да вӧр петкӧдан гидроманипуляторӧн уджалысь Дмитрий Игнатов. Юрнуӧдіс командаӧн Асыввыв отделениеысь главнӧй механик Александр Замараев.

Ӧткӧн ордйысьӧмын харвестерса машинист Игорь Поляк шедӧдіс мӧдӧд места. «Комиинформлы» сійӧ висьталіс, мый конкурсын вермынысӧ вӧлі сьӧкыд, ӧд вын-сямсӧ видліс 80 гӧгӧр морт, и быдӧн зілис ордйыны мукӧдсӧ. Та дырйи и тшӧктӧмторсӧ вӧчны эз вӧв кокни. А заданиесӧ збыльмӧдны коліс сӧмын ӧти минутӧн.

Медводз харвестерӧн уджалысьяслы колӧма вежны пилитчан чеп. Норматив серти тайӧс вӧчӧмысь ордйысьысьлы урчитӧма 300 балл. Игорьлы тырмӧма 9 секунд, и видзтӧм секундъяссӧ содтӧмаӧсь баллъяс дорӧ.

Мӧд задание дырйи колӧма пӧрӧдны пу, та дырйи мед эськӧ сійӧ усис 2 метр пасьта ворота шӧрӧ. Игорьлӧн тайӧ артмӧма, но усьӧм бӧрас пуыс пружинитӧма мусьыс да вешйӧма 9 сантиметр. Коймӧд урчитӧмторсӧ – пӧрӧдӧм пу увйыны – харвестерса машинист вӧчӧма 16 секундӧн.

–Мӧд заданиеыс вӧлі медся сьӧкыд. Збыльысьсӧ кӧ, и мукӧдыс эз кокниджыкӧсь вӧвны. Ӧд вермыны кӧсйис быдӧн, козинъясыс донаӧсь да – Hyundai Greta кроссовер, Stels Guepard квадроцикл да Stels Витязь снегоход, – висьталіс Игорь Поляк. – Кык лунсӧ ме вӧлі турнир таблицаын медвылыс тшупӧдын, но коймӧд лунас менӧ ордйисны муртса 10 очкоӧн.

Асыввыв отделениеысь главнӧй механик Александр Замараев серти, «Монди Сыктывкарса ЛПК»-лӧн команда вӧлі зэв ён да чайтіс шедӧдны уна вермӧм.

–«Лесоруб XXI века» ордйысьӧмын «Монди СЛПКсаяс» петкӧдчисны зэв бура. Став команда пӧвстын ми шедӧдім нёльӧд места, – пасйис сійӧ. – Игорь Поляк сідзжӧ лоис мӧдӧн «Oregon-профи» компаниялӧн профессиональнӧй мастерлун донъялан торъя конкурсын. Форвардерса машинист Александр Прудников шедӧдіс 80 ордйысьысь пӧвстын квайтӧд места. Команданым кык сутки вӧлі куим медбур лыдын. А ӧд конкурсӧ пырӧдчисны ассьыныс уджсӧ медбура тӧдысь-вӧчысьяс, збыльысь мастеръяс.

Таысь кындзи «Лесоруб XXI века» дырйи муніс вӧр овмӧсын уджалысь аньяс да вӧр овмӧслы дасьтан велӧдчанінъясысь студенткаяс пӧвстын мичлун конкурс. «Королева леса-2019»-лӧн суперфиналын «Монди Сыктывкарса ЛПК»-сянь петкӧдчис Марина Ортянова, компанияын персонал дасьтан да сійӧн веськӧдлан отделса велӧдан шӧринысь специалист. Мичлун конкурсӧ пырӧдчыліс Россияса 34 регионысь 150 гӧгӧр ныв. И мед, Марина Ортяновалы кӧ эз вичмы меддона коронаыс, сылы сетісны «Красавица Устьяны» ним да диадема.

* * *

Казьтыштам, «Лесоруб XXI века» ставроссияса чемпионатсӧ Архангельск обласьтын нуӧдӧны 2015 восянь. Сійӧс котыртысьясыс Россияса вӧр-ва да гӧгӧртас видзан министерство, «Рослесхоз» федеральнӧй агентство, Россияса промышленносьт да вузасьӧм кузя министерство, Архангельск обласьтса правительство да «Лесоруб XXI века» ассоциация.

Чемпионат лунъясӧ жӧ нуӧдӧны удж кузя уна сикас аддзысьлӧм-сёрни да выставка-конкурс. Пырӧдчӧны сэтчӧ вӧр овмӧсса гырысь предприятиеяс, техникаӧн да оборудованиеӧн могмӧдысьяс да мукӧд.

Игорь Поляк –XXI нэмся вӧр лэдзысь

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх