Коми Республикаын общественнӧй котыръясын зільысьяс, экспертъяс, регионын олысьяс гӧгӧрбок донъя-лӧны челядя семьяяслы отсалӧм йылысь оланпас бала.
Госсӧветысь депутат Сергей Усачёвлӧн кывъяс серти, оланпас баласӧ видлалӧмаӧсь тшӧтш и министерство-ведомствоса да муниципальнӧй юкӧнъясса общественнӧй сӧветъясын. Сёысь унджык вежсьӧм пӧ вӧлі вӧзйӧма оланпас балаас.
Коми Республикаса Госсӧветӧн веськӧдлысь Надежда Дорофеева пасйис, мый закон бала видлалӧмыс сетіс позянлун и регионын олысьяслы пырӧдчыны оланпасъяс дасьтан уджӧ, а власьт тэчасын зільысьяслы — кутны йӧзыскӧд топыд йитӧд.
—Тӧдчӧда, мый тайӧ уджсӧ вӧлі вӧчӧма Коми Республикаса юралысьлӧн вӧзйӧм серти, — висьталіс Надежда Дорофеева. — Мам-батьлӧн, пӧч-пӧльлӧн нимсянь кӧсъя аттьӧавны Сергей Анатольевич Гапликовӧс челядя семьяяслы отсавны кӧсйӧмысь.
Оланпас бала донъялӧмлы кывкӧртӧд вӧчигӧн республикаса парламентӧн веськӧдлысь пасйис, мый депутатъяс да общественнӧй котыръясын водзмӧстчысьяс ошкӧны законъясын вежсьӧмъяссӧ, ӧд найӧс веськӧдӧма семьяяслысь олӧмсӧ бур-мӧдӧм вылӧ. Тайӧ оланпасыс пӧ лоас и «Демография» нацпроект збыльмӧдӧмӧ тӧдчана пайӧн.
Оланпас балаӧ содтӧд вӧзйӧмъяссӧ ӧні видлалӧны республикаса министерствоясын.
—Ми кӧсъям, медым тайӧ законыс петкӧдлас власьт тэчаслысь да республикаын олысьяслысь ӧтувъя уджсӧ, — висьталіс Надежда Дорофеева.
Выль оланпасын урчитӧм отсӧгсӧ шуӧма вичмӧдны 2020 вося январь 1 лунсянь (а сэтысь ӧткымын индӧд кутасны збыльмӧдны 2019 вося сентябрь 1 лунсянь нин). Законсӧ олӧмӧ пӧртӧм могысь республикаса бюджетын быд во мӧдасны торйӧдны 1 миллиард шайтӧдз.
Водзӧ лыддьӧй «Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.