Фоторепортаж | А парашютӧн – локтан воын

Август 2 лунӧ Россияын пасйисны Воздушно-десантнӧй войска котыртӧмсянь 89 во. Буретш тайӧ лунас 1930 воын Воронеж дорын ученньӧ дырйи странаын медводдзаысь 12 морт чеччыштісны парашютӧн да пӧртісны олӧмӧ на водзӧ сувтӧдӧм могъяс.

Сыктывкарын десантникъяс да  ветеранъяс тайӧ лунас асывсяньыс волісны Вежа Степанлӧн кафедраа соборӧ. Литургия бӧрын найӧ мунісны «Скорбящий воин» памятник дорӧ кыпыд митинг вылӧ.

Сэтчӧ чукӧртчыліс сё гӧгӧр морт. Десантникъяс волісны бать-мамыскӧд, гӧтыръясыскӧд да челядьыскӧд.

Республикаса юралысь нимсянь ВДВ лунӧн найӧс чолӧмаліс Комиысь правительствоӧн веськӧдлысьӧс вежысь Константин Лазарев.

Став бурсӧ сиисны чукӧртчысьяслы Государственнӧй Сӧветӧн веськӧдлысьӧс вежысь Владимир Косов да юркарса мэрлысь удж вӧчысь Наталья Хозяинова.

Пӧся чолӧмалісны «лӧз беретаясӧс» «Афганистанса ветеранъяслӧн Россияса союзысь» регионса  котырӧн  юрнуӧдысь Вадим Клюпа да «Десантникъяслӧн котырса» татчӧс юкӧнӧн веськӧдлысьӧс вежысь  Эдуард Забоев.

Минут чӧв ланьтӧмӧн тыш-косьын усьӧмаясӧс казьтыштӧм бӧрын десантникъяс пуктісны налы памятник дорӧ ловъя дзоридзьяс.

Кыдзи и быд во, медшӧр гажыс вӧлі Кӧрткерӧс бердса аэродром вылын. Сэтчӧ воліс сюрс гӧгӧр морт.

Константин Лазарев и сэні шы-ӧдчис чукӧртчӧмаяс дорӧ.

–Веськавны служитны десантӧ – тайӧ зэв ыджыд чесьт, – пасйис  сійӧ. – И коді вӧлі Воздушно-десантнӧй войскаын, нэм кэжлас кольӧ десантникӧн. Россияын абу сэсся татшӧм войскаыс, кӧні командирсӧ шуӧны «батьӧн». Буретш татшӧмӧн вӧлі армияса генерал Василий Маргелов.

И Сӧвет кадӧ ВДВ-сӧ шулісны «Вась дядьлӧн войскаӧн». Да и ӧні на тадзи тшӧкыда пасйылӧны.

Константин Лазарев козьналіс  медбур десантникъяслы аттьӧалана письмӧяс.

Коми республикаса военнӧй комиссарӧс вежысь Александр Горбатый казьтыштіс, мый ВДВ пыр лыддьысьыліс миян странаса Вооружённӧй вынъяслӧн элитаӧн. И налӧн югыдлӧз флаг вылын гижӧдыс  талы лӧсялӧ: «Миянысь ӧтдор – некод!».

Муниципалитетса аньяс нимсянь вына, повтӧм да статя мужичӧйясӧс чолӧмаліс Кӧрткерӧс районса администрацияӧн веськӧдлысьлысь удж вӧчысь Людмила Нестерова.

Та бӧрын гӧсьтъяс матыстчисны кузь пызан дорӧ, кӧні найӧс виччысисны десантникъяслӧн мамъясӧн пӧжалӧм пирӧгъяс…

Николай Размыслов. Снимокъясыс авторлӧн.

Водзӧ лыддьӧй «Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

 

Фоторепортаж | А парашютӧн – локтан воын
Пролистать наверх