Август 17 лунӧ юркарын паськӧдчылас Коми Республикаса народнӧй овмӧсын вермӧмъяс да позянлунъяс петкӧдлан “Достояние Севера” (Коми ВДНХ) выставка, кытчӧ пырӧдчылас тшӧтш и миян “Коми йӧзӧдчан керка” учреждение. Холдингӧн веськӧдлысь Инесса Орёл серти, Коми ВДНХ – зэв бур ин, медым петкӧдлыны аслад компаниялысь чужӧмбансӧ, аддзывны, кодлы ми уджалам да тшӧтш и корсьны выль йӧзӧс.
Тайӧ ыджыд выставка дырйи “Коми йӧзӧдчан керкаӧ” пырысь газет-журналъяс вылӧ электроннӧя гижӧдчыны позяс донтӧмджыкысь.
“Йӧлӧга” газет редакция Коми ВДНХ дырйи нуӧдас республикаса ГИБДД-кӧд ӧттшӧтш мастер-класс, кӧні посниуловлӧн лоӧ позянлун вӧчавны машина би улын югъяслысь да коми орнамент мыгӧра пасъяс. Буретш выставка дырйи редакцияса зільысьяс пӧртасны олӧмӧ “Тӧда кыв да ПДД” уджтаслысь юкӧн. Могыс тайӧ уджтасыслӧн – коми кыв да традицияяс отсӧгӧн велӧдны туйвывса индӧдъяс. Таысь ӧтдор редакцияын зільысьяс ГИБДД-са уджалыськӧд нуӧдасны посниуловкӧд ПДД серти пызанвывса ворсӧмъяс. Колӧ пасйыны, мый тайӧ ворсӧмъяссӧ позьӧ ньӧбны “Коми йӧзӧдчан керкалӧн” “Ордым” лавкаысь.
Коми ВДНХ дырйи “Коми йӧзӧдчан керка” вель на уна мероприятие дасьтіс, тайӧ: и дизайнер Лана Ваховскаякӧд ӧтувъя проект, и “Чушканзі” журналсянь козин. Бурджык аслыд волыны да ас синмӧн ставсӧ аддзывны август 17 лунӧ юркарса “Июнь” вузасян-шойччан шӧринын 10 чассянь 18 часӧдз.
Локтан петасын ми, дерт, паськыдджыка гижам Коми ВДНХ-ын “Коми йӧзӧдчан керкалӧн” водзмӧстчӧм йылысь.
Миян корр.
Выль «Йӧлӧга» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.