Медвойдӧр уджӧ туйдӧмӧн

Кӧрткерӧс районса Вомын сиктысь Голубенкояслӧн семья лоис ставроссияса «Семья года» конкурсын вермысьяс лыдын. Таво тайӧ конкурс вылас шыӧдчӧмаӧсь страна пасьталаысь 353 семья. Донъялӧмаӧсь найӧс вит нимпасын: «Многодетная семья», «Молодая семья», «Сельская семья», «Золотая семья России» да «Семья – хранитель традиций».

Вомынысь Голубенкоясӧс шуӧмаӧсь вермысьӧн «Сиктса семья» нимпасын. Казьтыштам, мый кольӧм во тайӧ жӧ нимпасас вермысьӧн вӧлі Кӧрткерӧс районысь жӧ Савинъяслӧн семья.

Николай Павлович да Анастасия Николаевна Голубенкояс ӧтлаасьӧмаӧсь дас вит во сайын. Гозъя быдтӧны куим челядьӧс да лыддьӧны, мый медвойдӧр колӧ туйдны-велӧдны найӧс уджӧ. И челядь ичӧтсяньыс отсасьӧны бать-мамыслы ас овмӧсаныс да горт гӧгӧраныс.

Николай Павлович – зіль да уджач морт. Босьтӧма некымын профессия кузя тӧдӧмлун-сям, но та дырйи сылы медтӧдчанаыс – бура пӧжасьны. Сэк жӧ Николай Павлович аддзӧ кад ӧшинь увсӧ пелькӧдны-мичмӧдны. Голубенкояслысь керкасӧ век донъялӧны сиктын медбуръяс лыдын.

Ыджыд пай пуктӧ Николай Павлович и сиктлысь чужӧмбансӧ мичмӧдӧмӧ. Торйӧн кӧ, отсаліс лӧсьӧдны челядьлы площадка, хоккейӧн ворсанін да шойччан парк, а сідзжӧ дзоньтавны школа да детсад.

Анастасия Николаевна сідзжӧ зільӧ-водзмӧстчӧ, медым сиктын олӧмыс водзӧ бурмис. Меставывса власьт тшупӧдын кыпӧдӧ йӧзлы тӧдчана юалӧмъяс да вӧзйӧ, кыдзи позьӧ венны сійӧ либӧ мӧд мытшӧд-падмӧг. Велӧдан юкӧнын уджалӧ да, пырӧдчӧ Вомын сиктлысь чужӧмбансӧ мичмӧдӧм могысь грант вылӧ конкурсъясӧ, збыльмӧдӧ йӧзкостса уджтасъяс, мый йылысь гижлісны нин газетъясын.

Анастасия Николаевна вӧлі республикаын медводдза ТОС-яслы подув пуктысьяс лыдын, и ӧні сы дорӧ шыӧдчылӧны, кыдз та кузя консультант дорӧ. Аньлысь зільӧм-водзмӧстчӧмсӧ пасйӧма почёт грамотаясӧн, дипломъясӧн, аттьӧалана письмӧясӧн, а сідзжӧ «За развитие органов местного самоуправления в Республике Коми» медальӧн.

Кӧть и олӧны Голубенкояс сиктын, зільӧны, мед челядьыс сӧвмисны быд боксянь. Кутчысьӧны дзоньвидза оласногӧ: бать-мамыскӧд тшӧтш быдтасъясныс окотапырысь волывлӧны спортзалӧ, и гортаныс налӧн эм кӧні песны вын-эбӧссӧ. Спортысь кындзи челядьлы воӧ сьӧлӧм вылас робототехника, радейтӧны сьывны-йӧктыны, а сідзжӧ волонтёравны.

Таво майын Голубенкоясӧс, кыдзи регионса уна челядя медбур семьяӧс, пасйисны республикаса правительстволӧн премияӧн (снимок вылын). Ставроссияса «Семья года» конкурсын вермӧмыс петкӧдліс, мый и федеральнӧй тшупӧдын найӧс вылӧ донъялісны.

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Медвойдӧр уджӧ туйдӧмӧн

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх