Йӧзыс ошкӧмаӧсь

Март 18 лунсянь Коми Республикалы 100 во тыригкежлӧ логотип дасьтан конкурс вылӧ воӧма 247 удж. Ӧтуввезйӧн вӧдитчысьяс медуна гӧлӧс (3.898, либӧ став гӧлӧссьыс 55,3 прӧчентсӧ) сетӧмаӧсь Анелия Лянцевичлӧн да Полина Кратцлӧн серпас дор. Россияса дизайнеръяслӧн союзӧ пырысь Анелия Лянцевич велӧдӧ Сыктывкарса университетын, а Полина Кратц помалӧма СГУ-ысь культура да искусство институт.

Республикаса правительствоӧн веськӧдлысьӧс медводдза вежысь Михаил Порядин аддзысьліс конкурсын вермысьяскӧд да чолӧмаліс найӧс.

—Тайӧ воыс миян республикаын мунӧ наставничество пас улын, — висьталіс Михаил Порядин. — Наставник юксьӧ аслас велӧдчыськӧд тӧдӧмлуннас, опытнас, и зэв долыд, кор ӧтув зільӧмӧн вермӧмсӧ шедӧдӧны велӧдысь да велӧдчысь.

Анелия Лянцевичлӧн кывъяс серти, Полина босьтчӧма тайӧ серпасас диплом доръян удж вӧчигас, и сэки нин логотипсӧ вылӧ донъялӧмаӧсь графикаа дизайнысь конкурсын.

—А кор йӧзӧдісны Коми Республикалы 100 во тырӧмлы сиӧм логотип дасьтан конкурссӧ, ми сёрнитчим тшӧтш пырӧд-чыны сэтчӧ, — висьталіс Анелия Лянцевич. — Вермӧмыс миянлы лоис виччысьтӧмӧн, и зэв нимкодь, мый йӧзыслы кажитчӧма уджным.

Конкурсын вермӧмысь дизайнеръяслы сетісны 35 сюрс шайта премия. Помӧдз вайӧдӧм бӧрын логотипсӧ йӧзӧдасны плакат-открыткаясын, регионлысь юбилей пасйигӧн сыӧн кутасны вӧдитчыны и гаж нуӧданінъяс мичмӧдігӧн.

Водзӧ лыддьӧй «Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Йӧзыс ошкӧмаӧсь

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх