Кольӧм субӧтаӧ, август 3 лунӧ, Ярославль обласьтса Рыбинскын кыпыда пасйисны карыслы 948 во тырӧм. Та дырйи уна пельӧсын паськӧдчисны быдсикас гажӧдчан-шойччан площадкаяс. На пӧвстысь ӧтиын петкӧдчисны Коми Республикаысь гӧсьтъяс.
Коми сьыланкыв да кывбур, збыль чумын коми пими да лямпа, республикалӧн пазл-карта да вӧралысьяслӧн лунпас-календарь, «Югыд ва» национальнӧй парк, ки помысь вӧчӧмтор да небӧг, войвывлы сиӧм викторина – ставсӧ тайӧс позис аддзывны-кывлыны-тӧдмавны коми площадкаын, кодӧс котыртіс Рыбинскын миян землячество сійӧн юрнуӧдысь Инга Сидоровалӧн водзмӧстчӧмӧн.
Яръюгыд «кодзувъясӧн» тайӧ лунӧ лоисны Кӧрткерӧс районса Типӧсиктысь «Оз тусьяс» фольклор котырын сьылысь-йӧктысьяс. Ок, и шоныда да нимкодьпырысь вочаалісны карса войтыр Коми муысь воӧмаясӧс. И абу шензьӧдана, ӧд дзик на неважӧн «Оз тусьяс» шедӧдісны «Москваса тулыс A Capella» войтыркостса сьылан фестиваль-конкурсын мӧд места.
Гаж вылӧ рыбинсксаяс корлісны и Москваын коми землячествоын водзмӧстчысьясӧс.
–Ме нимкодьпырысь волі тайӧ важ да мича карас, кӧні эг на вӧвлы. Рыбинскын коми землячество котыртчис таво на, позьӧ шуны, муртса на босьтчис уджӧ, но водзмӧстчӧ быдлаын нин. Шензьӧдіс, мыйта тані Комиысь петлӧм йӧзыс. Площадкаӧ волысьяс окотапырысь тӧдмасисны войвыв регионӧн, торйӧн нин пазл-картаӧн, кодӧс рыбинсксаяслы козьналісны Москваын олысь землякъяс.
Мед сӧвмас тайӧ мича карыс, а татчӧс войтыр водзӧ оласны ёртасьӧмӧн да ӧтсӧгласӧн, – юксис аслас сьӧлӧм-кылӧмъясӧн Москваса коми землячествоын зільысь-водзмӧстчысь Наталия Рочева.
Аслыспӧлӧс козинӧн карсаяслы лои тшӧтш Россияын театр волы сиӧм «Из-за кулис по Крестовой» колоннаӧн мунӧм. Уна йӧза визулыс «кывтіс»-восьлаліс «Юбилейнӧй» универмагсянь «Полёт» спорт дворечӧдз. А рытнас юргис праздниклы сиӧм концерт да дзирдаліс салют.
Людмила Великорода.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.